Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 PAGBANTALA KAG PAGPANUDLO SA BUG-OS NGA DUTA

Kadutaan sa Amerika

Kadutaan sa Amerika
  • PUNGSOD 57

  • POPULASYON 980,780,095

  • MANUGBANTALA 4,034,693

  • PAGTUON SA BIBLIA 4,339,285

Ang mga Ilo Nagatambong sa mga Miting

Si Angela, nga nagaistar sa Suriname, nagduaw sa balay-alaypan malapit sa ila puluy-an. Ang nagadumala sa balay-alaypan isa ka sister nga di-aktibo, gani nagpasugot sia gilayon nga bantalaan ni Angela ang kabataan. Ginpanaksihan ni Angela ang 85 ka kabataan kag ginpatan-aw sa ila ang mga video sa jw.org. Madamo sa ila ang nasugdan niya sa pagtuon sa Biblia.  Duha ka payunir ang nagbuylog, kag ang kada isa may ginadumalahan nga grupo. Ang sister nga di-aktibo nagsiling nga ginatudluan niya ang kabataan sing mga kanta sa aton libro sang ambahanon kag ginabasahan sila sing mga sugilanon sa Biblia kon gab-i. Gusto niya magtambong sa mga miting, pero indi niya mabiyaan ang 85 ka kabataan sa balay-alaypan. Gani naghimo sing kahimusan para tanan sila makakadto sa Kingdom Hall. Bangod malapit lang ang Kingdom Hall, ginbuligan sila sang mga utod pakadto sa tilipunan. Karon regular na nga nagatambong sa mga miting ang sister kag ang 85 ka kabataan.

Gintun-an ni Gabriel ang Iya Lolo

Paraguay: Ginaistorya ni Gabriel ang iya lolo

Samtang nagapauli halin sa kombension sa Paraguay, ginpamensar sang anom ka tuig nga si Gabriel nga importante nga ibantala ang mensahe sang Ginharian. Nahunahuna niya dayon ang iya lolo nga gusto niya makaupod sa Paraiso. Pero indi interesado sa kamatuoran ang iya lolo kag ginapamatukan sini ang iya asawa kag kabataan nga mga Saksi.

Sa sina man nga adlaw, nangabay si Gabriel sa iya mga ginikanan nga mag-video call sa iya lolo kag lola nga nagaistar sa Argentina. Ginpaathag niya sa iya lolo kon ngaa importante nga magtuon sa Biblia kag ginpamangkot ini sing direkta, “Lolo, gusto mo matuon kita?” Nagpasugot ang iya lolo. Nagsiling si Gabriel nga tun-an nila ang brosyur nga Pamatii ang Dios Agod Magkabuhi Ka sing Walay Katapusan. Sa sulod sang pila ka bulan, gintun-an nila ang brosyur. Bangod nabudlayan sila nga duha sa pagbasa, nagapraktis sila anay. Sa kada pagtuon, ginahandaan sing maayo ni Gabriel ang ila pagatun-an kag nagabayo sia sing pormal kag nagakurbata.

 Sang ulihi, nagbisita sa ila ang iya lolo kag lola sa sulod sang pila ka semana. Sa tion sang ila pagbisita, nagtambong ang iya lolo sa mga miting sa kongregasyon upod sa iya pamilya. Sang nagbalik ang lolo ni Gabriel sa Argentina, ginpadayon niya ang pagtuon upod sa lokal nga brother kag padayon nga nag-uswag tubtob nangin di-bawtismado nga manugbantala. Karon updanay na sa pagpangamuyo kada adlaw ang lolo kag lola ni Gabriel. Si Gabriel padayon man nga nag-uswag. Isa naman sia ka di-bawtismado nga manugbantala. Ginpabutyag sang iya lolo ang iya handum nga simbuluhan ang iya dedikasyon kay Jehova paagi sa pagpabawtismo.

“Wala Lang Natabuan ang Imo Pagbisita”

Sa Brazil, samtang nagapanagtag sing tract nga Mabuhi Pa Bala Liwat ang mga Patay?, si Jennifer nanuktok sa balay sang isa ka babayi nga nagadali bangod makumpanyar sia sa lubong sang iya suod nga abyan. Ginsilingan sia ni  Jennifer nga may ihatag lang sia nga tract nga nagabinagbinag parte sa paglaum nga makita naton liwat ang aton napatay nga hinigugma. Nakibot ang babayi sa tig-ulo sang tract, pero ginbaton niya ini. Sang ginpamangkot sia kon gusto niya magdala sing ekstra nga tract para ihatag sa pamilya sang iya abyan, naghunahuna ang babayi nga maayo ina nga ideya, gani nangayo sia sing siam pa ka tract.

Sang ulihi, ginduaw liwat ni Jennifer ang babayi, nga nagsiling sa iya: “Sang nagkilalahay kita, narealisar ko sang ulihi nga wala lang natabuan ang imo pagbisita. Ginpadala ka sang Dios agod ipaambit ang makapaumpaw nga mensahe nga kinahanglan ko gid sa sina nga tion.” Napanagtag niya ang tanan nga tract. Samtang nagahatag sing sermon sa patay ang miembro sang pamilya, ginbasa niya ang bug-os nga tract. Nagustuhan ini sang tanan kag ginpasalamatan nila ang babayi bangod sa makapaumpaw nga mensahe. Ginbaton sang babayi ang pagtuon sa Biblia.

Pagpanaksi sa Tap-Tap

Tatlo ka Bethelite sa Haiti ang nagsakay sa matahom nga pangpubliko nga salakyan nga ginatawag tap-tap. Sa ila duha ka oras kag tunga nga pagbiyahe, ginpaambit nila sa iban nga pasahero ang parte sa Ginharian, kag nakapahamtang sila sing 50 ka magasin kag 30 ka tract. Ang isa sa mga Bethelite nga si Gurvitch, nagbasa sing isa ka bahin sang Magmata! nga magasin sa isa ka pasahero. Nabatian ini sang isa ka pamatan-on nga si Pépé, kag nakigbahin sia sa paghinun-anon. Nangabay sia sing pagtuon sa Biblia, kag natabuan nga nagaistar sia sa lugar nga teritoryo sang kongregasyon nga ginapakig-angutan ni Gurvitch. Sugod sang Enero 2014 sang una sia nga napanaksihan, halos natambungan ni Pépé ang tanan nga miting kag asembleya. Ginapaambit niya sa iban ang iya bag-o nga pagtuluuhan kag nagalaum nga mangin di-bawtismado nga manugbantala sa ulihi.