Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

“Makilala Naton Sila”

“Makilala Naton Sila”

“Makilala Naton Sila sa Pila ka Adlaw”

Sang mga 1935, sa isa ka rehiyon sang pungsod nga ginatawag Cibao Valley, si Pablo González nagsugod sa pagbasa sing Biblia. Miembro sia anay sang isa ka grupo sang Protestante, pero naghalin sia sang nakita niya nga ang ila mga paggawi wala nahisuno sa iya nabasahan sa Kasulatan. Apang padayon niya nga gintun-an ang Pulong sang Dios kag ginsugiran ang iban sang iya natun-an—una ang iya pamilya kag mga kaingod kag dayon ang iban pa nga malapit sa ila lugar. Ginbaligya niya ang iya uma kag kasapatan kag gingamit ang kuarta para suportahan ang iya ministeryo.

Sang 1942, indi magnubo sa 200 ka pamilya ang ginabisitahan ni Pablo sa malapit nga mga lugar kag nagahiwat sia sing regular nga mga miting, bisan pa wala sia sing kontak sa mga Saksi ni Jehova. Ginapalig-on niya ang mga tawo nga magtuon sing Biblia kag magkabuhi nahisuno sa sini. Madamo ang nagbaton sang iya mensahe kag nag-untat sa pagpanabako, kag wala na nagahimo sing poligamya.

Ang isa sa mga namati sa mensahe sang Biblia nga ginpaambit ni Pablo amo si Celeste Rosario. “Sang 17 anyos  ako,” siling ni Celeste, “ang pakaisa sang akon iloy nga si Negro Jiménez, katapo anay sang isa ka grupo nga gindumalahan ni Pablo González. Ginbisitahan niya ang amon pamilya kag ginbasahan sang pila ka teksto sa Biblia, gani nagdesisyon ako nga maghalin sa Iglesia Katolika. Indi namon maintiendihan ang ginabasa sa simbahan kay Latin ang ginagamit nga lenguahe. Wala madugay, ginbisitahan kami kag ginpalig-on ni Pablo González. Nagsiling sia: ‘Indi kita bahin sang bisan ano nga relihion, pero may mga kauturan kita sa bilog nga kalibutan. Wala pa kita kabalo kon sin-o sila ukon kon ano ang tawag sa ila, pero makilala naton sila sa pila ka adlaw.’”

Nagporma sing mga grupo sang mga estudyante sa Biblia si Pablo sa Los Cacaos Salcedo, Monte Adentro, Salcedo, kag Villa Tenares. Sang 1948, sang nanaug sia sa Santiago agod magsaylo sa iban nga bus, nakita niya ang pila ka Saksi nga nagabantala sa dalan, kag ginhatagan nila sia sing Watchtower. Sa isa pa niya ka pagbiyahe, ginhatagan sia sang isa ka sister sing duha ka libro kag gin-agda nga magtambong sa Memoryal sang kamatayon sang Cristo sa Santiago. Nagdayaw gid sia sa iya nabatian sa Memoryal kag nakahinakop nga nasapwan niya ang  kamatuoran kag ang tumalambong amo ang mga tawo nga madugay na nga gusto niya makilala.

Ginbisitahan sang mga misyonero ang mga ginatun-an ni Pablo. Sa isa ka tilipunan nga ginakadtuan niya, malipayon nga nagahulat sa ila ang 27 ka tawo. Ang pila sini sa ila naglakat sing 25 kilometros; ang iban nagsakay sa kabayo sing 50 kilometros! Sa isa pa ka tilipunan, 78 ang nagtipon, kag 69 sa isa pa gid ka tilipunan.

Ginhatagan ni Pablo ang mga misyonero sang listahan sang mga 150 ka interesado. Ining mapainubuson kag mahunahunaon sa espirituwal nga mga tawo nagatuon na sa Biblia kag nagaaplikar sang mga prinsipio sini. Kinahanglan lang sila organisahon kag giyahan. “Ang mga misyonero nagbisita sa amon, kag naghiwat kami sing miting,” siling ni Celeste. “May ginhimo nga kahimusan para sa bawtismo. Ako ang una nga nabawtismuhan sa amon pamilya. Sang ulihi, nabawtismuhan man ang akon iloy nga si Fidelia Jiménez kag ang akon manghod nga si Carmen.”

Ang una nga sirkito nga asembleya sa Dominican Republic nga ginhiwat sa Santiago sang Septiembre 23-25, 1949, nakabulig sa pag-uswag sang pagbantala. Madamo nga interesado ang nagkadto, kag naglab-ot sa 260 ang nagtambong sa pamulongpulong publiko sang Domingo, kag 28 ang nabawtismuhan. Ang tatlo ka adlaw nga asembleya nagkumbinsi sa mga bag-uhan nga amo ini ang organisasyon nga ginagamit sang Dios agod matuman ang iya kabubut-on.