Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 SIERRA LEONE KAG GUINEA

2002-2013 Pag-uswag Sining Karon Lang (Bahin 1)

2002-2013 Pag-uswag Sining Karon Lang (Bahin 1)

 “Jehova, Salamat Gid!”

Sang normal na ang kahimtangan, nagbalik ang mga kauturan sa ila mga puluy-an. Naporma liwat ang mga kongregasyon nga naapektuhan sang inaway, ilabi na sa sidlangan sang Sierra Leone. Ang mga espesyal payunir sa isa ka lugar nagreport: “Ang nagtambong sa amon una nga miting 16, pagkasunod nga miting 36, dayon 56, kag sang Memoryal 77 ang nagtambong! Nalipay gid kami!” Naporma ang 9 ka bag-o nga kongregasyon, gani sa kabug-usan 24 tanan. Nag-abot ang napulo ka bag-o nga misyonero nga nahanas sa Gilead kag daku gid ang ila nabulig sa pagbantala nga hilikuton. Sang 2004, ang nagtambong sa Memoryal 7,594—sobra lima ka pilo sangsa kabilugan nga manugbantala! May amo man sini nga pag-uswag sa Guinea.

Ang Nagadumala nga Hubon nagpagua dayon sing pundo para buligan nga makasugod liwat ang nagbalik nga mga refugee. (Sant. 2:15, 16) Ang mga boluntaryo nagtukod ukon nagkay-o sing 12 ka Kingdom Hall kag isa ka Assembly Hall sa Koindu. Nagtukod man sila sing 42 ka simple nga puluy-an nga human sa daga para sa mga pamilya nga naguba ang mga balay. Samtang nagatindog ang setentahon nga balo nga babayi sa tupad sang iya bag-o nga balay nga may atop nga sin, nagatululo ang iya luha nga nagahugyaw: “Jehova, salamat gid! Jehova, salamat gid! Mga kauturan, salamat gid!”

Nagsugod man ang sanga talatapan sa pagtukod sang mga Kingdom Hall paagi sa pundo gikan sa programa para sa imol nga mga lugar. Si Saidu Juanah, isa ka gulang kag  payunir sa Bo West Congregation, nagsiling: “Isa ka sister ang nagsiling sa akon, ‘Kon mabatian ko nga tukuran kami sing bag-o nga Kingdom Hall, ipalakpak ko gid ang akon mga kamot kag tiil!’ Sang ginpahibalo ko nga tukuran kami sing bag-o nga tilipunan, nagtumbo gid ang sister, nga nagapamalakpak kag nagasaot-saot—‘ginpalakpak’ gid man niya ang iya mga kamot kag tiil!”

Sang 2010, gindedikar sang Waterloo Congregation ang bag-o nga Kingdom Hall nga mahimo pasangkaron subong Assembly Hall nga may 800 ka pulungkuan. Sang adlaw nga ginbakal sang kongregasyon ang duta, may nagtanyag nga baklon ini sa mas daku nga kantidad. Pero nagsiling ang tag-iya, “Mas gusto ko nga patindugan ang akon duta sang isa ka relihioso nga tilipunan sangsa gamiton ini sa negosyo.”

Paagi sa programa para sa imol nga mga lugar, 17 ka Kingdom Hall ang natukod sa Sierra Leone, kag 6 sa Guinea. Ining simple pero disente nga mga tinukod para sa pagsimba nagganyat sa madamo nga tawo nga magtambong sa mga miting.

Pagpangita sa Nadula nga Karnero ni Jehova

Samtang nagauswag ang pagbantala nga hilikuton, naghimo ang sanga talatapan sing duha ka bulan nga kampanya agod bantalaan ang mga lugar nga talagsa lang matuptupan. Ang mga manugbantala nakapahamtang sing halos 15,000 ka libro kag madamo sila sing makalilipay nga eksperiensia. May pila nga namangkot kon bala matukod ang mga Saksi ni Jehova sing mga kongregasyon sa sina nga mga lugar. Bilang resulta, duha ka bag-o nga kongregasyon ang naporma. Sa isa ka nabaw-ing nga lugar, nasapwan sang mga utod ang duha ka sister nga madugay na nga wala sing kontak sa mga kauturan bangod sa inaway. Gilayon nga nag-organisar ang mga utod sing regular nga mga miting kag mga pagtuon sa Biblia sa sina nga lugar.

 Sang 2009, nabalitaan sang sanga talatapan nga may mga tawo sa kagulangan sang Guinea nga nagapangangkon nga mga Saksi ni Jehova. Nagpadala ang sanga sing mga brother para mangusisa, kag natukiban nga may isa ka tigulang nga brother nga nagpauli sa sini nga lugar sang magretiro sia. Antes sia mapatay, may pila ka lalaki nga nadumalahan niya sing pagtuon. Isa sa ila ang nagtuo kay Jehova kag ginpaambit niya ang iya natun-an sa Biblia sa iban. Naghiwat sia sing mga miting nga ginagamit ang mga publikasyon sang napatay nga brother. Ginasimba na nila si Jehova sa sulod sang 20 ka tuig antes sila nasapwan sang isa ka manugbantala. Nagpadala gilayon ang sanga sing mga utod para buligan sila sa espirituwal. Sang 2012, ang nagtambong sa Memoryal sang kamatayon ni Jesus 172.

Sining karon lang, madamo sang ‘karnero nga nadula’ ang nasapwan liwat. Ini sila amo ang mga napahilayo ukon ginsikway sa kongregasyon pero nagliso kag nagbalik sa kamatuoran. Malipayon gid sila nga gin-abiabi sang katawhan ni Jehova.—Luc. 15:11-24.

Ang Sinsero nga mga Muslim Nagbaton sang Kamatuoran

Samtang ginapaambit ni apostol Pablo ang maayong balita sa iban, “nangin tanan nga butang [sia] sa tanan nga sahi sang tawo.” (1 Cor. 9:22, 23) Sing kaanggid, ginpasibu man sang mga alagad ni Jehova sa Sierra Leone kag Guinea ang ila presentasyon para mabuyok ang lainlain nga tawo. Halimbawa, binagbinaga kon paano ang pila ka manugbantala nangatarungan sa bukas sing panghunahuna nga mga Muslim, ang pinakadaku nga relihion sa duha ka pungsod.

Ang isa anay ka Muslim nga si Saidu Juanah nagpaathag: “Ang mga Muslim nagapati nga gintuga si Adan halin sa  yab-ok pero nagakabuhi na sia sadto sa paraiso sa langit. Para mahangpan nila kon ano ang husto, ginapamangkot ko sila, ‘Diin naghalin ang yab-ok?’

“‘Sa duta,’ sabat nila.

“‘Ti sa diin ayhan gintuga si Adan?’ sugpon ko.

“‘Sa duta,’ sabat nila.

“Para ipadaku ang punto, ginabasa ko ang Genesis 1:27, 28 kag nagapamangkot, ‘May mga bata bala ang mga tinuga sa langit?’

“‘Wala. Ang mga anghel indi mga lalaki ukon babayi,’ sabat nila.

“‘Sang ginsugo sang Dios sanday Adan kag Eva nga magpamata, sa diin ayhan sila?’ pamangkot ko.

“‘Sa duta,’ sabat nila.

“‘Gani kon ibalik sang Dios ang Paraiso, sa diin ayhan ini?’ pamangkot ko.

“‘Diri sa duta,’ sabat nila.”

Naghinakop si Saidu, “Ini nga pangatarungan base sa Kasulatan nagpahulag sa madamo nga sinsero nga Muslim nga padayon nga mamati kag magbaton sing mga literatura sa Biblia.”

Binagbinaga si Momoh, isa ka negosyante nga Muslim nga nagahandum nga mangin Imam. Sang nangatarungan sa iya base sa Kasulatan ang mga Saksi nga misyonero, napukaw ang iya interes. Nagtambong sia sa pila ka bahin sang sirkito nga asembleya kag nanamian sa iya nabatian. Pagligad sang apat ka adlaw, sia kag ang iya asawa nga si Ramatu, kag ang ila lima ka bata nagtambong sa Memoryal sang kamatayon ni Jesus. Dayon, gintun-an sing maayo ni Momoh ang Biblia. Pagligad sang pila ka pagtuon, gin-untatan niya ang pagbaligya sing sigarilyo. Ginsilingan niya ang iya mga kostumer nga makahalalit ang sigarilyo kag wala ini ginakahamut-an sang Dios. Gintun-an man niya sa Biblia ang iya asawa kag kabataan sa ila balaligyaan.  Kon may magbakal sa tion sang ila pangpamilya nga pagtuon, ginapapungko niya anay ang kostumer, ginapahulat, kag ginasilingan nga importante gid para sa ila ang pagtuon. Sang ginparehistro nila ni Ramatu ang ila pag-asawahay, ginpamatukan gid sila sang ila mga pamilya. Pero maisugon nila nga ginpanaksihan ang ila mga paryente, nga sang ulihi nagtahod sa ila maayo nga paggawi. Nabawtismuhan si Momoh sang 2008, kag si Ramatu sang 2011.

Pagsakdag sa Pagkasagrado sang Dugo

Maisugon nga ginasakdag sang katawhan ni Jehova ang iya talaksan sa moral, lakip ang iya pagtamod sa dugo. (Binu. 15:29) Madamo karon nga eksperto sa medisina sa Sierra Leone kag Guinea ang nagatahod sa sini nga panindugan.

Ginapalig-on sang mga brother ang isa ka sister sa ospital

 Sang 1978, nagpanagtag ang mga utod sang bukleta nga Jehovah’s Witnesses and the Question of Blood sa mga doktor, nars, tagdumalahan sang ospital, abogado, kag hukom sa bug-os nga Sierra Leone. Wala madugay, may isa ka sister nga nag-internal bleeding sang manugbata na. Indi magbulong ang mga doktor kon indi sia magpatughong sing dugo. Pero, may isa ka doktor nga nagbulig sa iya bangod sa mapuslanon kag lohikal nga impormasyon nga iya nabasa sa bukleta nga Blood. Nagbun-ag ang sister sing isa ka mapagros nga lapsag nga lalaki kag madasig nga nakarekober.

Sang mga 1991, nabasa ni Dr. Bashiru Koroma, manug-opera sa Kenema Hospital, ang brosyur nga How Can Blood Save Your Life? Nagdayaw gid sia sa kaundan sini, gani nagtuon sia sa Biblia kag nagtambong sa Cristianong mga miting. Sang naaksidente ang isa ka nuebe anyos nga bata nga lalaki nga Saksi kag nagisi ang iya ahi (spleen), indi mag-opera ang mga doktor kon indi sia pagtughungan sing dugo. Ginsilingan nila ang ginikanan sang bata, “Dal-a na lang na ang inyo bata pauli kag hulata nga mapatay!” Ginpalapitan sang mga ginikanan si Dr. Koroma, kag nagmadinalag-on ang iya operasyon sa bata.

Sang ulihi, si Dr. Koroma nangin Brother Koroma—maisugon nga manugpangapin sang pagbulong nga wala nagagamit sing dugo. Bangod sini, ginlikawan sia sang iban nga doktor, pero halos tanan niya nga pasyente nagaayo. Sang ulihi, nagapabulig na sa iya ang iban nga doktor sa mabudlay nga mga operasyon.

Sugod sang 1994, ang Hospital Information Desk sa sanga sa Freetown nagporma sing mga Hospital Liaison Committee sa Sierra Leone kag sa Guinea. Ini nga mga komite mahigugmaon nga nagabulig sa mga Saksi nga may masakit kag nagkumbinsi sa madamo nga eksperto sa medisina nga tahuron ang aton tindog parte sa dugo.