Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 SIERRA LEONE KAG GUINEA

2002-2013 Pag-uswag Sining Karon Lang (Bahin 2)

2002-2013 Pag-uswag Sining Karon Lang (Bahin 2)

Pagbulig sa mga Apa kag Bungol

Suno sa isa ka pagbanabana, mga 3,000 asta 5,000 ka tawo sa Sierra Leone kag ginatos sa Guinea ang apa kag bungol. Bangod kabubut-on ni Jehova nga “ang tanan nga sahi sang mga tawo maluwas,” paano nila ‘mabatian’ ang maayong balita?—1 Tim. 2:4.

Si Michelle Washington, isa ka misyonera nga nahanas sa Gilead nga nag-abot sa Sierra Leone sang 1998, nagsiling: “Naasayn kami sang akon bana nga si Kevin sa kongregasyon nga may apat ka apa nga nagatambong sa mga miting. Gusto ko gid sila buligan kay makahibalo ako sang American Sign Language. Ginpangabay ako sang sanga talatapan nga mag-interpret sa mga miting kag asembleya kag ginpahibalo nila ang kaingod nga mga kongregasyon parte sa sini nga kahimusan. Naghiwat man sila sing mga klase para sa mga manugbantala nga luyag magbulig sa mga apa. Ginpangita namon ang mga apa sa komunidad  kag gintun-an sila sa Biblia. Pero indi tanan nalipay sa amon mga panikasog nga buligan ang mga apa. Ginpalapta sang pastor nga nagatudlo sa mga apa nga ‘butig kami nga mga manalagna,’ kag ginpaandaman ang ila pamilya kag ang mga tawo nga likawan kami. Ang iban ginsilingan nga kon padayon sila nga makig-upod sa amon, indi na sila pagbuligan sa pinansial. Ang grupo sang mga apa natunga dayon sa duha: ang mga wala nakakilala sa amon kag dampig sa pastor kag ang mga nakakilala sa amon kag indi dampig sa pastor. Ang mga apa nga dampig sa amon nanindugan sa kamatuoran kag nabawtismuhan.”

Si Femi isa ka lalaki nga nabun-ag nga apa kag makahibalo lang sing natural nga mga senyas. Wala sia nagasalig kay bisan sin-o ilabi na sa mga indi apa. Indi man sia malipayon kag pamatyag niya wala sia ginapalangga. Nian nagtuon sia sa Biblia upod sa mga utod sa grupo sang sign language. Sang ulihi regular na sia nga nagatambong sa mga miting kag nagtuon sing sign language. Nag-uswag si Femi kag nabawtismuhan. Malipayon na sia karon nga nagatudlo sing kamatuoran sa iban nga apa.

Si Femi, (sa tuo) nagakanta sing ambahanon sa Ginharian sa sign language

Sang Hulyo 2010, ang grupo sang American Sign Language sa Freetown nangin kongregasyon na. May mga grupo naman sa Bo kag Conakry.

Imol Pero “Manggaranon sa Pagtuo”

Ginapakita sang Biblia nga ang kalabanan sang unang siglo nga mga Cristiano imol sa materyal. Si disipulo Santiago nagsulat: “Wala bala ginpili sang Dios ang mga imol may kaangtanan sa kalibutan nga mangin manggaranon sa pagtuo?” (Sant. 2:5) Ang pagtuo kay Jehova naglugpay man kag naghatag sing paglaum sa mga manugbantala sa Sierra Leone kag Guinea.

Bangod sa pagtuo, binulan nga nagasupot ang imol nga mga pamilya nga Saksi sa nabaw-ing nga mga lugar para makatambong  sa distrito nga mga kombension. Ang iban nagatanom para may iplete. Mga grupo sang 20 asta 30 ka delegado ang nagaginutok sa gamay nga trak samtang nagabiyahe sing 20 ka oras ukon kapin pa sa mainit, yab-ukon, kag batsihon nga dalan. Ang iban nga delegado nagalakat sing malayo. “Ginlakat namon ang una nga 80 kilometros pakadto sa kombension dala ang madamo nga saging,” siling sang isa ka brother. “Ginbaligya namon ini sa amon maagyan, gani nagmag-an ang amon dala kag nakatipon kami sing iplete sa salakyan sa pagpadayon sang amon biyahe.”

Pagbiyahe pakadto sa kombension sakay sa trak

Bangod man sa pagtuo, madamo nga manugbantala ang wala mahaylo nga mag-abroad. “Nagasalig kami nga iaman ni Jehova ang amon kinahanglanon,” siling ni Emmanuel Patton, naggradwar sa Bible School for Single Brothers. “Nabatyagan namon nga hamili gid ang amon pag-alagad  bangod diutay lamang ang manugbantala sang Ginharian sa amon lugar.” (Mat. 6:33) Subong, si Emmanuel isa na ka gulang sa kongregasyon. Upod ang iya asawa nga si Eunice, makugi sila nga nagaalagad kay Jehova. Namat-od ang iban nga ulo sang pamilya nga indi mag-abroad agod maamligan ang paghiusa kag espirituwalidad sang ila pamilya. “Wala ko ginabaton ang obra nga magapahilayo sa akon pamilya sa malawig nga tion,” siling ni Timothy Nyuma, nga nag-alagad subong espesyal payunir kag tal-us nga manugtatap sang sirkito. “Ginpaeskwela namon sang akon asawa nga si Florence ang kabataan diri lang sa amon lugar imbes nga paeskwelahon sila sa malayo kag iban ang mag-atipan sa ila.”

 Ginpakita sang iban nga kauturan ang ila pagtuo paagi sa pagtuman sang Cristianong mga hilikuton bisan pa sa mga kabudlayan. Si Kevin Washington, nga nasambit kaina, nagsiling: “Madamo ang regular nga nagabantala kag nagaatipan sa mga katungdanan sa kongregasyon bisan pa may mga problema, nga kon sa aton matabo basi magpakuribong na lang kita sa balay kag magpasingit. Halimbawa, ang iban nga may malubha nga balatian indi makapabulong bangod wala sing bulong ukon pabulngan sa ila lugar. Ang iban naman nagapanikasog gid para makahibalo sa pagbasa kag pagsulat. Kon daw nahikay ako sa paagi sang isa ka utod sa pagtungod sang iya asaynment, ginapamangkot ko ang akon kaugalingon: ‘Kon ako ayhan ang may bug-os tion nga trabaho, may malubha nga balatian, may mapigaw nga mata pero wala sing antipara, limitado ang reperensia kag wala sing koryente, matungdan ko ayhan sing maayo ang akon asaynment?’”

Sa madamo nga paagi, ginahimaya sang mga kauturan sa Sierra Leone kag Guinea si Jehova. Kaangay sang unang siglo nga mga Cristiano, ginarekomendar nila ang ila kaugalingon subong mga ministro sang Dios “paagi sa pagbatas sing madamo nga pagtilaw, nga amo ang mga kapipit-an, kinawad-on, . . . subong imol apang nagapamanggad sa madamo, subong wala sing bisan ano apang nagapanag-iya sang tanan nga butang.”—2 Cor. 6:4, 10.

Pag-atubang sa Palaabuton nga May Pagsalig

Kapin sa 90 ka tuig ang nagligad, nagreport sanday Alfred Joseph kag Leonard Blackman nga ang latagon sang Sierra Leone ‘maputi na agod anihon.’ (Juan 4:35) Pagligad sang mga 35 ka tuig, si Manuel Diogo nagsulat gikan sa Guinea, nga nagasiling, “Madamo sang interesado diri.” Subong, ang mga alagad ni Jehova sa sining duha ka pungsod kumbinsido nga madamo pa ang magabaton sang maayong balita.

 Sang 2012, ang nagtambong sa Memoryal sang kamatayon ni Cristo sa Guinea 3,479, kapin sa apat ka pilo kag tunga sangsa kabilugan nga manugbantala sang pungsod. Sa 2,030 ka manugbantala sa Sierra Leone, 7,854 ang nagtambong sa Memoryal, halos apat ka pilo sangsa mga manugbantala. Ang isa ka madugay na nga Saksi nga nagtambong sa Memoryal amo ang 93 anyos nga espesyal payunir nga si Winifred Remmie. Sia kag ang iya bana nga si Lichfield, nag-abot sa Sierra Leone sang 1963. Pagligad sang 60 ka tuig sa bug-os tion nga pag-alagad, espesyal payunir gihapon sia. Si Winifred nagsiling: “Sin-o bala ang magahunahuna nga ang Sierra Leone mangin manggaranon  sa malig-on sa espirituwal nga mga kauturan. Bisan pa tigulang na ako, gusto ko makaamot sa sining malipayon nga pag-uswag.” *

Amo man sini ang ginabatyag sang mga Saksi ni Jehova sa Sierra Leone kag Guinea. Kaangay sang daku nga mga kahoy nga natanom sa kasulgan sang tubig, determinado sila nga mamunga para sa kadayawan ni Jehova. (Sal. 1:3) Paagi sa kusog ni Jehova padayon nila nga ginapahibalo ang matuod nga paglaum sang kahilwayan sang katawhan—“ang mahimayaon nga kahilwayan sang mga anak sang Dios.”—Roma 8:21.

Komite sang Sanga, halin sa wala pa tuo: Collin Attick, Alfred Gunn, Tamba Josiah, kag Delroy Williamson

^ par. 16 Napatay si Winifred Remmie samtang ginasulat ini.