Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 PAGBANTALA KAG PAGPANUDLO SA BUG-OS NGA DUTA

Asia kag Middle East

Asia kag Middle East
  • PUNGSOD 48

  • POPULASYON 4,315,759,010

  • MANUGBANTALA 703,271

  • PAGTUON SA BIBLIA 732,106

Namangkot Sia Kon Puede Kaupod ang Iban

Ang isa ka brother sa Indonesia naghatag sing imbitasyon sa Memoryal sa isa ka parking attendant duha ka adlaw antes sang okasyon. Ang attendant nga isa ka Muslim namangkot kon puede kaupod ang iban kay isa lang ang iya imbitasyon. Ang brother nagsiling nga puede man. Nagsiling ang attendant nga daku ang iya pamilya gani  nangayo sia sing dugang nga imbitasyon. Ginhatagan sia sang brother sing 20 ka imbitasyon kag ginpaathag sa iya nga ang okasyon parte sa pagsaulog sang kamatayon ni Jesus kag imbitado ang tanan, lakip ang mga Cristiano kag Muslim. Ang attendant nagsiling nga mga 60 asta 70 ka tawo ang updon niya.

Sang nagsugod ang pamulongpulong sa Memoryal, 248 na ang tumalambong. Wala madugay, nag-abot ang parking attendant upod ang mga 100 ka tawo—mga lalaki, babayi, kag kabataan, lakip ang mga tigulang kag ang isa ka babayi nga nagabusong. Nag-arkila sila sing pila ka salakyan pakadto sa hotel nga ginhiwatan sang Memoryal. Pag-abot nila, ginpunggan sila sang mga guardia sang hotel. Natingala ang mga guardia kon ngaa kadamo sang Muslim nga gusto magtambong sa pagtilipon sang mga Cristiano. Sang ginpakita nila ang ila mga imbitasyon sa Memoryal, gin-updan sila sang mga guardia pasulod sa awditoryum. Mga 60 lang ang ginpasulod bangod gutok na ang awditoryum.

Pagligad sang pila ka adlaw, ginbisitahan sang brother ang parking attendant kag ginpamangkot kon nagustuhan man nila ang programa. Nagsiling sia nga tanan sila medyo nahuya sa pagtambong, pero nagdayaw sila sa kaayo sang tanan, nga ginatamyaw kag ginapangamusta sila. Dayon gin-agda sia sang brother sa pinasahi nga pamulongpulong nga ihatag sa masunod nga Domingo. Sa sina nga tion gin-upod niya ang mga miembro sang iya pamilya kag mga kaingod, mga 40 sila tanan. Bangod manugtapos na pag-abot nila, nagdesisyon ang mga gulang nga ihatag liwat ang pamulongpulong. Ginsambit  liwat sang tsirman ang tema sang pamulongpulong, ginpaathag sing malip-ot ang programa, nag-amba sila, kag nangamuyo. Bangod mga Muslim sila, gingamit sang humalambal ang mga termino nga pamilyar sa ila pareho sang “Balaan nga Libro” sa baylo nga “Biblia” kag “propeta Isa” sa baylo nga “Jesus.”

Sang ulihi, ginduaw sang brother ang parking attendant sa ila balay kag ginsugdan ang paghinun-anon sa Biblia nga ginagamit ang brosyur nga Listen to God. Dose ang nag-upod sa ila paghinun-anon, lakip ang pila ka Muslim nga babayi kag kabataan.

Balasahon sa mga Bus

Mongolia: Gintugutan ang mga manugbantala nga magbutang sang mga literatura para sa mga pasahero

Ang mga bus halin sa Ulaanbaatar, Mongolia, nagabiyahe pakadto sa tanan nga bahin sang pungsod. Nagalawig sing 48 ka oras ang biyahe. Ang mga pasahero nagatan-aw lang sa bintana ukon nagatulog. Wala sing mga balasahon sa bus bisan pa mahilig magbasa ang mga taga-Mongolia. Bangod sini, gin-istorya sang pila ka utod sa kongregasyon sang Songinokhairkhan ang mga drayber sang bus: “May iregalo kami sa inyo nga mga libro. Sa eroplano, may ara sila pirme balasahon nga nabutang sa likod sang pulungkuan. Kon OK lang sa inyo, ibutang namon ini nga mga balasahon sa likod sang pulungkuan para mabasa sang inyo mga pasahero.” Walo ka drayber ang nagpasugot. Subong resulta, nakapahamtang ang mga utod sing 299 ka magasin kag 144 ka brosyur. Naghimo man sila sing kahimusan nga islan ang mga magasin sang bag-o nga mga gua kon matigayon na ini.

 Nasal-an nga Sister

Sa isa ka pungsod sa Asia, duha ka gulang ang gin-asayn nga magduaw sa isa ka sister nga walo na ka tuig nga di-aktibo. Bangod wala pa nila makilala ang sister, gintawgan nila ini kag naghimo sing kahimusan nga duawon sia sa iya tindahan sa isa ka daku nga merkado. Sa tapos nga makalibotlibot, nakita nila ang tindahan suno sa diskripsion nga ginhatag sang sister. Gintamyaw sila sang babayi nga may gamay nga Biblia sa iya lamesa. Sa tapos nga mapamangkot ang iya apelyido, lugar nga ginaistaran, kag edad sang iya duha ka bata, nakahinakop ang mga utod nga sia ang sister nga di-aktibo. “Mga kauturan mo kami, mga Saksi ni Jehova,” siling nila.

“Cristiano ako,” siling sang babayi nga daw natingala. Daw natingala man ang mga utod. Pero ginhatagan nila sia sing literatura, kag nalipay gid sia. Sang manuglakat na ang mga utod, narealisar nila nga sala nga tindahan ang ila nakadtuan! Ang kadtuan tani nila nga tindahan, 2202, pero 2200 ang ila nakadtuan. Ang isa sa mga utod nagsiling: “Nagpalanindog ang akon balahibo. Pamatyag ko gintuytuyan kami sang mga anghel pakadto sa tindahan. Pareho ang apelyido kag lugar nga ginaistaran sang babayi kag sang sister, kag amoamo man ang edad sang ila mga bata! Kon lain ang apelyido ukon ginaistaran sang babayi, mahibaluan tani namon dayon nga indi sia ang sister.” Duha lang ka tindahan ang bal-ot, nakita gid man  nila ang sister nga di-aktibo nga nagahulat sa ila pagduaw.

“Nagapasalamat gid ako kay bisan pa madugay ako nga di-aktibo, wala gid ako nalipatan ni Jehova”

Bangod nasal-an ang pagduaw sa babayi, nagtuon sia sa Biblia kag nagtambong sa mga miting. Ang sister nga di-aktibo nagatambong na sa mga miting kag regular nga nagapakigbahin sa ministeryo. Nagsiling sia, “Nagapasalamat gid ako kay bisan pa madugay ako nga di-aktibo, wala gid ako nalipatan ni Jehova.”

Pag-text Kon Malain ang Panahon

Pilipinas: Si Greg nga naga-text

Sanday Greg kag Alma nagsaylo sa isla sang Catanduanes sa Pilipinas agod mag-alagad sa lugar nga kinahanglan ang dugang nga manugbantala sang Ginharian. Mga kabukiran ang pila sang ila teritoryo, gani nagalakat sanday Greg kag Alma sing 19 kilometros para malab-ot ini nga mga teritoryo. Kon kaisa, nagabaruto sila sing duha ka oras para magbantala sa iban nga mga isla. Pero kon tingulan, mabudlay gid ang pagpanakayon. Sa baylo nga magtener lang sa balay kag wala sing himuon, ginahingalitan nila ang unlimited text nga promo sang kompanya sang cell phone para makapanaksi.

Si Greg nagsiling nga nagasugod sia paagi sa pag-text sang iya ngalan. Dayon nagadugang sia, “Luyag ko ipaambit sa imo ang mensahe halin sa Biblia.” Ang isa sa mga teksto nga nakita niya nga epektibo amo ang Juan 17:3. Sa tapos makutlo ini, nagapautwas sia sing duha ka pamangkot: Sin-o ang matuod nga Dios? kag Sin-o si Jesucristo? Dayon ginapasabat niya ang iya ka-text. Kon magreply, ginapaambit ni Greg ang dugang nga teksto, pareho sang Salmo 83:18. Kon sigesige ang reply, ginapamangkot niya ang iya ka-text kon puede sia matawgan para padayunon ang ila pag-istoryahanay. Madamo ang nagpasugot siling nanday Greg kag Alma.

 Ang isa ka babayi nga nakontak nanday Greg kag Alma madamo sing pamangkot parte sa Biblia, gani dugay ang ila teksanay. Sang ulihi, nagresulta ini sa pagtuon sa Biblia. Ginpaambit sang babayi ang iya natun-an sa iya hinablos nga lalaki kag sa iya kaupod sa trabaho. Sang ulihi, nabawtismuhan sila nga tatlo.