Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2015 Tuigan nga Libro sang mga Saksi ni Jehova

 DOMINICAN REPUBLIC

Magapabilin Diri

Magapabilin Diri

Nasapwan Nila ang Kamatuoran

Si Juana Ventura nagsugod sa pagtuon samtang ginadumilian ang pagbantala, kag nabawtismuhan sia sang 1960 sa Ozama River. Isa ka bes, luyag sang pastor sa Santo Domingo nga prisuhon si Juana bangod siling sang pastor “ginaagaw [ni Juana] ang mga miembro sang iya simbahan.” Para pamatud-an nga butigon ang mga Saksi ni Jehova kag pakahuy-an si Juana, gin-agda sia sang pastor sa ila simbahan para sabton ang mga pamangkot parte sa iya bag-o nga pagtuluuhan.

“Nagpautwas sia sing tatlo ka pamangkot,” siling ni Juana, “‘Ngaa wala kamo nagaboto? Ngaa wala kamo nagaentra sa inaway? Ngaa ginatawag kamo nga mga Saksi ni Jehova?’ Samtang ginasabat ko ang kada pamangkot paagi sa Biblia, ginatan-aw sang tanan niya nga miembro ang teksto sa ila Biblia kag nakibot gid sa ila nabasahan.  Madamo sa ila ang nakarealisar nga nasapwan nila ang kamatuoran. Nagsugod sa pagtuon ang bilog nga grupo, kag sang ulihi 25 sa ila ang nagdedikar kay Jehova.” Ginpabaskog sini nga hitabo ang pagbantala nga hilikuton sa Santo Domingo.

Magapabilin Diri ang mga Saksi ni Jehova

Madamo ang malain nga natabo sa pulitika sang napatay si Trujillo. Ang 1963 Yearbook nagsiling: ‘Madamo sing soldado sa mga dalan, masingki ang palibot kag pirme lang may nagaprotesta.’ Bisan pa may kinagamo sa pulitika, nag-uswag ang pagbantala kag paghimo sing disipulo nga hilikuton, kag sang katapusan nga bahin sang 1963 nga tuig sang pag-alagad, naglab-ot sa 1,155 ang manugbantala.

Si Nathan Knorr nga halin sa ulong talatapan nagbisita sa Dominican Republic sang 1962. Naghimo sia sing kahimusan para magbakal sing lote nga patindugan sang mga pasilidad agod matatap ang madasig nga pag-uswag sang pagbantala nga hilikuton. Ginpatindog sa bag-o nga lote ang duha ka panalgan nga bilding kag isa ka Kingdom Hall. Sang Sabado, Oktubre 12, 1963, si Frederick Franz, isa pa ka bisita halin sa ulong talatapan, naghatag sing pamulongpulong para sa dedikasyon sa bag-o nga mga pasilidad. Ginapakita sini nga magapabilin ang mga Saksi ni Jehova sa Dominican Republic. Wala madugay pagkatapos sang dedikasyon, nag-abot sanday Harry kag Paquita Duffield, ang katapusan nga mga misyonero nga ginpahalin sa Cuba.

Pag-uswag Bisan Pa May Rebolusyon

Sang Abril 24, 1965, nakaeksperiensia sang rebolusyon ang pungsod. Bisan pa sa sining mabudlay nga kahimtangan, padayon nga nag-uswag sa espirituwal ang katawhan ni Jehova. Sang 1970, may 3,378 na ka manugbantala  sa 63 ka kongregasyon. Sobra katunga sa sini ang nagsulod sa organisasyon pagligad lang sang lima ka tuig. Ang 1972 Yearbook nagsiling: “Lainlain ang ila ginhalinan: Mga mekaniko, mangunguma, drayber, accountant, manunukod, panday, abogado, dentista, kag bisan gani mga pulitiko anay; tanan nabuyok bangod sa ila gugma sa kamatuoran kag kay Jehova.”