Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 TALALUPANGDON NGA MGA HITABO SANG NAGLIGAD NGA TUIG

Legal nga Pagpakigbato

Legal nga Pagpakigbato

ARMENIA Naghatag sang Alternatibo nga Serbisyo Para sa mga Sibilyan nga Nagatahod sa Cristianong Neutralidad

Armenia: Gin-asayn sang gobierno ang pila ka utod nga maghimo sing alternatibo nga serbisyo para sa mga sibilyan sa nabaw-ing nga mga bahin sang pungsod. Ginpadayon nila didto ang pagbantala sing makugi

Sang 2013, ginsugdan sang gobierno sang Armenia ang programa nga alternatibo nga serbisyo para sa mga sibilyan. Paagi sini, makapili na ang mga Saksi ni Jehova didto sing alternatibo nga serbisyo sa baylo nga prisuhon tungod sa pagpangindi sa pagsoldado bangod sa konsiensia. Sang Enero 2014, ginreport sang sanga nga 71 ka brother ang nagserbisyo sa sining bag-o nga programa. Halimbawa, ang pila ka  brother gin-asayn nga kusinero ukon asistant sang mga nars sa ospital. Positibo gid ang komento sang mga superbisor sa sini nga programa parte sa paggawi kag panimuot sang mga brother bisan pa mabudlay ang ginpaobra sa ila. Nagapasalamat gid ang mga brother sa sini nga programa kay mahuptan nila ang matinlo nga konsiensia. * Ang isa ka brother nagsiling, “Nagapasalamat gid kami kay Jehova nga may alternatibo nga serbisyo para sa mga sibilyan, nga makabulig sa amon nga mahuptan ang amon neutralidad kag may kahilwayan kami sa pagsimba sa iya.”

DOMINICAN REPUBLIC Legal nga Ginkilala ang Una nga Kasal nga Ginhimo sang mga Saksi

Sang 1954, nagpirma sing kasugtanan ang Dominican Republic kag Vatican nga nagahatag sing awtoridad sa Iglesia Katolika nga amo lamang ang makakasal. Kon indi ang Iglesia Katolika ang magkasal, ang isa ka opisyal sang Civil Registry amo ang magakasal. Pero sang 2010, gin-implementar sang gobierno ang bag-o nga konstitusyon nga nagapahanugot sa kalipikado nga mga representante sang iban nga relihion nga makakasal. Ginhanas sang gobierno ang mga gusto magkuha sing lisensia. Nagpili ang sanga talatapan sa Dominican Republic sang 30 ka gulang para magtambong, kag sa sobra 2,000 nga nag-aplay para sa lisensia, 32 lang ang nakakuha sini. Pero ang 30 naton ka brother nakabaton sang ila lisensia para magkasal sa mga Saksi.

 INDIA Determinado nga Magbantala sing Wala Kahadlok

Sanday Sundeep kag Deepalakshmi Muniswamy

Sang Enero 27, 2014, nagdesisyon ang Karnataka State Human Rights Commission nga ginlapas sang Police Sub-Inspector (PSI) sang Old Hubli Police Station sa Karnataka ang kinamatarong ni Brother Sundeep Muniswamy bangod wala sia gin-amligan sang PSI sa pag-atake sang guban sang Hunyo 28, 2011. Ginpapanabat sang Commission ang PSI sa  paglapas sang kinamatarong; ginmanduan sini ang gobierno sang Karnataka nga disiplinahon ang PSI kag bayaran sing 20,000 ka rupee ($326 U.S.) si Brother Muniswamy bilang danyos. Kuhaon sang gobierno ini nga kantidad sa sueldo sang PSI.

Nagapasalamat gid kay Jehova si Brother Muniswamy kag ang iya pamilya sa sini nga desisyon kag determinado nga padayon nga magbantala sing maayong balita nga wala sing kahadlok. Nagpalig-on man ini sa pagtuo sang mga kauturan kag sa ila pagsalig sa ikasarang ni Jehova sa pag-amlig sa iya katawhan. Ginapakita man sini sa mga awtoridad nga dapat nila amligan ang kinamatarong sang mga Saksi ni Jehova sa Karnataka. Ang ginpasaka nga kaso batok kay Brother Muniswamy kag sa isa pa ka brother, nga may labot sa sini nga hitabo, naka-pending pa sa korte.

KYRGYZSTAN Ginsakdag sang Constitutional Chamber of the Supreme Court ang Kinamatarong sang mga Nagapangindi nga Magsoldado Bangod sa Konsiensia

Makalilipay gid nga adlaw ang Nobiembre 19, 2013, para sa mga nangindi sa pagsoldado bangod sa konsiensia. Nagdesisyon ang Constitutional Chamber of the Supreme Court pabor sa kaso sang 11 ka Saksi ni Jehova kag gintamod nila ang programa sang Kyrgyzstan nga alternatibo nga serbisyo nga batok sa kasuguan. Ginapatuman sang kasuguan sa mga sibilyan nga indi magsoldado nga magbayad sing kuarta sa militar para suportahan ang mga hilikuton sini. Ginapatuman man sang kasuguan nga magpalista sila bilang reserba sang militar kon matapos na ang ila alternatibo nga serbisyo. Suno sa Constitutional Chamber isa ini ka paglapas sa kinamatarong sa kahilwayan sa pagpili sang relihion nga piliton ang mga nagapangindi sa pagsoldado bangod sa konsiensia nga maghimo sing alternatibo nga serbisyo. Gani sang una nga mga bulan sang 2014, gintuman sang Korte Suprema sang  Kyrgyzstan ang desisyon sang Constitutional Chamber kag gin-absuwelto ang 14 ka Saksi ni Jehova nga ginpamatbatan anay sang kasuguan. Ining paborable nga mga desisyon nagtapos sa pito ka tuig nga pagpakig-away agod matigayon ang kinamatarong sa kahilwayan sa pagpili sang relihion bangod sa konsiensia. Bangod sa determinasyon sining mahidaiton nga pamatan-on nga mga lalaki napakabalaan ang ngalan ni Jehova kag nahuptan ang aton kahilwayan sa pagsimba sa Kyrgyz Republic.

Kyrgyzstan: Mga Saksi nga nakalab-ot ang ila kaso sa pinakamataas nga korte sang Kyrgyzstan

NIGERIA “Ginpadyaan Ako ni Jehova”

Sa Abia State sa Nigeria, ang mga Saksi ni Jehova masami nga ginapahog kag ginapakalain bangod wala sila nagaentra sa lokal nga organisasyon * sang komunidad nga sa masami masingki  kag nadalahig sa espiritismo ang ila hilikuton. Isa ka aga sang Nobiembre 2005, ginsulod sang mga miembro sang asosasyon sa Asaga Ohafia ang balay ni Brother Emmanuel Ogwo kag sang iya asawa kag ginpanguha ang ila tanan nga pagkabutang bilang bayad sa asosasyon. Ang nabilin lang sa mag-asawa amo ang ila bayo nga ginasuksok. Sang 2006, ginpahalin sila sa komunidad. Nagdangop sila sa isa ka brother sa lain nga minuro kag gin-atipan sila. Bisan pa nagbalik si Brother Ogwo sa ila balay pagkasunod nga tuig, padayon sia gihapon nga ginapilit nga mag-entra sa asosasyon, kag wala na ginbalik ang iya mga pagkabutang.

Sang ulihi, sang Abril 15, 2014, ang Abia State High Court nagdesisyon pabor kay Brother Ogwo, nga nagasuporta sang iya kinamatarong sa kahilwayan sa pagpili sang kaupdanan kag relihion. Ginbalik kay Brother Ogwo ang mga pagkabutang nga ginkuha sa iya, naghaganhagan na ang pagpakalain sang mga tawo sa mga Saksi, kag makabantala na sing hilway ang mga kauturan sa Asaga Ohafia.

Sang ginpahibalo ang desisyon sang korte, si Brother Ogwo nagsiling: “Nagtumbo ako sa tuman nga kalipay. Para sa akon, si Jehova ang nagdaug sa kaso kag ang mga anghel kaupod ko. Ginpadyaan ako ni Jehova.”

RUSYA Nagdesisyon Pabor sa jw.org

Ang madamo nga kaso batok sa aton mga kauturan sa Rusya “nagresulta sa pag-uswag sang maayong balita” sa sina nga pungsod. (Fil. 1:12) Bisan pa ang pila ka opisyal sang gobierno kag mga lider sang relihion mabaskog nga nagapamatok sa aton pagsimba, ginahuptan sang aton mga kauturan sa Rusya ang ila integridad, kag ginapakamaayo gid ni Jehova ang ila mga panikasog.

Ang isa ka pamatuod sini amo ang legal nga kadalag-an sa siudad sang Tver’. Sang 2013, nagpasaka sing kaso sa lokal nga korte ang piskal sang Tver’ para dumilian ang jw.org sa  bilog nga Rusya. Wala ginpahibalo sini ang mga Saksi ni Jehova, kag nagdesisyon ang korte pabor sa piskal. Sang nahibaluan sang aton mga kauturan ang desisyon, nag-apelar sila. Sang Enero 22, 2014, ginbag-o sang Tver’ Regional Court ang desisyon sang lokal nga korte, kag pabor na ini sa mga Saksi. Nagapasalamat gid kita kay Jehova kag sa pangamuyo sang aton mga kauturan sa bilog nga kalibutan kay ang kalabanan sang aton mga kauturan sa Rusya hilway na nga makabukas sang jw.org kag makabenepisyo sa espirituwal.

TURKEY Padayon nga Ginasikway ang Kinamatarong sang mga Nagapangindi nga Magsoldado Bangod sa Konsiensia

Si Bariş Görmez, nga isa ka Saksi ni Jehova sa Turkey, napriso sing sobra apat ka tuig bangod nangindi sia nga magsoldado. Sang gin-aresto sia, ginsipa sia sang mga pulis kag ginhanot sang batuta. Nag-antos man sia sa prisuhan. Bangod pito ka pie si Brother Görmez, indi sia kaigo sa iya katre gani nagabarikutot sia nga nagabalabag sa duha ka katre kon magtulog. Sang ulihi, gintugutan sia nga magtulog sa daku nga kutson nga ginhatag sa iya sang kongregasyon.

Sang 2008, nag-apelar sa European Court of Human Rights si Brother Görmez kag ang tatlo pa ka Saksi kay ginlapas sang Turkey ang ila kinamatarong nga mangindi sa pagsoldado bangod sa konsiensia. Sang Hunyo 3, 2014, nagdesisyon ang Korte pabor sa apat ka Saksi * kag ginpabayad ang gobierno sang Turkey sang danyos sa mga kauturan. Ikatlo na ini nga tion nga nagdesisyon ang European Court pabor sa mga Saksi ni Jehova sa Turkey. Bisan pa wala na subong sing Saksi ni Jehova nga napriso sa Turkey, padayon gihapon ini nga isyu tubtob kilalahon na sang Turkey ang kinamatarong nga mangindi sa pagsoldado bangod sa konsiensia.

 Update sang Nagligad nga Report

Azerbaijan: Padayon gihapon nga gina-raid sang mga pulis ang mga miting, ginadumilian ang mga literatura, ginaaresto ang mga kauturan samtang nagabantala, kag iban pa nga paglapas sang kinamatarong. Wala gihapon nagpasugot ang gobierno nga irehistro liwat ang Religious Community of Jehovah’s Witnesses. Disinuebe ka kaso ang ginpasaka sa European Court of Human Rights batok sa Azerbaijan parte sa sini nga mga isyu. Bisan pa sang mga kabudlayan, ginapakamaayo gid sila ni Jehova kay padayon nga nagadamo ang ila mga manugbantala, kag nalipay gid sila sang ginpagua ang kompleto nga Bag-ong Kalibutan nga Badbad sang Balaan nga Kasulatan sa Azerbaijani.

Eritrea: Padayon nga nagaalagad kay Jehova sing matutom ang mga kauturan diri bisan pa ginahingabot. Ang tatlo ka brother nga sanday Paulos Eyassu, Isaac Mogos, kag Negede Teklemariam napriso sing 20 ka tuig na karon—sugod sang Septiembre 24, 1994. Gin-aresto sang awtoridad sa Eritrea ang mga 150 ka Saksi kag interesado nga nagtambong sa Memoryal sang kamatayon sang Cristo sang Abril 14, 2014. Lakip sa mga gin-aresto nagaedad pa lang sing isa ka tuig kag apat ka bulan kag ang iban sobra 85 anyos. Mga 30 pa ka Saksi kag interesado ang gin-aresto sang awtoridad sa tion sang pinasahi nga pamulongpulong sang Abril 27, 2014. Ang kalabanan sa ila ginpagua na.

Kazakhstan: Wala gintugutan sang Agency for Religious Affairs ang 14 naton ka publikasyon nga ipasulod ukon ipanagtag sa bilog nga Kazakhstan. Makapaambit lang ang aton mga utod sang ila mga pagpati sa sulod lang sang ila narehistro nga tilipunan sa pagsimba, kag mga 50 ka utod ang ginsumbong nga ilegal nga mga misyonero. Para pangapinan ang kahilwayan sa paghambal, 26 ka kaso ang ginpasaka sa United Nations Human Rights Committee.

^ par. 1 Depende sa konsiensia sang isa kon batunon niya ang alternatibo nga serbisyo para sa mga sibilyan.

^ par. 1 Ang lokal nga organisasyon ginatapuan sang mga tawo nga nagaistar sa isa lang ka minuro, kag masami mga lalaki ang miembro sini.

^ par. 2 Buldu and Others v. Turkey, No. 14017/08, Hunyo 3, 2014.

Magtuon sing Dugang Pa

Ngaa Nagapabilin nga Neutral sa Pulitika ang mga Saksi ni Jehova?

Makatalagam bala sila sa seguridad sang pungsod?