Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 PAGBANTALA KAG PAGPANUDLO SA BUG-OS NGA DUTA

Aprika

Aprika
  • PUNGSOD 58

  • POPULASYON 994,839,242

  • MANUGBANTALA 1,421,375

  • PAGTUON SA BIBLIA 3,516,524

Ginsundan Nila ang Ila Manunudlo

Si José isa ka pamatan-on nga payunir nga nagaistar sa dulunan sang Luanda, Angola. Isa sia ka manunudlo sa isa ka eskwelahan nga malapit sa Kingdom Hall. Bangod sang iya Cristianong mga kinaiya kag maayo sia nga manunudlo, ginapalangga kag ginatahod sia sang iya 86 ka estudyante. Alas kuatro sang hapon ang midweek sa ila kongregasyon, gani ginatugutan sia nga maghalin sing  temprano kon tion sang ila midweek. Pagkatapos sang trabaho, nagadiretso sia dayon sa Kingdom Hall.

Natingala ang iban nga estudyante kon ngaa temprano pa nagahalin si José kag kon diin sia nagakadto. Isa ka adlaw, para mahibaluan nila kon diin sia nagakadto, ginsundan sia sang duha niya ka estudyante kag nagtambong sila sa miting. Sang ulihi, tatlo pa ka estudyante ang nagtambong sa miting sang may bahin si José sa Miting sa Serbisyo. Nahibaluan man ini sang iban nga estudyante sa ila klase. Pagkasunod nga mga semana, ang 5 ka estudyante nga nagatambong sa miting nangin 21. Gintanyagan sila sang mga manugbantala sa Kingdom Hall sing pagtuon sa Biblia, kag ginbaton ini sang kalabanan sa ila. Sang nagdala ang mga estudyante sing pila ka publikasyon sa eskwelahan, nangin interesado ang iban kag nagtambong sa mga miting. Pagsira sang klase, 54 sa 86 ka estudyante ni José ang nakatambong sa miting. Nagsiling si José nga 23 sa iya mga estudyante ang nagauswag sa espirituwal kag padayon nga nagatambong sa mga miting.

Gamay ang Teritoryo?

Nigeria: Sanday Joseph kag Evezi nagagamit sing DVD player sa ila ministeryo

Sang nag-abot ang mga espesyal payunir nga sanday Joseph kag Evezi sa ila bag-o nga asaynment sa Nigeria, ang pila ka manugbantala nga naluyahan nagsiling sa ila: “Gamay lang ang amon teritoryo. Ginasulitsulit lang namon.” Pagligad sang isa ka tuig, nagsulat si Joseph sa sanga: “Adlaw-adlaw kami nagabantala sa amon teritoryo kag madamo ang nagapakanubo kag wala nagapamati sa amon. Nagadala kami sing DVD player sa amon ministeryo agod ipatan-aw ang mga video sa mga kabataan,  pamatan-on, kag adulto. Ang resulta: Kada bulan, 18 ka pagtuon sa Biblia ang amon ginadumalahan sang akon asawa, kag kon kaisa indi na namon makadtuan ang tanan namon nga estudyante sa Biblia. Pirme man nagapangabay ang mga bata nga ipatan-aw sa ila ang mga ‘video ni Caleb.’”

Nangayo sing Bulig ang mga Taga-Isla

Congo (Kinshasa): Nagapanaksi sa isa ka mangingisda

Sang Abril 2014, ang sanga talatapan sa Congo (Kinshasa) nakabaton sing sulat halin sa isa ka grupo sang  mangingisda nga nagaistar sa Ibinja Island sa Lake Kivu. Ini nga mga mangingisda pirme nagakadto sa mga siudad para magnegosyo. Isa ka bes, sang nagbiyahe sila pakadto sa siudad sang Bukavu, nakilala nila ang mga Saksi ni Jehova. Ginpaambit sang mga Saksi ang maayong balita sa ila kag ginhatagan sila sing Biblia kag pila ka literatura.

Naapresyar gid sang mga mangingisda ang ila nabasahan kag ginpaambit nila sa iban nga taga-isla ang ila natun-an. Bangod madamo ang interesado, nagbalik ang isa ka mangingisda sa Bukavu agod pangitaon ang mga Saksi para pakadtuon sa Ibinja. Sang indi niya makita ang mga Saksi, nagsulat sia sa sanga talatapan: “Palihug, padal-i kami sang mga Saksi para buligan kami nga matun-an ang Biblia pareho sa ila kag mahibaluan namon kon paano mabuhi sing dayon. Handa kami nga abiabihon sila. Handa ako nga itanyag ang akon lote para patindugan sang simbahan. Nahibaluan namon sa mga teksto sa Biblia halin sa inyo mga libro nga butig ang ginatudlo sa amon sang mga pari kag pastor. Kumbinsido kami nga nasapwan na namon ang matuod nga relihion. Madamo diri sa Ibinja ang gusto magtuon sa Biblia kag mangin Saksi ni Jehova.”

Nasambit sa sulat nga mga 40 ang interesado sa isla. Sobra 18,000 ang pumuluyo sa isla pero wala sing mga Saksi. Gani nagpadala gilayon ang sanga talatapan sing duha ka espesyal payunir nga nakahibalo sang ila lenguahe.

Namati Na ang Pastor

“Indi na gid ako mag-absent sa Memoryal.” Amo ini ang ginsiling sang isa ka pastor sang Protestante sa South Africa. Ano ang nagpahulag sa sini nga lider sang relihion nga tambungan ang Memoryal sang Abril 2014?  Nag-umpisa ini sang ang duha ka utod nga lainlain sing rasa nagbantala kag nanuktok sa iya balay. Napamensar nila nga indi magpakig-istorya ang pastor sa ila bangod sa naeksperiensiahan nila sadto. Si Adaine, isa sa mga utod, nagpaathag kon ano ang natabo: “Nakibot gid kami kay ginbuksan niya ang puertahan kag ginpasulod kami. Madugay ang amon pag-istoryahanay. Nagadayaw gid sia nga makita nga nagabantala ang puti sa komunidad sang mga itom kag makahambal sang iya lenguahe. Nasugdan ang regular nga pagtuon sa Biblia sa pastor.”

Si Adaine nagpadayon: “Ini nga tawo nangin misyonero kag pastor sa sobra 40 na ka tuig, pero nasapwan lang niya ang tanan nga sabat sang iya mga pamangkot sang 80 anyos na sia. Nanamian sia sa libro nga Iluga ang Ila Pagtuo. Kon magtuon kami, ginasaulo niya ang pila ka punto nga iya natun-an kag ginagamit ini sa iya sermon sa ila simbahan. Ginpakita niya sa iya mga miembro ang libro nga Ano Gid ang Ginatudlo sang Biblia? Ginsilingan niya sila, ‘Kon ang mga Saksi ni Jehova magkadto sa inyo balay dala ini nga libro, pasudla sila kag mamati sa ila isiling kay ini nga libro puno sang espirituwal nga mga bahandi.’”

Ginsugiran sang pastor si Adaine nga gin-akigan sia sang mga lider sang ila simbahan kag ginpaandaman nga indi pag-ilakip ang mga Saksi ni Jehova sa iya mga sermon. Indi sia makahibalo sang iya himuon. Nadumduman ni Adaine ang kasaysayan sang isa ka pari sa Myanmar, nga mabasa sa 2013 Tuigan nga Libro sang mga Saksi ni Jehova. Sang ginbasa ini ni Adaine sa pastor, nagsiling ang pastor: “Daw pareho gid kami! Kinahanglan nga magdesisyon na ako subong.”

 Nagtambong ang pastor sa iya una nga Memoryal sang Abril 14, 2014, kag nagsiling nga indi na sia mag-absent sa Memoryal. Determinado gid sia nga biyaan ang butig nga relihion.

Pagpangita sa mga Plantasyon sang Kakaw

Ghana: Sanday Baffour kag Aaron nagapanaksi sa plantasyon sang kakaw

Sanday Baffour kag Aaron nagaalagad bilang mga espesyal payunir sa Bokabo, isa ka rehiyon sa nakatundan sang Ghana nga madamo sing kakaw. Malapad ang ila teritoryo kag madamo sing gagmay nga balay. Pero para makadtuan ini, kinahanglan ka manuhotsuhot sa mga plantasyon sang kakaw. Dali lang magtalang ang isa kon magsala sia sa iya agyan. Isa ka adlaw, sa baylo nga mag-agi sa amo gihapon nga alagyan, lain ang gin-agyan nanday Baffour kag Aaron, kag nakalab-ot sila sa mga balay nga wala pa nila makadtuan. Nakilala nila didto ang mag-asawa nga sanday Michael kag Patience, nga interesado sa ila mensahe kag gusto magtuon sa Biblia. Sang ulihi, ginsilingan sila ni Michael: “Duha na ka tuig nga wala kami nagakadto sa amon simbahan kay madamo kami sing nakita nga wala nahisuno sa ginatudlo sang Biblia. Sugod sadto, kami na lang ni Patience ang nagatuon sang Biblia kada gab-i, kag nagapangita sang mga sabat sa amon mga pamangkot. Pirme kami nagapangamuyo nga buligan nga masapwan ang kamatuoran.” Bisan pa malayo ang ila lakton kag maagi sa mga plantasyon, nagtambong sila gilayon sa mga miting. Wala matuigan, nabawtismuhan ini nga mag-asawa kag nagregular payunir. Subong, sila naman ang nagapanuhotsuhot sa mga plantasyon sang kakaw agod pangitaon ang mga “nagapangamuyo nga buligan nga masapwan ang kamatuoran.”

Sanday Michael kag Patience nagaagi sa plantasyon sang kakaw