Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Beinte-Dos ka Tawo ang Nagbiya sa Simbahan

Beinte-Dos ka Tawo ang Nagbiya sa Simbahan

SI German Gomera ikapulo sa 11 ka mag-ulutod. Sang mapatay ang iya amay kag duha ka utod nga babayi, nagsaylo sila sa banwa upod ang ila iloy nga si Luisa. Nag-entra sila sa Mennonite Church kay ang mga magulang nga lalaki ni Luisa kag ang ila mga pamilya miembro sini.

“Sang 1962, may nag-abot nga mag-asawa nga espesyal payunir sa amon banwa,” siling ni German. “Ginasiling sang mga tawo nga ginaimpluwensiahan sini nga mag-asawa ang mga pumuluyo paagi sa ‘mga panudlo sang demonyo.’ Walay sapayan sini, sang nagbisita ang mag-asawa sa balay sang mga Piña, ginpasulod sila. Daku nga pamilya ang mga Piña. Nagdayaw gid sila sa kaayo kag pagkamainabyanon sang mag-asawa, gani namati sila sing maayo sa mensahe. Subong resulta sini nga pagbisita, nagsugod sa pagtuon ang pamilya Piña kag ang akon tatlo ka magulang nga babayi.

“Isa ka adlaw sang nagbisita ang mag-asawa sa pamilya Piña,” padayon ni German, “gin-agda nila ang akon iloy nga mag-upod sa pagtuon. Ginbasa nila ang teksto sa Biblia may kaangtanan sa paglaum nga kabuhi nga wala sing katapusan sa duta. Namangkot ang akon iloy, ‘Ti, ngaa ginatudlo sa amon simbahan nga mapalangit ang mga tawo?’ Gingamit sang brother ang Biblia sa pagsabat kag ginpaathag ang ginasiling  sang Kasulatan parte sa dutan-on nga pagkabanhaw. Natandog sini ang akon iloy kag ginsugid sa iban ang iya natun-an.

“Sang natukiban sang mga pastor sang Mennonite Church nga ang ila mga miembro nagatuon sa mga Saksi ni Jehova, ginhaylo nila ang ila mga miembro nga mag-untat sa pagtuon. Pero ginhimo nila ini paagi sa pagpamahog. Si Maximina, nga iloy sang pamilya Piña, nagsiling sa mga pastor, ‘May edad na ’ko, kag ako ang nagadesisyon kon ano ang akon himuon.’

“Sang ulihi,” siling ni German, “22 ang nagbiya sa Mennonite Church kag nagtambong sa mga miting sa kongregasyon sa gin-arkilahan nga balay. Nabawtismuhan si Nanay sang 1965, kag pagligad sang apat ka tuig sang 1969 nabawtismuhan ako sa edad nga 13 anyos.”

Si German upod ang iya mga utod nga babayi. Tanan sila matutom nga nagaalagad kay Jehova