Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 TALALUPANGDON NGA MGA HITABO SANG NAGLIGAD NGA TUIG

Ang Organisasyon nga Padayon nga Nagauswag

Ang Organisasyon nga Padayon nga Nagauswag

Sang Biernes, Hulyo 5, 2013, nalipay gid ang pamilya Bethel sang Estados Unidos sa pahibalo ni Anthony Morris sang Nagadumala nga Hubon: “Sang Huebes, Hulyo 4, 2013, nahuman na ang kasugtanan sa pagbaligya sang anom ka bilding sa 117 Adams Street kag 90 Sands Street sa Brooklyn. Ang pagbaligya sang Bilding 1 asta 5 nagakahulugan nga bakantehon naton ini sa tungatunga nga bahin sang Agosto sini nga tuig.”

Si Brother Morris nagpaathag nga ang Laundry kag Dry Cleaning Department, nga ara sa ikan-om kag ikapito nga panalgan sang Bilding 3, magapabilin tubtob sa  tungatunga sang 2014. “Ang bilding sa 90 Sands Street,” siling niya, “mahimo mabakante pa sa tuig 2017.”

Ang pagbaligya sang anom ka daku nga bilding bahin sang panikasog nga sayluhon ang ulong talatapan sang mga Saksi ni Jehova halin sa New York City pakadto sa 102 ektaryas nga propiedad sa Warwick, New York. Pero, ang paghanda kag pagkutkot indi pa maumpisahan kon wala ang kinahanglanon nga mga permit.

Ang pamilya Bethel sang Estados Unidos nalangkag man sa pagpamati sa pahibalo ni Mark Sanderson sang Nagadumala nga Hubon sang Huebes, Hulyo 18, nga nagasiling: “Nalipay kami sa pagpahibalo sa inyo nga sang Mierkoles sang gab-i, Hulyo 17, gin-aprobahan sang Warwick Planning Board ang plano sang bag-o nga ulong talatapan sang mga Saksi ni Jehova. Amo na lang ini ang ginahulat agod matigayon ang mga permit para masugdan ang konstruksion. Talalupangdon nga sang gin-aprobahan ang plano kagab-i, eksakto nga apat ka tuig sugod sang nabakal ang propiedad sa Warwick. Ang maayo nga mga hitabo sang nagligad nga mga adlaw nagapamatuod gid sang pagpakamaayo ni Jehova.” Ginpasalamatan ni Brother Sanderson ang tanan sa ila kapisan kag hanuot nga pangamuyo para sa sini nga proyekto. “Labaw sa tanan,” dugang niya, “ginadayaw naton kag ginapasalamatan si Jehova sa sining importante nga hitabo sa pagsaylo sang ulong talatapan sa Warwick, New York.”

Sang Biernes, Hulyo 26, naghambal si Brother Morris sa atubang sang mga 1,000 ka boluntaryo sa Bethel kag  Regional Building Committee (RBC) nga nagatipon sa bag-o nga hulot-kalan-an sa Tuxedo, New York, lapit sa Warwick. Pagkatapos mabinagbinag ang isa ka espirituwal nga topiko, nagsiling sia nga may luyag sia ipahibalo. “Ginakaptan ko subong,” siling niya, “ang isa ka butang nga bag-o ko lang nabaton kag gusto ko ini ipaambit sa inyo. Ang ibabaw sini nga pormas nagasiling: ‘Building Permit.’” Antes pa sia makapadayon, nagpinalakpak sing matunog ang mga boluntaryo. Nagkalipay pa gid ang tanan sang ginbasa ni Brother Morris ang bahin sang una sa importante nga permit, nga gin-isyu sang banwa sang Warwick tatlo ka oras antes sini.

Mga Nagakatabo sa Wallkill, Warwick, kag Tuxedo

Sang nagsugod ang proyekto nga pasangkaron ang Wallkill sang Agosto 2009, mga 2,800 ka kauturan ang temporaryo nga nagboluntaryo. Ang proyekto nagalakip sang bag-o nga ilistaran, garahe, kag opisina. Ang isa sa mga ilistaran ginkay-o, kag may mga pagbag-o nga ginhimo sa imprintahan, awditoryum, laundry, services building, kag main lobby. Ang proyekto sa Wallkill ginapaabot nga magapadayon tubtob sa 2015.

Sa pihak nga bahin, nagsugod na ang konstruksion sang palaabuton nga ulong talatapan sa Warwick. Sugod sang nag-umpisa ang proyekto, mga pila ka bulan man ang ginhinguyang sa paglebel, pagkutkot, kag pagtakod sang mga tubo kag kable sa idalom-duta. Ang pagtukod sang una nga tatlo ka bilding, ang Vehicle Maintenance Building, Visitor Parking Garage, kag Maintenance Building, nagsugod sang talipuspusan sang 2013. Ini nga mga bilding kinahanglanon gid sa tion kag pagkatapos sang konstruksion. Ang pagtukod  sa mga ilistaran, opisina, kag services building ginaplano nga sugdan sa 2014.

Ang 20 ektaryas nga propiedad sa Tuxedo, nga mga 10 kilometros sa aminhan sang Warwick, may pasilidad “para sakdagon ang pagtukod sang palaabuton nga ulong talatapan sa Warwick,” paathag ni Kenneth Chernish, miembro sang Construction Project Committee. “Diri magadayon ang pila ka boluntaryo kag gamiton man ini sa pag-aman sang ila mga pagkaon, materyales, kag kagamitan.” Agod mapadasig ang konstruksion sa pasilidad sa Tuxedo, ang iban nga RBC sa sidlangan sang Estados Unidos ginpabulig sa pila ka bahin sang hilikuton.

Madamo nga boluntaryo sa mga RBC sa bilog nga pungsod ang nalangkag nga makabulig sa konstruksion sang palaabuton nga ulong talatapan. Madamo sang eksperto nga mga utod ang temporaryo nga nagaboluntaryo sa sini nga hilikuton. Si Leslie Blondeau, nga nagaobra sa Plumbing Department upod sa iya bana nga si Peter, nagsiling, “Updanay kami pirme sa trabaho, gani nagasuod pa gid kami sa isa kag isa, kag madamo kami sing handumanan nga indi gid namon malipatan.”

“Isa ako sa mga electrical crew diri sa Tuxedo,” siling ni Mallory Rushmore. “Kada adlaw makalilipay nga makita nga ang tanan nga boluntaryo ululupod nga nagaobra.”

“Pinasahi gid ini nga pribilehiyo,” siling ni Quincy Dotson. “Abi ko, madamo gid ako sing mahatag, pero ang matuod, mas madamo ako sing natigayon.”

“Kasadya gid nga mangin bahin sini nga proyekto,” siling ni Brother Chernish. “Ang mga kauturan diri madasig kag pulido mag-obra, pero naga-enjoy gid sila.”