Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 SIERRA LEONE KAG GUINEA

1991-2001 “Horno sang Kapipit-an”—Isa.48:10 (Bahin 2)

1991-2001 “Horno sang Kapipit-an”—Isa.48:10 (Bahin 2)

Ginsalakay ang Bethel!

Sang Pebrero 1998, ang mga soldado sang gobierno kag mga tropa sang Economic Community of West African States Monitoring Group (ECOMOG) naglansar sing kampanya nga palayason ang mga rebelde sa Freetown. Makapasubo nga isa ka brother ang napatay bangod naasikan sia sing bomba sang nagalapuyot ang inaway.

Mga 150 ka manugbantala ang nagdangop sa puluy-an sang mga misyonero sa Kissy kag Cockerill. Si Laddie Sandy, isa sa duha ka guardia sa Bethel kon gab-i, nagsaysay: “Gab-i na gid sadto samtang naga-duty kami ni Philip Turay, sang may duha ka armado nga RUF nga nagkadto sa Bethel kag ginmanduan kami nga buksan ang kristal nga mga puertahan sang lobby. Sang nanago kami ni Philip, gintiniro nila ang kandado sang puertahan. Katingalahan nga wala ini maguba, kag wala nila mapensaran nga tiruhon ang kristal. Bangod indi sila makasulod, naghalin na lang sila.

“Pagligad sang duha ka gab-i, nagbalik ang mga rebelde upod ang mga 20 pa ka armado nga tawo. Ginpahibalo namon gilayon ang pamilya Bethel kag nagdalagan kami sa ginhanda namon nga palanaguan sa basement. Tanan kami nga pito nanago sa likod sang duha ka dalagku nga bariles, nga nagakurog sa kahadlok. Gintiniro sang mga rebelde ang kandado kag nakasulod sila. ‘Pangitaa ang mga Saksi ni Jehova, kag gutla ang ila mga liog,’ singgit sang isa sa ila. Samtang ginaransak nila ang bilding sa sulod sang pito ka oras, nagakuob kami kag wala gid nagagahod. Sang makuha na nila ang ila gusto, naghalin sila.

“Ginpanghimos namon ang amon mga pagkabutang kag nagdalagan pakadto sa puluy-an sang mga misyonero sa Cockerill—ang puluy-an Bethel sang una. Samtang sa  alagyan ginkawatan kami sang lain naman nga grupo sang mga rebelde. Pag-abot namon sa puluy-an sang mga misyonero grabe gid ang amon kahadlok, pero nalipay kami kay wala kami maano. Pagkatapos nga makapahuway sing pila ka adlaw, nagbalik kami sa Bethel agod manglimpyo.”

Pagligad sang duha ka bulan, sang kontrolado na sang ECOMOG ang siudad, nagbalik ang mga misyonero halin sa Guinea. Pero wala sila makahibalo nga indi sila magdugay diri.

Operasyon Pamatyon Tanan

Pagligad sang walo ka bulan, sang Disiembre 1998, ginatos ka delegado sa Freetown National Stadium ang nalipay sa pagtambong sa “Diosnon nga Pagkabuhi,” Distrito nga Kombension. Gulpi lang nga may nagsigabong kag nagpuog ang aso sa mga pukatod. Nagbalik ang mga rebelde!

Pagkasunod nga mga inadlaw, naglala na gid ang sitwasyon sa Freetown. Ang Komite sang Sanga nag-arkila sing gamay nga eroplano kag gin-ibakwit ang 12 ka misyonero, 8 ka Bethelite, kag 5 ka boluntaryo sa konstruksion pakadto sa Conakry. Pagligad sang tatlo ka adlaw, sang Enero 6, 1999, naglansar ang mga rebelde sing kampanya nga ginatawag, Operasyon Pamatyon Tanan. Ginsalakay nila ang Freetown. Ginmasaker ang mga 6,000 ka sibilyan. Ginpang-utdan nila sing mga butkon kag batiis ang bisan sin-o nga makita nila, ginpang-kidnap ang ginatos ka kabataan, kag ginpangguba ang linibo ka bilding.

Ang isa ka pinalangga nga brother nga mapintas nga ginpatay amo si Edward Toby. Sobra 200 ka manugbantala nga na-trauma ang ginpadayon sa Bethel ukon sa puluy-an sang mga misyonero sa Cockerill. Ang iban nagpanago sa ila mga balay. Ang mga Saksi nga nagdangop sa puluy-an sang mga misyonero sa Kissy, nga ara sa sidlangan sa punta sang banwa, nagakinahanglan gid sing mga bulong. Pero delikado gid nga mag-agi sa siudad. Sin-o ang mangisog  nga magkadto didto? Nagboluntaryo gilayon sanday Laddie Sandy kag Philip Turay, ang maisog nga mga guardia sang Bethel.

“Kagamo gid sang siudad,” siling ni Philip. “Ginapapundo sang mga rebelde ang mga tawo sa mga checkpoint kag ginapahog sila. Limitado ang amon pagbiyahe bangod may ginapatuman nga curfew halin sa hapon asta mag-aga. Pagligad sang duha ka adlaw, nakalab-ot kami sa puluy-an sang mga misyonero sa Kissy, kag nakita namon nga ginransak ini kag ginsunog.

“Sang naglibot kami, nakita namon ang isa naton ka utod nga si Andrew Caulker, nga may malubha nga pilas sa ulo. Gingapos sia sang mga rebelde kag sulitsulit nga ginwasay. Katingalahan nga nabuhi pa sia kag nakapalagyo. Gindala namon sia dayon sa ospital, kag didto sia  amat-amat nga nag-ayo. Sang ulihi nag-alagad sia bilang regular payunir.”

(Wala pa tuo) Laddie Sandy, Andrew Caulker, kag Philip Turay

Ang iban nga mga Saksi naluwas sa kamatayon kag kasamaran bangod sa ila Cristianong neutralidad. Ang isa ka brother nagsaysay: “Ginpilit kami sang mga rebelde nga magpulos sing puti nga bandana kag magsaot sa dalan para suportahan ang ila kausa. ‘Kon indi kamo magsunod, pang-utdon namon ang inyo butkon ukon batiis ukon patyon kamo,’ siling nila. Bangod sa kahadlok, nangamuyo kami sing hipos kay Jehova. Sang nakita kami sang amon kaingod nga pamatan-on nga kunsabo sang mga rebelde, ginsilingan niya ang kumander: ‘“Brother” na sia namon.’ Wala sia nagaentra sa pulitika, gani kami na lang ang masaot para sa iya.’ Nagpasugot ang kumander kag naghalin. Dayon nagpauli kami.”

Sang nagkalma na sa siudad, mahalungon nga ginpadayon sang mga utod ang mga miting kag pagbantala. Ginasuksok sang mga manugbantala ang ila badge card para makilala sila sa mga checkpoint. Samtang nagahulat sila sa malaba nga pila, natun-an nila kon paano sugdan ang pag-istoryahanay parte sa Biblia.

Samtang nagakaubos ang mga suplay sang siudad, ang sanga sa Britanya nagpadala sing 200 ka karton sang relief goods. Halin sa Conakry nagkadto sanday Billie Cowan kag Alan Jones sa Freetown para eskortan ang suplay sa pag-agi sa mga checkpoint. Nakaabot ini sa Bethel antes sang curfew sa gab-i. Si James Koroma ang nagadul-ong sang mga sulat sa Conakry. Pagbalik, may dala sia nga mga literatura kag iban pa nga kinahanglanon. Ang iban sining espirituwal nga pagkaon ginpadala sa mga manugbantala sa nabaw-ing nga mga lugar sa Bo kag Kenema.

Pag-abot sang relief goods sa Freetown

Sang Agosto 9, 1999, ang mga misyonero sa Conakry amat-amat nga nagbalik sa Freetown. Pagkasunod nga tuig, ginpalayas sang puersa militar sang Britanya ang mga rebelde  sa Freetown. May mga pag-ilinaway pa gid man, pero sang Enero 2002, gindeklarar nga natapos na ang inaway. Subong resulta sang 11 ka tuig nga inaway, 50,000 ang napatay, 20,000 ang nadis-ebol, 300,000 ka puluy-an ang naguba, kag 1.2 milyones ang napilitan nga maghalin sa ila lugar.

Kamusta ang organisasyon ni Jehova? Gin-amligan kag ginpakamaayo gid ini ni Jehova. Sa tion sang inaway, mga 700 ang nabawtismuhan. Bisan pa ginatos ka Saksi ang nagpalagyo, nagdamo sing 50 porsiento ang manugbantala sa Sierra Leone kag sobra 300 porsiento naman sa Guinea! Labaw sa tanan, nahuptan sang katawhan sang Dios ang ila integridad. Sa “horno sang kapipit-an,” nagpakita sila sing malig-on nga paghiusa kag gugma bilang mga Cristiano kag “wala [sila] nagauntat sa pagpanudlo kag sa pagbantala sing maayong balita.”—Isa. 48:10; Binu. 5:42.