Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Ang Iglesia Katolika kag si Trujillo

Ang Iglesia Katolika kag si Trujillo

ANO ang relasyon ni Trujillo sa Iglesia Katolika? Ang manug-analisar sang pulitika nagsiling: “Sa sulod sang malawig nga paggahom ni Trujillo, 1930-1961, nagabuligay ang Simbahan kag estado sang Dominican Republic; ginapaboran sang diktador ang Simbahan, gani ginasuportahan sini ang iya paggahom.”

Sang 1954, nagkadto si Trujillo sa Roma kag nagpirma sing kasugtanan upod sa Papa. Ang ginasaligan anay ni Trujillo nga si Germán Ornes, nagsulat: “Bangod pabor kay Trujillo ang Simbahan sang Dominican Republic, nangin daku [ini] nga suporta para sa ‘Pangulo’ [si Trujillo]. Ang klero, nga ginapangunahan sang mga arsobispo nga sanday Ricardo Pittini kag Octavio Beras, amo ang panguna nga nagasuporta sa panguluhan.”

“Kon may kahigayunan,” siling ni Ornes, “ang Papa nagapadala sing panamyaw kay Trujillo. . . . Sang 1956 nga Congress  of Catholic Culture, nga ginhiwat sa Ciudad Trujillo nga gin-isponsoran [ni Trujillo], nagpadala sing tinagipusuon nga mensahe ang Papa paagi sa iya pinasahi nga tiglawas nga si Francis Cardinal Spellman. Si Cardinal Spellman nagbiyahe halin sa New York kag malipayon nga gin-abiabi sang Generalissimo [si Trujillo]. Pagkasunod nga adlaw, ang ila paghaksanay makita sa una nga pahina sang tanan nga pamantalaan sang Dominican Republic.”

Sang 1960, ang Time nga magasin nagreport: “Asta subong, maayo gihapon ang relasyon ni Trujillo kag sang simbahan. Si Arsobispo Ricardo Pittini, ang Primate of the Americas, 83 anyos na karon kag bulag, pero sang nagligad nga apat ka tuig nagsulat sia sa New York Times nga nagadayaw kay Trujillo kag nagsiling nga ‘ining “diktador” ginahigugma kag ginapadunggan sang iya mga sakop.’”

Pero, pagligad sang tatlo ka dekada nga mainunungon nga pagsuporta sa mapintas nga paggahom ni Trujillo, nagbalhin ang pagtamod sang Iglesia Katolika sang nagbag-o ang kahimtangan sa pulitika. “Sang nagadamo na ang nagapamatok sa diktador,” siling sang manug-analisar, “kag sang ulihi, sang gintinguhaan nga himuon nga demokrasya ang pungsod, ang Simbahan, nga madugay na nga may maayo nga relasyon kay Trujillo, napilitan nga bag-uhon ang ila pagtamod.”

Sang ulihi sang 2011, ang Simbahan napilitan nga mangayo sing pasaylo sa mga taga-Dominican Republic. Ang isa ka sulat sang mga pari nga mabasa sa pamantalaan nga Dominican Today nagsiling: ‘Ginaako namon ang amon mga sala kag indi kami tampad sa amon pagtuo, propesyon, kag mga responsibilidad. Gani, nagapangayo kami sing pasaylo kag nagapangabay sing paghangop kag pasensia sang tanan nga taga-Dominican Republic.’