Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Kinahanglan ang Dugang nga mga Manugbantala

Kinahanglan ang Dugang nga mga Manugbantala

Ang Maayong Balita Nakalab-ot sa Nabaw-ing nga mga Lugar

Madamo pa nga misyonero ang nag-abot, lakip sanday Pete Paschal, Amos kag Barbara Parker, Richard kag Belva Stoddard nga nag-alagad sa Bolivia, kag Jesse kag Lynn Cantwell nga halin sa Colombia. Nakabulig ang mga misyonero nga mag-uswag pa gid ang pagbantala nga hilikuton. Sang 1973, daku na ang nahimo nga pagtudlo parte sa Biblia sa mga banwa kag siudad sa Dominican Republic, pero ang maayong balita wala pa nakalab-ot sa nabaw-ing nga mga lugar. Gani, naghimo sing mga kahimusan para matatap ang espirituwal nga mga kinahanglanon sang mga tawo sa sini nga mga lugar. Nagpangabay sing mga boluntaryo agod magbantala sing duha ka bulan sa mga uma, kag 19 ka regular payunir ang nagboluntaryo. Sugod sang Disiembre 1973 asta Enero 1977, gin-asayn ang mga grupo sang payunir sa mga lugar nga wala pa mabantalaan.

“Ginabayluhan nila ang mga publikasyon sing mga manok, itlog, kag prutas”

Ang isa ka payunir nga nakigbahin sa sining pinasahi nga hilikuton nagsiling: “Pagkatapos sang isa ka adlaw nga mapaambit ang mensahe sang Biblia kag mahatagan sing mga literatura ang mga tawo, ginabalikan namon ang mga interesado. Bangod wala sila sing kuarta, ginabayluhan nila ang mga publikasyon sing mga manok, itlog, kag prutas. Salamat kay Jehova, wala gid kami nagutuman.” Madamo ang bag-o pa lang nakabasa sing Biblia. Ang iban naman ginhambalan sang ila lider sang relihion nga si Jehova amo ang Yawa. Nakibot  gid sila sang nabasa nila ang mga teksto sa Biblia pareho sang Salmo 83:18: “Ikaw, nga ang ngalan amo si Jehova, ikaw lamang ang Labing Mataas sa bug-os nga duta”! Sa iban nga lugar madamo gid sing interesado amo nga naghiwat sing mga miting sa publiko.

Dugang Pa nga Misyonero kag Bag-o nga Sanga

Sang Septiembre 1979, nag-abot ang mag-asawa nga misyonero nga sanday Abigail kag Georgina Pérez. Gin-asayn sila nga mag-alagad sa sirkito. Sang 1987, ang mga naggradwar sa Gilead nga sanday Tom kag Shirley Dean nagbulig agod mag-uswag pa gid ang hilikuton. Daku man ang nabulig sang mga ara sa pinasahi nga bug-os tion nga pag-alagad halin sa Puerto Rico. Sang Agosto 1988, sanday Reiner kag Jeanne Thompson gin-asayn sa Dominican Republic, ang ila ikalima nga asaynment subong misyonero.

Sang 1989, ang aberids nga kadamuon sang manugbantala nakalab-ot sa 11,081, kag posible gid ang pag-uswag bangod 20,494 ang ginreport nga pagtuon sa Biblia. Pero nangin hangkat ini nga pag-uswag. Halimbawa, ang sanga talatapan sa sina nga tion daku ang nabulig agod matatap ang hilikuton, pero sang mga ulihi nga bahin sang katuigan 1980, kinahanglan na sang dugang nga pasilidad. “Gutok na kami,” siling ni Reiner Thompson, “amo nga nangita kami sing mga dalayunan kag bodega sa bilog nga siudad.”

“Mabudlay mangita sing lote para sa bag-o nga sanga,” siling pa ni Reiner. “Sang nahibaluan sang isa ka negosyante nga nagapangita kami sang lote, ginkontak niya kami. Nagsiling sia nga may ibaligya sia nga lote, pero sa mga Saksi ni Jehova lang. Sang una, may daku sia nga  negosyo sang talahian, kag ang iya sekretarya kag pila ka empleyado mga Saksi ni Jehova. Nagdayaw gid sia sa ila pagkabunayag kag pagkamatinahuron. Bangod nanamian gid sia sa mga Saksi ni Jehova, barato lang ang iya baligya sang lote.” Ginbakal ang lote sang Disiembre 1988, kag tatlo pa ka kaingod nga lote ang ginbakal sang ulihi. Sa kabilugan, mga siam ka ektarya ang sanga kag ang tupad nga Assembly Hall.

Ginatos ka boluntaryo nga ang iban naghalin pa sa iban nga pungsod ang nagbulig sa pagpatindog sang bag-o nga sanga kag Assembly Hall. Gindedikar ang mga pasilidad sang Nobiembre 1996 sang nag-abot sanday Carey Barber, Theodore Jaracz, kag Gerrit Lösch sang Nagadumala nga Hubon, kag nakigbahin sa dedikasyon. Pagkasunod nga adlaw, ginhiwat ang pinasahi nga mga programa sa duha ka dalagku nga istadyum sang pungsod, kag sobra 10,000 ang nag-tour sa bag-o nga mga pasilidad sang sanga.

‘Pagtabok sa Macedonia’

Indi kompleto ang kasaysayan sang katawhan ni Jehova sa Dominican Republic kon indi pag-ilakip ang madamo nga Saksi nga nagsaylo sa pungsod agod mag-alagad sa mga lugar nga mas daku ang kinahanglanon. Bangod napalig-on sa mga report nga madamo sing interesado nga magtuon sa Biblia sa sini nga pungsod, madamo ang nagsaylo diri sang ulihi nga bahin sang katuigan 1980 nga daw pareho nga ‘nagtabok sa Macedonia.’ (Binu. 16:9) Ginpaambit sini nga mga boluntaryo ang ila kalipay nga naeksperiensiahan sa pagpangani nga hilikuton sa Dominican Republic. Bangod sini, madamo pa gid ang nagsaylo sa pungsod sang katuigan 1990.

Halimbawa sanday Stevan kag Miriam Norager nga taga-Denmark, nag-alagad sa Dominican Republic sugod  sang 2001. Antes sini, si Miriam upod ang iya magulang nga babayi nag-alagad na diri sa sulod sang isa ka tuig kag tunga. Ano ang nagpahulag sa sini nga mag-asawa nga magsaylo sa malayo nga lugar nga lain ang kultura kag lenguahe? “Mga matutom sa espirituwal ang amon mga pamilya kag mga espesyal payunir ang amon mga ginikanan sang bataon pa sila,” siling ni Miriam, “kag nagregular payunir sang may bata na sila. Pirme kami ginapalig-on sang amon mga ginikanan nga ihatag ang amon bug-os nga masarangan para kay Jehova subong bug-os tion nga alagad.”

Sanday Stevan kag Miriam nangin espesyal payunir sugod sang 2006 kag madamo ang ila nabuligan nga makatuon sing kamatuoran. “Madamo sing pagpakamaayo,” siling ni Stevan. “Bisan pa may mga kabudlayan ukon problema sa panglawas, balewala ini kon ipaanggid sa  amon matahom nga mga eksperiensia kag sa amon kalipay sa pagbulig sa sinsero nga mga tawo nga makilala kag mahigugma si Jehova. Nagdamo man ang amon mga abyan. Ang pag-alagad sa Dominican Republic nakabulig sa amon nga mangin mapainubuson kag mapinasensiahon, kag ang paghupot sing simple nga kabuhi nagpabakod sang amon pagtuo kag pagsalig kay Jehova.”

Si Jennifer Joy nagaalagad diri sing sobra na 20 ka tuig kag nagabulig sa teritoryo sang sign language

Si Jennifer Joy isa sa mga sister nga dalaga halin sa iban nga pungsod nga nagabantala sa Dominican Republic. Sang 1992, sang ginbisitahan niya ang iya tiya nga si Edith White nga madugay na nga misyonera, maayo ang iya mga eksperiensia sa ministeryo. Nakilala man niya ang iban nga sister halin sa iban nga pungsod nga nagaalagad  sa mga lugar nga mas daku ang kinahanglanon. “Mahuluy-on ako kag kulang sing kompiansa,” siling ni Jennifer. “Pero nahunahuna ko, ‘Kon masarangan nila, siguro masarangan ko man.’”

Sang primero, isa lang ka tuig ang plano ni Jennifer nga magtener sa Dominican Republic, pero subong, sobra na 20 ka tuig nga nagaalagad sia diri. Madamo sa iya ginatun-an sa Biblia ang nabuligan niya nga mangin alagad ni Jehova. Nagbulig man sia sa pag-uswag sang sign language sa sini nga pungsod kag sa paghanda sang mga leksion para sa mga language class.

‘Wala gid ako ginpabay-an ni Jehova halin sang una, gani sigurado gid nga indi niya ako pagpabay-an sa masunod nga tuig’

Paano ginasuportahan ni Jennifer ang iya kaugalingon? “Nagapauli ako sa Canada kada tuig para magtrabaho sing pila ka bulan,” siling niya. “Lainlain ang akon trabaho, pareho sang photography, pagpaminta sang mga balay, pagpaninlo sang mga opisina, paghimo sang mga headlight kag karpet. Nangin tour guide man ako, travel agent, interpreter, kag nagtudlo sing Ingles.” Ginpaanggid ni Jennifer ang iya kahimtangan sa mga Israelinhon sa kamingawan. “Nagkabuhi sila sa tagsa ka pulong nga nagagua sa baba ni Jehova,” siling niya. “Nagsiling sia nga indi niya pagpabay-an ang mga Israelinhon, kag amo gid sini ang iya ginhimo. Ginaamanan niya sila sing pagkaon kada adlaw, kag wala man magdaan ang ila mga bayo kag mga sandalyas. (Deut. 8:3-4) Nagsaad man si Jehova nga indi niya kita pagpabay-an. (Mat. 6:33) Wala gid niya ako ginpabay-an halin sang una, gani sigurado gid nga indi niya ako pagpabay-an sa masunod nga tuig.”

Nakalab-ot sa 1,000 ka ebanghelisador ang nagsaylo diri halin sa lainlain nga lugar pareho sang Austria,  Estados Unidos, Japan, Poland, Puerto Rico, Rusya, Spain, Sweden, kag Taiwan. Ang mga boluntaryo halin sa 30 ka pungsod nagbulig sa American Sign Language (ASL), Chinese, Haitian Creole, Ingles, Italian, Russian, kag Spanish nga mga kongregasyon. Kaangay ni apostol Pedro, nagsiling sila: “Ginbiyaan namon ang tanan kag nagsunod sa imo.”—Mar. 10:28.