Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 TALALUPANGDON NGA MGA HITABO SANG NAGLIGAD NGA TUIG

Dedikasyon sang Sanga

Dedikasyon sang Sanga

Sang Oktubre 20, 2012, ang mga Saksi ni Jehova sa Korea nalipay gid sang gindedikar kay Jehova ang ila bag-o kag ginkay-o nga mga pasilidad. Nangin espesyal ini nga okasyon bangod ang mga utod sa Korea 100 ka tuig na nga matutom nga nagaalagad. Isa pa, sang 2012, ang kadamuon sang manugbantala nagsobra sa 100,000 sa una nga tion. Mga 1,200 ka lokal nga boluntaryo kag 239 ka alagad kag boluntaryo halin sa siam ka pungsod ang nagbulig sa pagpatindog sang bag-o nga ilistaran, imprintahan, talyer, kag mga audio/video studio. Ang kalabanan nga bilding ginkay-o man.

Si Anthony Morris, miembro sang Nagadumala nga Hubon, naghatag sing makapalig-on nga pamulongpulong para sa dedikasyon kag 3,037 ang nagtambong. Pagkasunod  nga adlaw, isa ka pinasahi nga miting ang ginhiwat sa isa ka daku nga tilipunan, kag sobra 1,300 ka kongregasyon sa Korea ang nakapamati paagi sa Internet. May kabilugan nga 115,782 ka Saksi ni Jehova kag mga interesado ang nakabenepisyo sa makapalig-on nga espirituwal nga programa.

Ang Marso 9, 2013 indi gid malipatan nga petsa sa kasaysayan sang mga sumilimba ni Jehova sa Liberia. Ang mga bisita halin sa 11 ka pungsod nagtipon para sa dedikasyon sang ginkay-o kag ginpasangkad nga sanga talatapan. Ang tanan nalipay sa pamulongpulong para sa dedikasyon ni Guy Pierce sang Nagadumala nga Hubon. Pagkatapos sang sobra isa ka dekada nga inaway sibil nga nagpaatrasar sa pagplano kag konstruksion, ginpasangkad ang sanga kag ginbakal ang tupad nga propiedad nga gingamit sadto nga refugee camp kag palanaguan sang mga rebelde. Nalipay gid ang 51 ka miembro sang pamilya Bethel sa bag-o nga ilistaran nga may 35 ka kuarto, ginkay-o nga mga opisina, bag-o nga bilding para sa shipping kag maintenance, kag bag-o nga kusina kag kalan-an.

 Ang mga taga-Republic of Georgia mainabyanon kag interesado sa espirituwal nga butang. Pagkatapos nga nabungkag ang Unyon Sobyet, daku gid ang pag-uswag sa espirituwal sang pungsod, pero ginsundan ini sang grabe nga paghingabot. Sang ulihi nagtahaw ang paghingabot, kag sang Sabado, Abril 6, 2013, may isa ka importante nga hitabo sa kasaysayan sang mga Saksi ni Jehova sa Georgia. Gindedikar ang ginkay-o kag ginpasangkad nga pasilidad sang sanga, isa ka Assembly Hall, kag bag-o nga pasilidad para sa School for Kingdom Evangelizers kag School for Traveling Overseers and Their Wives. Si David Splane sang Nagadumala nga Hubon ang naghatag sing pamulongpulong nga gintambungan sang 338 ka bisita halin sa 24 ka pungsod kag kapin sa 800 ka Saksi sa Georgia.

Georgia

Pagkasunod nga adlaw, 15,200 ang nakabenepisyo sa pinasahi nga pamulongpulong ni Brother Splane paagi sa audio/video nga hook-up sa mga ginahiwatan sang mga miting sang kongregasyon sa bug-os nga Georgia. Madamo gid ang napalig-on sa sining internasyonal nga pagtilipon. Ang isa ka pamatan-on nga brother nagsiling, “Nahibaluan ko na kon ano ang akon batyagon sa bag-ong kalibutan.”

Sang Hunyo 29, 2013, gindedikar ang bag-o nga tatlo ka panalgan nga bilding sa pasilidad sang Bethel sa Yangon, Myanmar. Si Guy Pierce sang Nagadumala nga Hubon ang naghatag sing pamulongpulong para sa dedikasyon kag 1,013 ang nagtambong lakip ang mga bisita halin sa 11 ka pungsod. Ang grupo sang mga kauturan sa Myanmar nga nagaabiabi sa mga bisita sa Yangon International Airport ginpalapitan sang isa ka tawo halin sa isa ka pungsod nga ginadumilian ang hilikuton sang mga Saksi ni Jehova. Gintudlo niya ang ginauyatan nga karatula sang mga utod nga may nasulat nga “Ginaabiabi ang mga Saksi ni Jehova” kag namangkot, “Sin-o ang sugaton n’yo, mga saksi  bala sa isa ka kaso?” “Indi, mga abyan namon,” sabat nila. “Ti, sin-o ’ni si Jehova?” pamangkot niya. Gani ginpanaksihan sia sang mga kauturan. Pagkasunod nga adlaw pagkatapos sang programa sang dedikasyon, ginhiwat ang pinasahi nga miting sa Myanmar Convention Center. Naghatag sing pamulongpulong si Brother Pierce sa tema nga “Alagda si Jehova Upod ang Tagipusuon nga May Paghangop.” Ang programa gin-hook-up paagi sa telepono sa anom ka lokasyon sa bug-os nga Myanmar, kag 2,963 tanan ang nakapamati sa sining suno sa tion nga impormasyon. Ang isa sa mga drayber sang bus nga nagdul-ong sa isa ka grupo sang mga kauturan para sa pinasahi nga miting sa Yangon nagsiling: “Natalupangdan ko nga lain gid kamo sa iban nga relihion. Kabuot sa inyo, kanami mamiste, kag matinahuron. Dugay na ako nga nagamaneho sang bus, pero subong lang ako nakakita sang disente nga mga tawo pareho sa inyo.”

Myanmar: Ginaabiabi sang mga kauturan ang mga bisita sa programa sang dedikasyon sang sanga

Sang Mierkoles, Hulyo 3, 2013, nalipay gid ang matutom nga mga alagad ni Jehova sa Moldova sang gindedikar ang  ginpasangkad nga pasilidad sang sanga kag si Stephen Lett sang Nagadumala nga Hubon ang naghatag sang pamulongpulong. Nalakip sa sini ang tatlo ka panalgan nga bilding nga may depot sang literatura kag napulo ka kuarto nga ilistaran, kag Kingdom Hall nga may duha ka panalgan, nga ginagamit sang pito ka kongregasyon. Ang 33 ka katapo sang pamilya Bethel sa Moldova nalipay gid sa pag-abiabi sa mga bisita halin sa Estados Unidos, Germany, Ireland, Netherlands, Romania, Rusya, kag Ukraine. Nagtambong man ang mga kauturan nga matutom nga nag-alagad kay Jehova bisan pa may pagdumili sadto, ang iban nakabulig pa sa pagkopya kag pagpanagtag sang mga literatura. Lakip man sa nagtambong ang mga gin-deport upod sa ila mga ginikanan sa Siberia sang ginhingabot ang mga Saksi ni Jehova sa anay Unyon Sobyet. Sang Domingo, si Brother Lett naghatag sing makapahulag nga pamulongpulong nga gin-interpret sa Romanian kag Russian kag 14,705 ang nagtambong—ang pinakadaku nga pagtilipon sang mga Saksi ni Jehova nga ginhiwat sa Moldova halin sang una.

Padayon nga Mangamuyo, kag Indi Mangampo

Ginpadaku ni Jesus nga dapat kita ‘mangamuyo kag indi mangampo.’ (Luc. 18:1) Kon nagapangamuyo kita, nagabakod ang aton paglaum. Gani, “magpadayon sa pagpangamuyo.” (1 Tes. 5:17; Roma 12:12) Samtang ginahimo naton ini, ‘kabay nga ang Dios sang paghidait magsangkap sa aton sang tagsa ka maayong butang agod himuon ang iya kabubut-on, nga ginahimo sa aton paagi kay Jesucristo ang kalahamut-an gid sa iya itululok.’—Heb. 13:20, 21.