Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 SIERRA LEONE KAG GUINEA

1915-1947 Sadto (Bahin 1)

1915-1947 Sadto (Bahin 1)

 Nag-iwag ang Kapawa sang Kamatuoran

Ang maayong balita nakalab-ot sa Sierra Leone sang 1915, sang nagpauli ang mga pumuluyo sini halin sa England dala ang mga literatura base sa Biblia. Sang Hulyo sina nga tuig, nag-abot sa Freetown ang 31 anyos nga si Alfred Joseph. Sia ang pinakauna nga bawtismado nga nakatapak sa Sierra Leone. Tumandok sia sang Guyana, Bagatnan nga Amerika, kag nabawtismuhan sang maaga nga bahin sina nga tuig sa Barbados, West Indies. Nagpa-Freetown sia kay may kontrata sia nga mag-obra didto subong enhinyero sang mga tren. Nag-istar si Alfred sa compound sang mga trabahador sa Cline Town, nga 3.2 kilometros halin sa Cotton Tree sang Freetown. Ginpaambit niya dayon ang mensahe sang Biblia sa iya mga kaupod sa trabaho.

Pagkadason nga tuig, nag-abot si Leonard Blackman, ang kaupod anay ni Alfred sa trabaho sa Barbados. Ang iloy ni Leonard nga si Elvira Hewitt amo ang nagpaambit kay Alfred sang kamatuoran. Magkaingod ang ginaistaran nanday Leonard kag Alfred, gani pirme nila ginabinagbinag ang Biblia. Nagapanagtag man sila sing mga literatura base sa Biblia sa ila mga abyan kag sa mga interesado.

Nakita nanday Alfred kag Leonard nga ang kaumhan sang Freetown ‘maputi na agod anihon.’ (Juan 4:35) Gani sang 1923, nagsulat si Alfred sa ulong talatapan sa New York: “Madamo diri ang interesado sa Biblia. Puede bala kamo magpadala sang mag-atipan sa ila kag magbulig nga mapauswag ang pagbantala nga hilikuton sa Sierra Leone?” Ang sabat sa iya: “May ipadala kami!”

Si William “Bible” Brown kag ang iya asawa nga si Antonia

“Isa ka gab-i sang Sabado, pagligad sang pila ka bulan, may nagtawag sa telepono nga wala ko ginapaabot,” siling ni Alfred.

 “‘Ikaw bala ang nagsulat sa Watch Tower Society nga nagapangabay sing dugang nga manugbantala?’ pamangkot sang nagatawag.

“‘Huo,’ sabat ko.

“‘Ako ang ginpadala nila,’ mabaskog sini nga sabat.

“Tingog yadto ni William R. Brown. Nag-abot sia sina nga adlaw upod ang iya asawa nga si Antonia kag ang ila bata nga babayi, kag nagtener sila sa Gainford Hotel.

“Pagkaaga, samtang nagahiwat kami ni Leonard sang amon semanal nga pagtuon sa Biblia, may nag-abot nga daku nga tawo. Sia si William R. Brown. Makugi sia sa kamatuoran kag gusto gani niya mamulongpulong pagkadason gid nga adlaw. Gani gin-arkilahan namon dayon ang pinakadaku nga tilipunan sa Freetown, ang Wilberforce Memorial Hall, kag gin-iskedyul ang una sa apat ka pamulongpulong sa masunod nga Huebes sang gab-i.

“Ang amon diutay nga grupo masako nga nagpahibalo sang pamulongpulong paagi sa mga pamantalaan kag  handbill. Personal man namon ini nga ginapahibalo, pero nabalaka kami kon ano ang mangin reaksion sang mga tawo. Wala gid namon ginapaabot nga mga 500 ang magaginutok sa tilipunan, lakip ang madamo nga klero sang Freetown. Daku gid ang amon kalipay!”

Sa sulod sang isa ka oras nga pamulongpulong, pirme ginakutlo ni Brother Brown ang Kasulatan kag naggamit sia sing slide para ipakita ang mga teksto sa Biblia. Pirme man sia nagasiling, “Indi ang ginasiling ni Brown kundi ang ginasiling sang Biblia.” Nagdayaw gid ang tagpalamati, amo nga nagapamalakpak sila sa kada punto nga iya ginapadaku. Wala sila nagdayaw sa mapuersa nga pamulongpulong, kundi sa iya epektibo nga paggamit sang Kasulatan. Isa ka lalaki nga estudyante sang relihion nga nagtambong ang nagsiling, “Kabisado gid ni Mr. Brown ang iya Biblia!”

1924

Nangin bantog sa siudad ang mga pamulongpulong ni Brother Brown, amo nga nagadugok ang mga tawo agod mamati. Pagkadason nga Domingo, napuno liwat ang tilipunan para sa diskurso nga “To Hell and Back—Who Are There?” Ang gamhanan nga mga kamatuoran nga ginpresentar ni Brother Brown sina nga gab-i nagpahulag bisan sa mga debotado nga maghalin sa ila relihion.

Madamo gid ang nagtambong sa ikap-at kag katapusan nga pamulongpulong sang serye nga “Millions Now Living Will Never Die.” Ang isa ka residente sang Freetown naghinumdom sang ulihi: “Ginkanselar sang mga simbahan ang ila mga misa sa gab-i bangod ang tanan nila nga miembro nagtambong sa pamulongpulong ni Brother Brown.”

Bangod pirme ginagamit ni Brother Brown ang Biblia kag ginapatuhuyan ini subong ang lamang nga awtoridad, gintawag sia sang mga tawo nga “Bible” Brown. Nakilala ini nga hayo sa bilog nga Katundan nga Aprika. Gani tubtob nga natapos ang iya dutan-on nga kabuhi, nakilala si William R. Brown sa sina nga ngalan.