Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 SIERRA LEONE KAG GUINEA

1915-1947 Sadto (Bahin 3)

1915-1947 Sadto (Bahin 3)

Sa mga Probinsia kag sa Malayo Pa

Bangod sa kakugi sang Freetown Congregation sa kamatuoran, ‘nangin masako gid sila sa pagbantala sing pulong.’ (Binu. 18:5) Si Alfred Joseph nagsiling: “Pirme ako may karga nga karton sang mga libro parte sa Biblia sa akon daku nga motor nga Norton. Angkas ko si Brother Thomas ukon si Sylvester Grant kag nagakadto kami sa kaumhan kag magagmay nga mga banwa sa palibot sang Freetown para mag-canvass, subong sang tawag namon sadto.”

Antes sang 1927, ang mga manugbantala nagapanaksi lamang sa isa ka lugar sa sulod kag sa palibot sang Freetown nga ginatawag The Colony. Pero sugod sang 1928, kada tuig antes sang tig-ululan, nagaarkila ang kongregasyon sing bus kag nagakadto sa mga probinsia. Ginapangunahan ini ni Melbourne Garber. Ang indi makaupod nagabulig sa mga galastuhan. Ang grupo sang mga kauturan nakabantala sa mga banwa kag minuro pa-sidlangan asta sa Kailahun kag pa-bagatnan asta sa dulunan sang Liberia. Ginabalikan nila ang mga interesado sa kada una nga Domingo sang bulan.

Sa sina man nga tion, nagduaw si Brother Brown sa West Indies kag pagbalik niya may dala na sia nga awto, isa sa pinakauna  sa Sierra Leone. Ini nga awto may mabaskog nga sound system nga gindesinyo sa pagpanaksi sa publiko. Ginaparada niya ini sa publiko nga mga lugar kag nagapatokar sing musika para makuha ang atension sang mga tawo. Dayon, mahatag sia sing malip-ot nga pamulongpulong ukon mapatokar sing narekord nga lektyur kag imbitahon ang mga tawo nga magkuha sing literatura. Popular gid ining nagahambal nga awto—ang tawag sini sadto—kag nagadugok ang mga tawo para mamati.

Maisog nga nagapanaksi

Masunod nga ginhatagan sing igtalupangod ni Brother Brown amo ang wala pa makobrehan nga mga teritoryo—ang iban nga lugar sa Katundan nga Aprika nga nagahambal sing Ingles. Sang ulihi nga bahin sang 1920, nagbiyahe sia pakadto sa Gambia, Ghana, Liberia, kag Nigeria para magbantala. May mga interesado sa sini nga mga pungsod,  pero mas madamo gid sa Nigeria. Sang 1930, halin sa Freetown nagsaylo sila sang iya pamilya sa Lagos. Bisan didto sia, padayon niya gihapon nga ginadumalahan ang hilikuton sang Ginharian sa Katundan nga Aprika.

Kapin sa 500,000 ka Saksi ang nagaalagad karon kay Jehova sa Katundan nga Aprika

Sang 1950, bangod sa maluya nga panglawas, nagbalik si Brother Brown sa Jamaica pero nagbilin sia sing maayo nga hinimuan. Sa sulod sang 27 ka tuig, nakita nila nga mag-asawa ang pagdamo sang mga Saksi sa Katundan nga Aprika halin sa 2 asta sa sobra 11,000. Literal nila nga nasaksihan ang katumanan sang tagna ni Isaias: “Ang diotay mangin-isa ka libo, kag ang diotay manginmabakud nga pungsud.” (Isa. 60:22) Pagligad lang sang sobra 60 ka tuig, kapin sa 500,000 ka Saksi ang nagaalagad karon kay Jehova sa Katundan nga Aprika.

Malig-on Bisan May Pagdumili

Sang nagsugod ang Bug-os Kalibutan nga Inaway II sa Aprika, ang mga Saksi ni Jehova sa Sierra Leone nagpabilin nga neutral. (Miq. 4:3; Juan 18:36) Ginkabig sila nga rebelde sang awtoridad sang Britanya, amo nga ginmonitor ang ila mga hilikuton kag gindumilian ang ila literatura. Ginkompiskar sang mga opisyal sang custom sa Freetown ang isa ka shipment sang literatura kag ginsunog ini. Gin-aresto ang pila ka utod bangod sa paghupot sing ginadumilian nga literatura pero ginhilway man sila sang ulihi. *

Bisan pa may pagdumili, ang mga Saksi padayon nga nagabantala. Si Pauline Cole nagpaathag: “Ang isa ka brother nga tripulante sang barko nga regular nga nagabisita padayon nga nagasuplay sa amon sing mga kopya sang Ang Lalantawan. Ginamakinilya namon ini para may ekstra nga  kopya nga gamiton sa mga miting. Nagaimprinta man kami sing mga pulyeto sang mga topiko sa Biblia kag ginapanagtag ini sa publiko. Ang mga brother regular nga nagahatag sing pamulongpulong publiko kag nagapatokar sing mga rekording sang pamulongpulong ni Brother Rutherford sa radyo, ilabi na sa malayo nga mga minuro.”

Ini nga mga panikasog ginpakamaayo gid ni Jehova. Si James Jarrett, isa ka madugay na nga gulang kag espesyal payunir, naghinumdom: “Sang tion sang inaway, ang akon obra manugtabas sang bato. Isa ka bes, ginhatagan ako sang tigulang nga sister sang bukleta nga Refugees. Interesado ako sa tig-ulo sang bukleta bangod madamo nga refugee ang nagdangop sa Freetown. Ginbasa ko ini pagkagab-i kag nakumbinsi ako gilayon nga amo ini ang kamatuoran. Pagkaaga, ginpangita ko ang sister kag nangayo sing mga kopya para sa akon tatlo ka utod nga lalaki. Kami nga apat nagbaton sing kamatuoran.”

Sang natapos ang inaway sang 1945, ang Freetown Congregation may ara sing 32 ka manugbantala. Nahuptan sang mga manugbantala ang ila integridad kag nagpabilin nga aktibo sa espirituwal. Handa sila nga magpadayon.

Kampanya Para sa Miting Publiko

Sang Agosto 29, 1945, sa semanal nga Miting sa Serbisyo, ginbinagbinag sang Freetown Congregation ang bag-o nga kampanya nga ginpahibalo sa Disiembre 1944 nga Informant (ginatawag karon nga Ang Aton Ministeryo sa Ginharian). Ang kada kongregasyon dapat magpahibalo kag maghiwat sing serye sang apat ka miting publiko sa “kada siudad, banwa, kag minuro” sa ila teritoryo. Ang kada miting may isa ka oras nga pamulongpulong sang isa ka brother (nagaedad sing 18 ukon kapin pa) nga huwaran sa Teokratikong Eskwelahan Para sa Ministeryo. Pagkatapos sang apat ka miting, ang mga utod nagahiwat sing grupo nga pagtuon sa Biblia para buligan ang mga interesado sa kada lugar.

 Ano ang reaksion sang mga manugbantala sa sining bag-o nga panuytoy? Amo sini ang mabasa sa nota halin sa Freetown Congregation sa ila Miting sa Serbisyo:

Tsirman: “Paano naton mahimo ining bag-o nga kampanya?”

Una nga Brother: “Indi kita magpaabot nga ang reaksion sang mga tawo diri pareho sa Amerika. Lain ang mga tawo diri.”

Ikaduha nga Brother: “Husto ka.”

Ikatlo nga Brother: “Ngaa indi naton pagtilawan?”

Ikap-at nga Brother: “Pero sigurado nga may mga kabudlayan.”

Ikalima nga Brother: “Huo, pero dapat naton sundon ang panuytoy sang organisasyon ni Jehova.”

Ikan-om nga Brother: “Daw indi gid ini magmadinalag-on sa aton pungsod.”

Una nga Sister: “Pero maathag ang panuytoy sang Informant. Tilawan lang naton!”

Gintuman nila ang panuytoy. Halin sa baybayon sang Freetown pakadto sa Bo sa bagatnan-sidlangan pakadto sa Kabala sa naaminhan nga kapatagan, ang mga utod naghiwat sing miting sa mga eskwelahan, merkado, kag puluy-an. Bangod sini, nangin makugi pa gid ang kongregasyon, kag “ang pulong ni Jehova padayon nga nagtubo kag naglapnag.”—Binu. 12:24.

Pero ang mga manugbantala nagakinahanglan pa sing paghanas. Kag amo gid sini ang gin-aman ni Jehova.

^ par. 10 Ang pagdumili ginkuha sang 1948.