Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

Sang Nagligad nga Isa ka Gatos ka Tuig—1915

Sang Nagligad nga Isa ka Gatos ka Tuig—1915

 “TION karon sang pagtilaw,” siling sang Marso 1, 1915 nga The Watch Tower. “Nangin makugi bala kita sang una bangod lamang nagalaum kita sang pagbag-o nga matabo sa A.D. 1914, ukon bangod sa aton gugma kag pagkamainunungon sa GINUO kag sa Iya Mensahe kag sa mga kauturan!” Sang 1915, ang pila ka Estudyante sang Biblia nakigbato sa kapaslawan. Pero, tuhay ang ginpakigbatuan sang kalabanan sa kalibutan.

Ang Daku nga Inaway, nga sang ulihi gintawag nga Bug-os Kalibutan nga Inaway I, naghil-ob sa Europa. Bangod sa moderno nga kagamitan sa inaway madamo nga sibilyan ang napatay. Halimbawa, sang 1915, ang mga submarino sang Germany, ukon U-boat, nagsugod sa paglibot sa kadagatan sang Great Britain. Sang Mayo 7, 1915, ginlunod sang isa sa sini nga mga U-boat ang depasahero nga barko sang Britanya nga Lusitania. Sobra 1,100 ka tawo ang napatay.

Ang Isyu sang Neutralidad

Ang mga Estudyante sang Biblia wala nakigbahin sa sini nga inaway. Pero, wala pa nila mahangpan sing maayo sadto ang tindog sang mga Cristiano parte sa neutralidad. Bisan pa wala sila nag-entra sa militar, nagpasugot ang iban nga magserbisyo sa militar basta indi lang mag-entra sa inaway. Pero kon mabutang sa alang-alang, ang iban sa ila nagasiling nga mapalupok na lang sa hangin.

Mabasa sa Hulyo 15, 1915 nga The Watch Tower ang kasaysayan sang isa ka soldado sang Hungary nga nabawtismuhan samtang nagapaayo sang iya pilas kag sang ulihi nagbalik sa inaway. Ang kasaysayan nagsiling: “Mga 243 metros na lang ang distansia nila [mga soldado sang Hungary] sa mga soldado sang Rusya sang ginmanduan sila nga gamiton ang bayoneta. Ang brother nga taga-Hungary ara sa pinakapunta sa wala nayon. Bangod gusto  lang niya amligan ang iya kaugalingon sa kaaway, ginaagaw niya ang bayoneta sang soldado sang Rusya. Kag amo man sini ang gintinguhaan nga himuon sang soldado sang Rusya . . . Ginbuy-an sang taga-Rusya ang iya bayoneta kag naghibi. Nakita sang brother ang ‘Krus kag Korona’ nga nakasibit sa iya uniporme! Isa man gali ka utod sa Ginuo ang soldado sang Rusya!” *

Ang artikulo nga “Cristianong Katungdanan kag ang Inaway,” nga ginbalhag sang Septiembre 1, 1915 nga The Watch Tower nagbinagbinag parte sa Cristianong neutralidad. Nagsiling ini: “Ginabaton mo kag ginakilala ang mga katungdanan kag obligasyon sang isa ka soldado kon mangin miembro ka sang militar kag magsuksok sang ila uniporme. . . . Indi gid nagakaigo nga mag-entra ang isa ka Cristiano sa soldado.” Sang ulihi, nahangpan na sing maayo sang mga Cristiano nga indi sila dapat makigbahin sa inaway.

Mga Pagbag-o sa Ulong Talatapan

Sang 1915, 70 ka miembro sang pamilya Bethel sa New York ang gin-asayn sa latagon bangod kulang sa pundo. Ginsilingan sila: “Indi kita dapat mangutang ukon ibutang sa katalagman ang hilikuton; gani kinahanglan kita magkinot.”

Si Clayton J. Woodworth kag ang duha pa ka brother nagpirma sang sulat halin sa “Setenta nga Mahalin.” Ini nga sulat ginbalhag sa Mayo 1, 1915 nga The Watch Tower. Ginsambit sang mga mahalin nga “nalipay sila kag nagapasalamat sa madamo nga pagpakamaayo kag pribilehiyo” nga ila nabaton “bilang mga miembro sang ‘Pamilya Bethel.’”

 Bisan pa mabudlay ina nga pagbag-o, naghatag ini sing kahigayunan sa sina nga mga utod nga ipakita ang ila pagkamainunungon. Magapabilin bala sila nga matutom sa Dios ukon maluyahan sing buot? Si Brother Woodworth nagpadayon sa pagbantala, sang ulihi nagbalik sia sa Bethel, kag sang 1919 nangin una sia nga editor sang The Golden Age, ang magasin nga ginatawag karon nga Magmata! Nangin editor sia sini tubtob sang 1946.

Mga Kahigayunan sa Pag-alagad

Sa sinang mabudlay nga tuig, ginpalig-on sang The Watch Tower ang aton mga kauturan nga magpadayon sa pagbantala. Ginhatagan sing pinasahi nga igtalupangod ang mga indibiduwal nga nagpakita sang interes sadto. “May mga listahan kami sang mga tawo halin sa bug-os nga pungsod nga nagapangabay sing literatura,” siling sang Disiembre 15, 1915 nga gua. “Ginapanugda namon nga bisitahan sila . . . basi kon nadula ang ila interes.” Ang tulumuron amo nga palambuon pa gid ang ila interes—ang ila kakugi sa Dios kag sa Kamatuoran.

Pareho sang una, importante man subong nga huptan sang mga Cristiano nga nakapokus sila sa intereses sang Ginharian. “Kita nga nagamata subong dapat mangin aktibo pa gid kag mapagsik sa pag-alagad sa Dios,” siling sang Pebrero 15, 1915 nga The Watch Tower. Dapat magpabilin nga alisto ang mga alagad sang Dios. Ang The Watch Tower nagpadayon: “Dapat kita magbantay. Ano ang dapat naton bantayan? Labi sa tanan dapat naton bantayan ang aton kaugalingon, agod makalikaw kita sa mga siod sa aton tion.”

Ang tuigan nga teksto sang 1916 nagpalig-on sa mga kauturan nga magpabilin nga ‘mabakod sa pagtuo,’ suno sa Roma 4:20. Ini nga teksto magapalig-on sa mga matutom sa nagapakari nga tuig, ang tuig nga madamo sing pagtilaw.

^ par. 4 Sa sulod sang pila ka tuig, ang mga Estudyante sang Biblia nagasibit sa ila bayo sang krus kag korona agod makilala sila. Ini nga simbulo makita sa kober sang The Watch Tower sa sulod sang madamo nga tuig. Sang maaga nga bahin sang katuigan 1930, gin-untat na ini nga gamiton sang mga Saksi ni Jehova.