Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Pagdiskobre

Pagdiskobre

 Nagsugod ang Pagdiskobre

Sang Domingo, Abril 1, 1945, ang mga naggradwar sa Gilead nga sanday Lennart kag Virginia Johnson nag-abot sa Ciudad Trujillo (Santo Domingo subong), ang kapital sang Dominican Republic. Sila ang una nga mga Saksi sa sini nga pungsod, nga may kinagamo kag kabudlayan sadto. * “Amo ini ang teritoryo nga para sa mga payunir,” siling sang 1946 Yearbook, “kag ini nga mga Gileadite maumpisa gid sa puno.” Hunahunaa: Wala sing sanga talatapan, wala sing mga Kingdom Hall, kag wala sing mga kongregasyon. Wala sing kilala ang mga misyonero sa pungsod, diutay lang ang ila nahibaluan nga Spanish, kag wala man sila sing balay ukon sang bisan ano nga pagkabutang. Ano ang ila himuon?

“Nagkadto kami sa Victoria Hotel kag namangkot parte sa dalayunan—lima ka dolyar kada adlaw ang balayran para sa amon nga duha, lakip ang pagkaon,” siling ni Lennart. “Pagkahapon, nakasugod kami dayon sang una nga pagtuon sa Biblia. Amo ini ang natabo: Ang duha ka babayi nga taga-Dominican Republic nga gintun-an namon sa Biblia sa Brooklyn naghatag sa amon sing mga ngalan sang ila mga paryente kag kakilala, kag ang isa sa ila amo si Dr. Green. Sang ginbisitahan namon sia, nakilala man namon ang iya kaingod nga si Moses Rollins. Sang nahibaluan nila kon paano namon nakuha ang ila mga ngalan kag adres, namati sila sing maayo sa mensahe sang Ginharian kag nagtuon sa Biblia. Wala madugay, si Moses amo ang una nga manugbantala sang Ginharian sa ila lugar.”

Apat pa ka misyonero ang nag-abot sang Hunyo 1945,  kag wala madugay, madamo na ang ila napanagtag nga literatura kag nasugdan nga pagtuon sa Biblia. Pagka-Oktubre, nakita nila nga kinahanglan na ang tilipunan. Gani, ginbag-o sang mga misyonero ang sala kag kalan-an sang ila puluy-an para himuon nga Kingdom Hall. Nakalab-ot sa 40 ang nagatambong sa mga miting.

Ang isa sa una nga nagbaton sing kamatuoran amo si Pablo Bruzaud, nga kilala sa hayo nga Palé. Opereytor sia sang kompanya sang bus nga ang biyahe halin sa Santiago pakadto sa Ciudad Trujillo, gani pirme sia nagabiyahe pakadto sa kapital. Isa ka adlaw sang ara sia sa Ciudad Trujillo, naistorya ni Palé ang pila ka Saksi, kag ginhatagan sia sing libro nga “The Truth Shall Make You Free.” Nagtuon sia sa Biblia upod sa ila kada adlaw. Wala madugay nagabantala na sia upod sa mga misyonero kag ginabuligan niya sila sa ila pagbiyahe. Sang ulihi, nakilala niya si Lennart Johnson kag nagbiyahe upod sa iya halin sa Ciudad Trujillo pakadto sa Santiago kag sa mga kabukiran pakadto sa mga lugar sa baybayon sang Puerto Plata agod kadtuan ang interesado nga mga tawo nga nagsulat sa ulong talatapan sa Brooklyn, New York.

Pagbisita Nanday Brother Knorr kag Brother Franz

Sang Marso 1946, sanday Nathan Knorr kag Frederick Franz halin sa ulong talatapan nagbisita sa Dominican Republic. Madamo gid ang nalangkag sa ila pagbisita, kag luwas sa mga kauturan, 75 ka interesado ang nagtambong sa pamulongpulong nga ginhatag ni Brother Knorr. Sa tion sang ila pagbisita, naghimo sing mga kahimusan si Brother Knorr agod maghimo sing sanga talatapan sa Dominican Republic.

Sanday Brother Knorr kag Brother Franz sa pinakauna nga Kingdom Hall sang pungsod sa Ciudad Trujillo

May nag-abot pa nga dugang nga misyonero, kag sang mga hingapusan nga bahin sang 1946 nga tuig sang pag-alagad, may 28 na ka manugbantala sa pungsod. Bangod bag-o pa lang mabantala ang maayong balita sa sini nga pungsod,  naghinguyang sang pila ka gab-i ang mga misyonero para maplano sing maayo kon paano panghikutan ang teritoryo kag mangin organisado kag maid-id ang pagbantala.

Nagsangkad ang Hilikuton

Sang 1947, mga 60 ka manugbantala ang nakigbahin sa pagbantala. Sa sina man nga tuig, ang pila ka misyonero nga nagaalagad anay sa Cuba gin-asayn sa Dominican Republic. Nalakip sa ila amo sanday Roy kag Juanita Brandt. Si Brother Brandt amo ang gintangdo nga alagad sang sanga kag nagpabilin sia sa sini nga pribilehiyo sa sulod sang napulo ka tuig.

Sang manugtapos na ang 1948 nga tuig sang pag-alagad, mga 110 ka manugbantala ang kaupod sang makugi nga mga misyonero sa pagbantala sing maayong balita. Pero lipod sa sini nga mga manugbantala, makaatubang sila sing mabudlay gid nga kahimtangan.

^ par. 1 Ang mga literatura sang Watch Tower ginpanagtag sa Dominican Republic sang 1932. Pero ang pagtudlo sa mga interesado nagsugod sang 1945, sang nag-abot ang mag-asawa nga Johnson.