Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

SIERRA LEONE KAG GUINEA

1945-1990 ‘Pagliso sang Madamu sa Pagkamatarung’—Dan.12:3. (Bahin 2)

1945-1990 ‘Pagliso sang Madamu sa Pagkamatarung’—Dan.12:3. (Bahin 2)

Pagtahod sa Dulot sang Dios nga Pag-asawahay

Samtang ginatungdan ni William Nushy ang iya asaynment, natalupangdan niya nga may mga manugbantala nga wala nagasunod sa talaksan ni Jehova sa pag-asawahay. Ang iban nagaupdanay nga wala marehistro sing legal ang ila pag-asawahay. Ang pila naman nagasunod sa kinabatasan nga magpakasal lang kon magbusong na ang babayi para masiguro nga magmabungahon sila.

Gani sang Mayo 1953, ginsulatan sang sanga talatapan ang kada kongregasyon kag ginpaathag ang talaksan sang Biblia sa pag-asawahay. (Gen. 2:24; Roma 13:1; Heb. 13:4) Ang mga nagapuyopuyo ginhatagan sing tion para iparehistro ang ila pag-asawahay. Kon indi sila magtuman, sikwayon sila sa kongregasyon.—1 Cor. 5:11, 13.

Ang kalabanan nga manugbantala nalipay sa sini nga pagbag-o. Pero para sa iban indi ini kinahanglanon. Sobra katunga sang manugbantala sa duha ka kongregasyon ang naghalin sa organisasyon ni Jehova. Pero ang mga nagpabilin nga matutom nangin mabungahon sa ila pag-alagad, nga pamatuod sang pagpakamaayo ni Jehova.

Pagkatapos sang daku nga panikasog sang mga utod, ginpili nila ang Kingdom Hall sa Freetown nga hiwatan sang mga kasal. Sang Septiembre 3, 1954, ginhiwat didto ang una nga seremonya sang kasal. Sang ulihi, ginhatagan sang gobierno sing pahanugot nga magkasal ang kalipikado nga mga utod sa pito ka distrito sa bilog nga pungsod. Bangod  sini, madamo nga interesado ang nakapakasal sing legal kag nangin kalipikado nga manugbantala sang maayong balita.

Kasal sa Kingdom Halll

Madamo nga interesado nga may kapin sa isa ka asawa ang naghimo sing mga pagbag-o para masunod ang talaksan sang Dios. Si Samuel Cooper, nga nagapuyo karon sa Bonthe, nagsaysay: “Sang 1957, nagtambong ako  sa mga miting upod sa akon duha ka asawa kag sang ulihi nagpalista sa Teokratikong Eskwelahan Para sa Ministeryo. Isa ka bes, ginhatagan ako sing bahin parte sa Cristianong pag-asawahay. Sa akon pag-research, narealisar ko nga kinahanglan ko bayaan ang akon ikaduha nga asawa. Sang ginsilingan ko ang akon mga paryente, naakig sila sa akon. May bata kami sang akon ikaduha nga asawa, apang sa una wala. Pero nakadesisyon na ako nga sundon ang mga prinsipio sa Kasulatan. Nalipay gid ako kay sang nagbalik ang akon ikaduha nga asawa sa iya pamilya, ang akon una nga asawa nagbusong. Subong, lima na ang amon bata sang akon asawa nga indi makabata sang una.”

Ang isa pa ka interesado amo si Honoré Kamano. Nagaistar sia sa tabok sang dulunan sang Guinea. Sang ginbayaan niya ang duha sa iya tatlo ka asawa, nalipay gid ang iya una nga asawa kag nangin interesado sa kamatuoran. Naglain ang buot sang isa sang iya mga asawa, pero nagdayaw ini sa pagsunod niya sa mga prinsipio sa Biblia. Nangabay sia sing pagtuon sa Biblia kag sang ulihi gindedikar ang iya kabuhi kay Jehova.

Kilala ang mga Saksi ni Jehova nga nagatahod sa kahimusan sa pag-asawahay

Sa karon, kilala ang mga Saksi ni Jehova sa bilog nga Sierra Leone kag Guinea sa ila pagtahod sa kahimusan sa pag-asawahay. Ang katutom sa ila tiayon nagapatahom sa mga panudlo sang Dios kag nagadayaw sa iya subong ang Awtor sang kahimusan sa pag-asawahay.—Mat. 19:4-6; Tito 2:10.

Pagpamatok sa Freetown

Sang 1956, nag-abot sa Freetown ang duha pa ka naggradwar sa Gilead nga sanday Charles kag Reva Chappell. Samtang nagapakadto sila sa puluy-an sang mga misyonero,  natingala sila sang makita nila ang daku nga karatula nga nagapahibalo parte sa isa ka pamulongpulong sa Biblia sa Wilberforce Memorial Hall. “Ang ginbutang nga humalambal amo si C.N.D. Jones,” siling ni Charles, “ang representante sang ‘Ecclesia of Jehovah’s Witnesses.’”

Si Jones, nga nagapangangkon nga hinaplas, amo ang liderlider sang grupo nga nagsipak sa kongregasyon sa Freetown pila ka tuig antes sini. Ang iya grupo nagapangangkon nga “matuod” nga mga saksi ni Jehova. Gintawag nila nga “mga impostor” kag “mga cowboy sang Gilead” ang mga misyonero kag ang mga nagaunong sa mga tiglawas sang organisasyon.

Naglala ang sitwasyon sang nadisfellowship si Jones kag ang iya mga sumulunod. “Nakibot gid sa sini nga pahibalo ang pila ka utod nga apin sa mga nagsipak,” siling ni Chappell. “May pila nga nagpabutyag sa publiko sang ila pagkadisgusto. Ini nga mga tawo upod sa iban pa padayon nga nakig-upod sa mga nagsipak kag ginasamok nila ang mga miting kag mga kahimusan sa pag-alagad. Tululupad sila sa tion sang miting sa ginatawag nga pulungkuan sang mga rebelde. Ang kalabanan sa ila nagbiya sa kamatuoran. Pero ang iban nakabawi sa espirituwal kag nangin makugi nga mga manugbantala.”

Bangod nangin mainunungon ang kalabanan, ang espiritu sang Dios padayon nga nagpanghikot sa ila. Pagkasunod nga tuig, sang nagduaw ang manugtatap sang sona nga si Harry Arnott, sia nagreport: “Amo ini ang una nga daku nga pag-uswag naton sa Sierra Leone sa sulod sang pila ka tuig. Ginapakita sini nga daku ang potensial sang pag-uswag sa ulihi.”

Pagtudlo sa mga Kisi

Wala madugay pagkatapos sang pagbisita ni Brother Arnott, nakabaton si Charles Chappell sing sulat halin sa  isa ka utod sa kaingod nga Liberia. Luyag sang utod nga mabantalaan ang iya mga paryente sa Sierra Leone. Miembro sia sang tribo nga Kisi, nga nagaistar sa kabukiran kag nalupyakan sa mga dulunan sang Sierra Leone, Liberia, kag Guinea. Madamo nga nagahambal sing Kisi ang luyag magtuon sa Biblia.

Bangod ang kalabanan nga Kisi indi kabalo magbasa ukon magsulat, naghiwat sing mga klase sa Koindu para tudluan sila sing panguna nga mga kamatuoran sa Biblia. Madamo nga estudyante ang nangin interesado sa sini nga mga klase. “Wala madugay ang grupo may 5 na ka bag-o nga manugbantala, kag nangin 10, dayon 15, kag sang ulihi 20,” siling ni Charles. “Madasig sila nga nakasulod sa kamatuoran amo nga nagduhaduha ako kon bala matuod sila nga mga manugbantala. Pero nagsala ako. Kalabanan sa ila indi lamang matutom kundi makugi man.”

Sang ulihi, ining mga bag-uhan nalangkag gid nga ipalapnag ang maayong balita indi lang sa Koindu kundi asta sa kaingod nga Guinea. Inoras nga ginlatas nila ang kabukiran, nga nagabantala sa mga uma kag minuro. “Sinemana, kon kaisa binulan pa, nga indi kami makabati sing tunog sang salakyan,” siling ni Eleazar Onwudiwe, isa ka manugtatap sang sirkito sina nga tion.

Samtang ginapalapnag kag ginabunyagan sang mga kauturan nga Kisi ang binhi sang Ginharian, ginapatubo ini sang Dios. (1 Cor. 3:7) Sang mabatian sang pamatan-on nga bulag nga lalaki ang kamatuoran, ginsaulo niya ang 32-pahina nga bukleta nga “Ining Maayong Balita Sang Ginharian.” Sang ulihi, madumduman niya ang bisan ano nga parapo samtang nagabantala kag nagadumala sing pagtuon sa Biblia sing isahanon. Nagdayaw gid ang mga nagapamati sa iya. Ang apa nga babayi nga nagbaton sing kamatuoran naghimo sing daku nga pagbag-o sa iya kabuhi amo nga ang iya bayaw nga babayi nagtambong man sa  mga miting, bisan pa magalakat sia sing kapin sa napulo ka kilometro.

Ang hilikuton sang mga Kisi madasig nga nag-uswag. Sunodsunod nga naporma ang mga kongregasyon. Mga 30 ka manugbantala ang nagpayunir. Ang pinuno sang banwa sang Koindu nangin interesado sa kamatuoran kag nagdonar sing lote para patindugan sing Kingdom Hall. Kapin sa 500 ang nagtambong sa isa ka sirkito nga asembleya sa Kailahun, kag isa man ka kongregasyon ang natukod didto. Sang ulihi, katunga sang mga Saksi sa Sierra Leone mga Kisi, bisan pa ini nga tribo wala pa duha ka porsiento sang populasyon.

Ini nga pag-uswag wala maluyagan sang tanan, ilabi na sang Kisi nga mga lider sang relihion. Bangod sa kahisa, determinado sila nga dulaon ining “upang” sa ila palangakuan. Pero ang pamangkot, San-o kag paano sila magaatake?