Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 PAGBANTALA KAG PAGPANUDLO SA BUG-OS NGA DUTA

Europa

Europa
  • PUNGSOD 47

  • POPULASYON 741,311,996

  • MANUGBANTALA 1,611,036

  • PAGTUON SA BIBLIA 847,343

Nagbisita sa Kingdom Hall ang mga Estudyante

Finland: Nagbisita sa Kingdom Hall ang Grade IV nga mga estudyante

Nahibaluan ni Ines, nga estudyante sa Grade IV sa Finland, nga binagbinagon sang ila klase ang parte sa mga Saksi ni Jehova subong bahin sa pagtudlo sa ila sa relihion. Gani, gin-agda niya sila sa pagkadto sa Kingdom Hall. Maayo gid ina nga ideya para sa mga estudyante kag manunudlo.

Pagkasunod nga semana, 38 ka estudyante ang nagbisikleta sing mga apat ka kilometro pakadto  sa Kingdom Hall. Nagkadto man ang duha ka maestra kag ang prinsipal. Duha ka brother kag tatlo ka sister ang nag-abiabi sa ila sa Kingdom Hall. Samtang naga-merienda, namangkot ang mga estudyante parte sa tilipunan kag sa mga Saksi: “Ano ang ginahimo n’yo sa inyo mga miting?” “Para sa ano ina nga kuarto?” Ginatudlo nila ang librarya. “Ngaa may ‘six divided by ten’ sa dingding?” Ginatudlo nila ang tuigan nga teksto nga Mateo 6:10.

Bangod ang eskwelahan nagapakigbahin sa proyekto para matapna ang pagpangdaugdaug sa eskwelahan, ginpatan-aw sa ila sang mga utod ang whiteboard animation nga video nga Dauga ang Nagapangdaugdaug, sa jw.org. Ginpakita man sa ila ang iban nga seksion sa aton Web site kag ginpabati sa ila ang isa ka ambahanon sang Ginharian. Mga isa ka oras ang ila pagbisita sa Kingdom Hall.

Nanamian gid sa ila pagbisita ang prinsipal, mga maestra, kag kabataan. Interesado ang prinsipal sa mga impormasyon nga makita sa aton Web site bangod mahimo ini gamiton sa mga leksion parte sa relihion. Nalipay man sia kay puede makabisita ang iban nga klase sa Kingdom Hall. Gani pagkasunod nga adlaw, ginkontak sang isa ka maestra sa lain nga klase ang mga Saksi kag namangkot kon puede man sila makabisita sa Kingdom Hall.

Nakasapo Sia sing Bahandi sa Halabuyan sang Basura

Si Cristina, nga nagaistar sa Romania, wala gid nakatapak sa eskwelahan kag indi makahibalo magbasa ukon magsulat. Pigado gid sia kag ang iya obra nagapangita sing mga lata kag plastik nga botelya sa halabuyan sang basura sang siudad. Isa ka adlaw samtang nagapangukay sia sang basura, may nakita sia nga isa ka literatura nga  pasad sa Biblia nga may mga piktyur sang malipayon nga mga tawo. Nagsiling sia sa iya kaugalingon, ‘Sigurado nga may amo gid sini nga mga tawo sa kalibutan.’ Gusto gid niya mahibaluan ang kaundan sang publikasyon, gani ginpabasa niya ini sa iban. Sang nahibaluan niya nga may topiko parte sa relihion ang publikasyon, nasubuan sia kay ginhaboy lang sang mga tawo sa basurahan  ang parte sa Pulong sang Dios. Padayon sia nga nagapangita sa basurahan sing mga brosyur, tract, kag magasin. Ang iban sa nakita niya kompleto pa, pero ang iban gision na. Nagtuon sia sa pagbasa agod mahibaluan niya ang dugang pa parte sa mga publikasyon.

Sang ulihi, naistorya si Cristina sang mga Saksi, kag nasugdan ang pagtuon sa Biblia. Nalipay gid sia nga mahibaluan nga ginbuyok sia ni Jehova paagi sa mga publikasyon nga wala gin-apresyar sang iban nga tawo. Nagtambong sia sa mga miting kag natandog gid sia sa iya natun-an. Nalipay gid sia kay bag-o na ang iya mga magasin, libro, kag brosyur. Indi na sia kinahanglan mangukay sa basurahan. Nakasapo gid si Cristina sing bahandi sa halabuyan sang basura!

Pagtuon sa Biblia sa “Kagulangan”

Germany: Si Margret nagadumala sing pagtuon sa Biblia sa kagulangan

Kada aga, ginaupod ni Margret ang iya ido sa paglakatlakat sa kagulangan sa Germany. “Ginaistorya ko ang mga nagalabay,” siling ni Margret. “Kon relaks sila, direkta ko nga ginaistorya ang parte sa Biblia.”

Isa ka adlaw nakilala niya ang isa ka babayi nga mga setentahon ang edad nga nagalakat man upod ang iya ido. Si Margret ang una nga nagpalapit sa babayi. Manami ang ila pag-istoryahanay kag ginsilingan niya si Margret nga nagapangamuyo sia sa Dios kag nagabasa sing Biblia kada adlaw. Sugod sadto, nagakit-anay sila kada adlaw kag ginaistoryahan nila ang espirituwal nga mga butang. Isa ka bes ginpamangkot sang babayi si Margret: “Ngaa madamo ka sang nahibaluan sa Biblia?” Ginpaathag ni Margret nga isa sia sa mga Saksi ni Jehova.

Pila ka beses nga gintanyagan sia ni Margret sing pagtuon sa Biblia sa puluy-an, pero nangindi sia. Bisan  pa sini, nagpadayon ang ila pag-istoryahanay. Pila ka bulan sang ulihi, gintanyagan sia liwat ni Margret sing pagtuon sa Biblia. Sa sini nga tion ginsugid sang babayi nga nahadlok sia magtuon sa Biblia kay ang ginapuyopuyo niya nga lalaki indi gusto sa mga Saksi ni Jehova.

Sang nagkadto liwat si Margret sa kagulangan, nagdala sia sing Biblia kag libro nga Ginatudlo sang Biblia. Sang nakita niya ang babayi, si Margret nagsiling: “Sini nga tion indi ta ka pagtanyagan sing pagtuon sa Biblia sa puluy-an kundi sing pagtuon sa Biblia sa ‘kagulangan.’” Ginbaton dayon ini sang babayi, nga nagatulo ang luha sa iya mga mata. Nagahiwat sila sing pagtuon sa Biblia sa “kagulangan” anom ka beses kada semana. Kon kaisa bangod sa panahon, kinahanglan maggamit sing payong kag flashlight si Margret kon maghiwat sing pagtuon sa Biblia.

Sala nga Pag-intiende sa Paglungolungo

Ang utod nga babayi nga si Delphine nagahiwat sing pagtuon sa Biblia kay Irina sa Bulgaria. Ginaapresyar ni Irina ang iya mga natun-an kag regular nga nagatambong sa mga miting. Pero indi gusto sang iya bana nga makig-angot sia sa mga Saksi. Nagsaylo sila sa gamay nga minuro sa Sweden, kag wala na sing komunikasyon si Irina kay Delphine. Pero nakilala sang duha ka payunir nga sanday Alexandra kag Rebecca si Irina, nga indi makahibalo maghambal sing Swedish. Gingamit sang mga payunir ang bukleta nga Good News for People of All Nations kag ginpabasa kay Irina ang mensahe sa Bulgarian. Dayon, paagi man sa bukleta, ginpamangkot nila sia kon luyag niya sing literatura sa iya lenguahe. Naglungolungo si Irina. Naglakat ang mga payunir, nga naghunahuna nga indi interesado si Irina.

 Sang ulihi, nadumduman ni Alexandra nga may maabot pila na lang ka semana nga isa ka sister nga si Linda nga taga-Sweden nga nagaalagad sa Bulgaria. Naghunahuna si Alexandra nga basi magbag-o ang reaksion ni Irina kon mabatian niya ang kamatuoran sa iya kaugalingon nga lenguahe. Pag-abot ni Linda, ginkadtuan nila ni Alexandra si Irina. Ginsilingan ni Irina si Linda nga nagapangamuyo sia kada gab-i kay Jehova nga buligan sia nga mapadayon ang iya pagtuon sa Biblia. Pirme niya ginadala ang iya Bulgarian nga Ginatudlo sang Biblia nga libro, kay basi pa lang may makita sia nga mga Saksi sa dalan, pero wala gid sia sing nakita. Nalipay gid si Irina nga nakabaton sia sing dugang nga literatura sa Bulgarian!

Ginpamangkot ni Linda si Alexandra kon ngaa nakasiling sia nga indi interesado si Irina sang una nila ini nga naistorya. Ginpaathag ni Alexandra nga naglungolungo si Irina, gani abi nila indi sia interesado. Nagyuhum si Linda kag ginpaathag nga ang mga taga-Bulgaria nagatango kon wala sila nagaugyon, kag nagalungolungo naman kon nagaugyon sila. Samtang indi pa makahibalo si Irina sing Swedish, padayon sia nga nagtuon sa Biblia nga ginagamit ang Bulgarian nga lenguahe. Paano? Nagtuon sila liwat ni Delphine paagi sa videoconference.

Ang Maayo nga Halimbawa sang Amay

Si Jemima, nga nagaistar sa Spain, gintudluan sang kamatuoran sang bata pa sia. Pero sang pito ka tuig sia, nagdesisyon ang iya iloy nga mauntat na sa pagka-Saksi ni Jehova kag gindiborsiohan ang iya amay. Sang 13 anyos sia, nag-untat si Jemima sa pagpakig-upod sa mga Saksi kag indi na niya gusto nga buligan sia sang iya amay sa espirituwal.

 Samtang nagadaku si Jemima, nag-entra sia sa mga hublag sang pulitika kag katilingban para hatagan sing “hustisya” ang ordinaryo nga mga tawo. Sang ulihi, sang wala na sia sing obra, gintanyagan sia sang iya amay nga si Domingo nga mag-upod sa iya obra sa pagpaminta.

Isa ka adlaw, samtang nagaobra sila, gintanyagan ni Domingo si Jemima sang pagtuon sa Biblia. Nangindi sia, pero ginsilingan niya ang iya amay nga pahibaluon niya lang ini kon gusto na niya. Samtang nagapaminta, nagapamati si Domingo sang mga rekording sang Biblia kag magasin, pero ang iya bata nagapamati sang pop music sa iya earphone.

Sang Nobiembre 2012, si Domingo, nga nangasawa liwat, nakabaton sing imbitasyon para mag-eskwela sa Bible School for Christian Couples. Nagdayaw gid si Jemima sa desisyon sang iya amay nga mag-eskwela sang duha ka bulan kag handa nga biyaan ang tanan kag magkadto kon diin sia ipadala. Narealisar ni Jemima nga nakapanggamot gid sing madalom ang kamatuoran sa tagipusuon sang iya amay, kag gusto niya hibaluon kon ngaa.

Gin-untatan ni Jemima ang pagpamati sa iya paborito nga musika kag namati na sa mga rekording nga ginapamatian sang iya amay. Nagapamangkot naman sia. Isa ka adlaw, samtang nagapaminta si Domingo, nagsiling si Jemima: “Indi bala nagsiling ako sa imo nga pahibaluon ko lang ikaw kon gusto ko na magtuon sa Biblia? Ti, gusto ko na magtuon sa Biblia.”

Nalipay gid si Domingo. Sang Enero 2013, ginsugdan nila ang pagtuon duha ka beses kada semana. Nagsugod ang klase ni Domingo sang Abril, gani ginpadayon nila ang pagtuon paagi sa videoconference. Nagtambong si Jemima sa gradwasyon, kag nanamian gid sia sa programa. Sang Disiembre 14, 2013, nabawtismuhan si Jemima.

 “Mapinasensiahon gid si Jehova, kag wala niya ako ginpabay-an,” siling ni Jemima. “Ginhatagan niya ako sang matuod nga mga abyan, nga wala ko gid makita sa kalibutan. Bangod sa bug-os kalibutan nga paghiliutod, labi ko nga napabaloran ang daku nga gugma ni Jehova.”

Ang Gahom sang Pagrespeto

Si Vasilii madugay na nga miembro sang pamilya Bethel sa Rusya. Sang Marso 30, 2014, samtang nagapanaksi sia nga nagagamit sang literature cart malapit sa sanga talatapan, nag-abot ang salakyan sang pulis. Nanaug ang isa ka pulis kag matinahuron nga ginpahalin si Vasilii bangod nagareklamo ang pila sang ila kaingod. Gin-video ini sang isa pa ka pulis. Nagtuman si Vasilii sa pulis kag wala na nagbais bisan pa may kinamatarong sia. Nakita ini sang pila nga nagalabay. Naghalin si Vasilii, pero pagligad sang duha ka adlaw nangabay sia nga makigkita sa hepe sang pulis. Ginpasugtan sia. Sa ila pag-istoryahanay, ginpasalamatan ni Vasilii ang hepe sa importante nga serbisyo sang mga pulis sa komunidad kag sa ila pagkamatinahuron sang gin-istorya nila sia sang nagligad nga duha ka adlaw. Nagbalikid ang hepe sa iya asistant kag nagsiling, “Sa sulod sang 32 ka tuig nga pagserbisyo ko, subong pa lang ako ginpasalamatan sa aton trabaho!” Nahangpan sang hepe nga legal ang aton pagbantala sa publiko. Ginpamangkot sang hepe si Vasilii kon ngaa wala sia nagreklamo sang ginpauntat sia sang mga pulis bisan pa nabal-an niya nga legal man ang iya hilikuton. Nagsabat si Vasilii: “Ginarespeto ko ang mga pulis. Indi gid maayo ang mangin impresyon sang mga tawo sa mga pulis kon gin-akusahan ko sila nga wala kabalo sang kasuguan.” Nagdayaw gid ang hepe kag ang iya asistant, kag ginpasalig nila si Vasilii nga hilway na sia sa paggamit sang literature cart.