Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Mahimo Arestuhon

Mahimo Arestuhon

‘Mainandamon Subong sang mga Man-ug kag Indi Malimbungon Subong sang mga Salampati’

Importante nga padayon nga makabaton sing espirituwal nga pagkaon ang matutom nga mga alagad ni Jehova sa tion sang pagdumili. Pero makatalagam gid ang paghimo sini sa sina nga tion kay madamo nga kauturan ang gin-aresto kag pila ka beses nga ginsentensiahan sang pagkabilanggo.

“Sang natun-an ko ang kamatuoran sang 1953,” siling ni Juanita Borges, “nahangpan ko nga bilang isa sang mga Saksi ni Jehova, mahimo ako arestuhon. Kag amo gid sina ang natabo. Sang Nobiembre 1958, sang nagbisita ako kay Sister Eneida Suárez, nag-abot ang mga pulis kag gin-akusar kami nga nagahiwat sing miting. Ginsentensiahan kami nga mabilanggo sing tatlo ka bulan, kag ginmultahan sing tig-100 pesos [Dominican pesos]—katumbas sadto sa $100 (U.S.).”

Ang mga pulis may detalyado nga listahan parte sa aton mga kauturan.

Gintinguhaan gid sang gobierno nga pauntaton ang mga Saksi sa ila pagtilipon, pero wala gid naluyahan ang mga kauturan. Apang, dapat sila mangin ‘mainandamon subong sang mga man-ug kag indi malimbungon subong sang mga salampati.’ (Mat. 10:16) Si Andrea Almánzar nagsiling: “Kon magtambong kami sa mga  miting, wala kami nagadululungan sa pag-abot. Dayon, gab-i na kami nagapauli kay indi tingob ang amon paglakat para indi kami pagsuspetsahan.”

Si Jeremías Glass, nga natawo sang ang iya amay nga si León nabilanggo, nangin manugbantala sang 1957 sang pito pa lang sia ka tuig. Nadumduman niya ang sekreto nga mga miting nga ginhiwat sa ila balay kag ang mga ginhimo para indi sila madakpan. “Ang tanan nga tumalambong ginhatagan sing gamay nga cardboard nga may numero agod mahibaluan ang pagpasunod kon sin-o ang malakat,” siling ni Jeremías. “Kon matapos na ang miting, ginapabantay ako sang akon amay sa puertahan agod tan-awon ang mga numero sa mga cardboard kag hambalon ang malakat nga dapat tagduhaduha sila kag lainlain ang ila agyan.”

Ginaiskedyul namon ang mga miting sa alang-alang nga mga oras para indi kami madakpan. Halimbawa, si Mercedes García nakatuon sing kamatuoran sa iya tiyo nga si Pablo González. Sang pito pa lang sia ka tuig, napatay ang iya iloy samtang sa prisuhan ang iya amay, kag sila na lang nga pulo ka mag-utod ang nabilin. Nabawtismuhan sia sang 1959 sang siam pa lang sia ka tuig. Para indi sila madakpan, ginhatag ang pamulongpulong sa bawtismo sang 3:30 a.m. sa balay sang isa ka brother. Dayon ginhimo ang pagbawtismo sa Ozama River, nga ara sa kapital sang pungsod. Si Mercedes nagsiling, “Nagpauli kami mga 5:30 a.m. nga amo pa lang ang pagbugtaw sang mga tawo sa amon lugar.”