Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 SIERRA LEONE KAG GUINEA

Mas Malahalon Pa sa mga Brilyante

Tamba Josiah

Mas Malahalon Pa sa mga Brilyante
  • NATAWO 1948

  • NABAWTISMUHAN 1972

  • MALIP-OT NGA BIOGRAPIYA Nagatrabaho sa minahan sang brilyante antes nagsulod sa kamatuoran. Miembro sia karon sang Komite sang Sanga sang Sierra Leone.

SANG 1970, nagtrabaho ako sa isa ka minahan nga ang tag-iya taga-Britanya sa Tongo Fields, isa ka lugar sa aminhan sang Kenema nga madamo sing brilyante. Kon wala ako sing obra, nagapangita man ako sing brilyante. Kon may makita ako, nagakadto ako sa Kenema para ibaligya ini kag magpangalipay.

Sang 1972, may nakilala ako nga mga Saksi ni Jehova kag nagtuon kami sa Biblia. Pagligad sang lima ka bulan, nakalipikar ako para sa bawtismo. Bangod wala na ako sing bakasyon, ginpangabay ko ang akon kaupod sa trabaho nga buslan anay ako kay matambong ako sa distrito nga kombension kag magpabawtismo. Nagpasugot sia sa kondisyon nga ihatag ko sa iya ang isa ko ka semana nga sueldo. Mas importante sa akon ang bawtismo, gani nagsugot dayon ako. Pagbalik ko halin sa kombension, ginsilingan niya ako nga indi ko na lang pag-ihatag ang akon sueldo kay husto ang ginhimo ko nga mag-alagad  sa Dios. Pagligad sang anom ka bulan, ginbiyaan ko ang akon obra nga daku sing sueldo para magtipon sing bahandi sa langit subong espesyal payunir.—Mat. 6:19, 20.

Sa sulod sang 18 ka tuig nag-alagad ako bilang espesyal payunir kag manugtatap sang sirkito sa lainlain nga bahin sang pungsod. Napangasawa ko si Christiana, mainunungon kag masinakdagon nga tiayon, kag ginpakamaayo kami sing bata nga babayi, si Lynette.

Handum ko gid sadto nga makakita sing literal nga mga brilyante, pero subong mas malahalon pa ang nasapwan ko—ang espirituwal nga manggad

Sa tion sang inaway sibil sa Sierra Leone, nagpayunir kami ni Christiana sa Bo, nga sakop sang isa pa ka lugar nga may daku nga minahan sang brilyante. Nakasapo kami diri sing madamo nga espirituwal nga “brilyante”—ang matuod nga Cristianong mga disipulo. Sa sulod sang apat ka tuig, ang amon kongregasyon nagdamo sing kapin sa 60 porsiento. Karon ang Bo may tatlo na ka mainuswagon nga kongregasyon.

Sang 2002, gin-agda ako nga mangin miembro sang Komite sang Sanga sang Sierra Leone. Nag-istar kami ni Christiana malapit sa Bethel. Nagabiyahe ako kada adlaw pakadto sa Bethel, si Christiana naman nagaalagad bilang espesyal payunir. Si Lynette nagaboluntaryo man sa Bethel bilang translator sang lenguahe nga Krio.

Handum ko gid sadto nga makakita sing literal nga mga brilyante, pero subong mas malahalon pa ang nasapwan ko—ang espirituwal nga manggad. Nakakutkot man ako sing 18 ka espirituwal nga “brilyante,” ukon matuod nga Cristianong mga disipulo. Indi gid matakus ang pagpakamaayo ni Jehova sa akon!