Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Ginbilanggo kag Gindumilian

Ginbilanggo kag Gindumilian

Ginbilanggo Bangod sa Neutralidad

Si Enrique Glass kag ang ginprisuhan sa iya sa sulod sang duha ka semana

Sang Hunyo 19, 1949, ang grupo sang tinapok nga mga taga-Dominican Republic nagbalik sa pungsod agod pahalinon ang diktador nga si Rafael Trujillo. Pero wala sila nagmadinalag-on. Ginpabilanggo ni Trujillo ang mga nangindi  sa pagserbisyo sa militar, subong man ang bisan sin-o nga ginkabig sang gobierno nga kaaway. Ang pila sa una nga mga Saksi nga nabilanggo bangod nangindi sa pagserbisyo sa militar amo sanday León, Enrique, kag Rafael Glass, lakip ang pila ka Saksi nga kaupod sa trabaho ni León.

“Gin-aresto [ako kag ang akon mga kaupod sa trabaho] kag gin-interogar sang mga secret agent sang militar,” siling ni León. “Sa tapos nga ginpahog, ginbuy-an kami. Pero pagligad sang pila ka adlaw, basta na lang nga ginpatawag kami para magserbisyo sa militar. Bangod nangindi kami, gindala kami sa prisuhan. May  apat ka Saksi nga nabilanggo didto, kag ang duha sa ila akon mga utod. Sang nahilway kami, ginsentensiahan kami liwat. Tatlo ka beses ini nga natabo, kag isa ukon pila lang ka adlaw prisuhon naman kami liwat. Mga pito ka tuig tanan nga nabilanggo kami, nga ang pinakaulihi lima ka tuig.”

‘Bisan pa ginalatigo kami ukon ginabakol sang mga kahoy kag riple, nabatas namon ini bangod si Jehova nagahatag sa amon sing kusog’

Padayon nga ginatilawan ang mga kauturan paagi sa pagbilanggo sa ila. Adlaw kag gab-i nga ginayaguta sila sang mga priso kag guardia. Ang kumander sang Fort Ozama, diin una sila nga nabilanggo, nagsiling: “Mga Saksi ni Jehova, kon mangin saksi na kamo sang Yawa, hambalon n’yo ’ko kay pagguaon ko kamo.” Pero, indi mapaluya sang mga manugpamatok ang integridad sadtong mga matutom nga kauturan. Si León nagpaathag: ‘Pirme kami ginahatagan sing kusog ni Jehova agod makabatas kag nabatyagan gid namon ang Iya bulig. Bisan pa ginalatigo kami ukon ginabakol sang mga kahoy kag riple, nabatas namon ini bangod si Jehova nagahatag sa amon sing kusog.’

Gindumilian ang mga Saksi ni Jehova

Sa bisan diin nga bahin sang pungsod, ginapabaskog sang kaaway sang matuod nga pagsimba ang ila paghingabot. Bisan pa sini, sang Mayo 1950, may 238 ka manugbantala sa Dominican Republic, magluwas sa mga misyonero. Beinte-uno sa sini nga manugbantala ang bug-os tion nga mga payunir.

Ang pamantalaan nga nagapahibalo sang sentensia sang aton mga kauturan bangod sa neutralidad

Sa sina nga tion, ang isa ka secret agent nagsulat sa Presidential Secretary, nga nagasiling: “Ang mga miembro sang relihioso nga sekta nga mga Saksi ni Jehova padayon nga nagahimo sang ila mga hilikuton sa tanan nga  sektor sini nga siudad [Ciudad Trujillo].” Nagdugang pa sia: “Ginasulit ko nga dapat bantayan gid ang mga Saksi ni Jehova, bangod ang ila pagbantala kag mga ginahimo nagapatalang sa hunahuna sang publiko, ilabi na sang ordinaryo nga mga tawo.”

Ang Secretary of the Interior and Police, nga si J. Antonio Hungría, nangabay kay Brother Brandt nga maghimo sing sulat nga nagapaathag sang tindog sang mga Saksi parte sa pagserbisyo sa militar, pagsaludo sa bandera, kag pagbayad sing mga buhis. Gani naghimo sing sulat si Brother Brandt nga gingamit ang impormasyon halin sa libro nga “Pakamatuura ang Dios.” Bisan pa sini, sang Hunyo 21, 1950, si Secretary Hungría nagpagua sing mando nga nagadumili sa hilikuton sang mga Saksi ni Jehova sa Dominican Republic. Ginpatawag si Brother Brandt sa opisina ni Hungría agod mabatian sing personal ang mando. Namangkot si Brother Brandt kon kinahanglan maghalin sa pungsod ang mga misyonero.  Ginpasalig sia ni Hungría nga makapabilin sila sa pungsod basta tumanon lang nila ang kasuguan kag indi magsugid sa iban parte sa ila relihion. *

^ par. 1 Mga pila ka semana antes napagua ang mando, ang Katoliko nga mga pari nagsulat sing malaba nga mga artikulo sa pamantalaan nga nagapakamalaut sa mga Saksi ni Jehova kag sayop nga nagakabig sa ila nga mga komunista.