Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 SIERRA LEONE AND GUINEA

1915-1947 Sadto (Bahin 2)

1915-1947 Sadto (Bahin 2)

Pag-atubang sa mga Gladiador

Sang makita sang mga klero sang Freetown ang ila mga panong nga nanamian sa mga pamulongpulong ni Brother Brown, nahisa gid sila kag naakig. Ang Disiembre 15, 1923, nga The Watch Tower nagreport: “Gin-atake sang mga klero ang kamatuoran paagi sa mga pamantalaan. Pero pirme man sila ginasabat ni Brother Brown. Ang pagsabtanay sining duha ka kampo mabasa sa mga pamantalaan.” Sang ulihi naghipos ang mga klero. Ang ila sayop nga pangatarungan nabuyagyag gid. Ang kamatuoran sa Biblia naglapnag, kag madamo nga bumalasa sang pamantalaan ang nangabay sing mga literatura base sa Biblia. Gintinguhaan sang mga klero nga pahipuson ang katawhan sang Dios, pero ginbalik sa ila ni Jehova ang ila kalautan.—Sal. 94:21-23.

Ang mga klero gin-apinan sang isa ka grupo sang mga pamatan-on sa simbahan nga ginatawag Gladiador. Gin-anunsio nila nga may serye sang publiko nga miting para pauntaton ang “Russellism,” ang tawag nila sa mensahe sang Ginharian. Bilang sabat, ginhangkat sila ni Brother Brown para sa serye sang debate. Wala ini ginbaton sang mga Gladiador kag gin-akigan nila ang editor sang pamantalaan nga nagbalhag sang hangkat ni Brother Brown. Gindumilian man nila si Brother Brown sa ila mga miting, gani si Alfred Joseph ang nagtambong.

Ini nga mga miting ginhiwat sa Buxton Memorial Chapel, isa ka bantog nga simbahan sang mga Metodista sa Freetown. “Sa tion sang pamangkot kag sabat,” hinumdom ni Alfred, “ginpamangkot ko sila parte sa kredo sang mga Anglikano, doktrina nga Trinidad, kag iban pa nga panudlo nga wala sa Biblia. Sang ulihi, ang tsirman indi na magbaton sing mga pamangkot.”

Ang isa sa mga Gladiador nga nagtambong sina nga gab-i amo si Melbourne Garber, nga nakatambong man sa  mga pamulongpulong ni “Bible” Brown. Sia pa gani atong estudyante nga nagsiling, “Kabisado gid ni Mr. Brown ang iya Biblia!” Ginbinagbinag sing maayo ni Melbourne ang iya nabatian, kag kumbinsido sia nga amo ini ang kamatuoran. Dayon, ginpangabay niya si Brother Brown nga tun-an sia sa Biblia. Gin-agda sia ni Brother Brown sa iya balay para sa semanal nga Watch Tower Study. Bisan pa ginsikway sia sang iya pamilya, madasig sia nga nag-uswag sa espirituwal, kag sang ulihi nabawtismuhan sia upod sa iban pa.

Napaslawan si Satanas nga punggan ang panugod sang pagbantala. Pareho sang ginsiling sang meyor sang Freetown sa mga Gladiador: “Kon hilikuton ini sang mga tawo, mapunggan ninyo ini. Pero kon iya ini sang Dios, indi ninyo ini mapauntat.”—Binu. 5:38, 39.

Ang Relihion sang mga Brown

Sang maaga nga bahin sang Mayo 1923, nagtelegrama si Brother Brown sa sanga talatapan sa London para mangabay sing dugang nga literatura. Wala madugay 5,000 ka libro ang nag-abot, kag may ginpadala pa gid sang ulihi. Padayon man sia nga naghiwat sing mga pamulongpulong publiko, kag linibo ang nangin interesado.

Sang ulihi sa sina nga tuig, ang Watch Tower nagreport: “Madasig ang pag-uswag sang hilikuton [sa Sierra Leone] amo nga si Brother Brown nangabay sing kabulig; kag si Claude Brown, nga taga-Winnipeg (West Indies sadto) pakadto na didto sa pagbulig sa hilikuton.”

Si Claude Brown eksperiensiado nga ministro sang maayong balita. Sang Bug-os Kalibutan nga Inaway I, nabatas niya ang pagmaltrato sa mga prisuhan sa Canada kag England bangod sang iya Cristianong neutralidad. Nag-alagad sia sa Sierra Leone sing apat ka tuig, kag napalig-on gid ang mga kauturan.

 Si Pauline Cole nagsiling, “Antes ako ginbawtismuhan sang 1925, ginpamangkot ako sing maid-id ni Brother Claude.

“‘Sister Cole, nahangpan mo bala ang imo natun-an sa Studies in the Scriptures?’ pamangkot niya. ‘Indi namon gusto nga maglisa ka sa kamatuoran bangod wala mo mahangpan ang mga panudlo sang Biblia.’

“‘Brother Claude,’ sabat ko, ‘makapila ko na ginbasa ang akon tulun-an. Desidido na ako!’”

Pauline Cole

Nag-alagad si Pauline kay Jehova sing sobra 60 ka tuig, ang kalabanan sini subong espesyal payunir. Natapos niya ang iya dutan-on nga kabuhi sang 1988.

Ginabuligan man ni William “Bible” Brown ang iban nga mapalambo ang maayo nga espirituwal nga rutina. Si Alfred Joseph nagsiling: “Kon masugata ko si Brother Brown sa aga, amo sini sa masami ang amon pag-istoryahanay: ‘Kamusta ka, Brother Joe? Ano gani ang teksto sa  Biblia subong nga adlaw?’ Kon indi ako makasabat, ginapalig-on niya ako nga basahon ang teksto kada adlaw sa libro nga Daily Manna. [Ginatawag karon nga Pag-usisa sa Kasulatan Adlaw-adlaw.] Pagkaaga, ginabasa ko dayon ang teksto para may isabat ako sa iya. Sang ulihi ko na lang nahangpan kon daw ano ka importante ini nga paghanas sa akon.”

Nagbunga gid ang tanan nga paghanas. Sang 1923, isa ka kongregasyon ang natukod sa Freetown kag 14 ang nabawtismuhan. Ang isa sa ila amo si George Brown. Gani may tatlo na ka pamilya “Brown” sa kongregasyon. Bangod sa ila kakugi, gintawag sang mga taga-Freetown ang mga Estudyante sang Biblia nga relihion sang mga “Brown.”