Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Padayon Ako nga Mangin Isa sang mga Saksi ni Jehova

Ana María (Mary) Glass

Padayon Ako nga Mangin Isa sang mga Saksi ni Jehova
  • NATAWO 1935

  • NABAWTISMUHAN 1956

  • MALIP-OT NGA BIOGRAPIYA Isa ka debotado nga Katoliko nga pamatan-on nga nakatuon sing kamatuoran sa Biblia kag maisugon nga nagbatas sa mga pagpamatok sang iya pamilya, Simbahan, kag Estado.

RELIHIOSO gid ako kag aktibo sa mga hilikuton sang Simbahan. Nagakanta ako sa simbahan kag nagaupod sa mga pari kon diin sila nagamisa. Dayon sang 1955, ang akon magulang nga babayi nagsugid sa akon parte sa palaabuton nga Paraiso. Ginhatagan niya ako sing Biblia, bukleta nga “This Good News of the Kingdom,” kag libro nga “Pakamatuura ang Dios.” Interesado ako sa sini, gani ginpamangkot ko ang pari kon puede ako makabasa sing Biblia. Siling niya “mabuang” kuno ako, pero ginbasa ko ini gihapon.

Pagsaylo ko sa balay sang akon lolo kag lola sa Boca Chica, ginpamangkot ako sang isa ka pari kon ngaa wala ako nagasimba. Ginpaathag ko nga nadiskobrehan ko nga madamo sang mga ginatudlo sa simbahan ang indi makita sa Biblia. Naakig gid ang pari. “Magpamati ka,” singgit niya, “isa ikaw ka karnero nga nagpalayo sa panong.”

 “Indi,” sabat ko, “ikaw ang nagpalayo sa panong ni Jehova, bangod ang mga karnero ginapanag-iyahan ni Jehova kag indi sang bisan sin-o nga tawo.”

Wala na gid ako nagsimba. Nagsaylo ako sa balay sang akon utod nga babayi, kag pagligad lang sang anom ka bulan sugod sang una ko mabatian ang kamatuoran, ginbawtismuhan ako. Nagregular payunir ako dayon. Pagligad sang isa ka tuig, nagpakasal kami ni Enrique Glass nga nagaalagad subong manugtatap sang sirkito. Isa ka bes, samtang nagabantala kami sa isa ka parke sa La Romana, gin-aresto sang mga pulis si Enrique. Samtang nagalakat sila, ginlagas ko sila kag nagsiling: “Saksi ni Jehova man ako, nagabantala man ako. Ngaa wala ninyo ako gindakop?” Pero wala nila ako gin-aresto.

Pito ka tuig kag tunga na tanan nga napriso si Enrique. Sini nga tion, ginsentensiahan naman sia sing 20 ka bulan. Ginabisitahan ko si Enrique kada Domingo. Isa ka bes sang ginduaw ko sia, ginpamangkot ako sang kapitan sang prisuhan, “Ngaa ari ka diri?”

Nagpaathag ako, “Ginpriso ang akon bana bangod isa sia ka Saksi ni Jehova.”

“Bata ka pa kag mangin maayo pa ang imo palaabuton,” sabat niya. “Ngaa ginauyangan mo ang imo tion sa mga Saksi ni Jehova?”

“Saksi ni Jehova man ako,” sabat ko. “Bisan pa patyon mo ako sing pito ka beses kag banhawon sing pito ka beses, padayon ako nga mangin isa sang mga Saksi ni Jehova.” Pagkabati niya sini, ginpahalin niya ako.

Sang ginkuha na ang pagdumili, nagpadayon kami ni Enrique sa pag-alagad sa sirkito kag distrito sing madamo nga tinuig. Napatay si Enrique sang Marso 8, 2008. Nagpadayon ako sa pag-alagad bilang regular payunir.