Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 SIERRA LEONE KAG GUINEA

1991-2001 “Horno sang Kapipit-an”—Isa.48:10 (Bahin 1)

1991-2001 “Horno sang Kapipit-an”—Isa.48:10 (Bahin 1)

 Inaway Sibil

Sang dekada 1980, ang problema sa sosiedad, pulitika, kag ekonomiya nagresulta sa pag-ilinaway sa bug-os nga Katundan nga Aprika. Sang nakalab-ot ang inaway sa Liberia, madamo ang nagpalagyo sa Sierra Leone. Gani naghimo sing kahimusan ang sanga nga padayunon anay sa mga balay kag Kingdom Hall ang mga Saksi nga refugee kag gin-atipan sila sang mga kauturan.

Bisan pa mabudlay ini nga mga tion para sa mga refugee, kon kaisa may makahalam-ot man sila nga eksperiensia. Ang madugay na nga misyonero nga si Isolde Lorenz nagsaysay: “Ang isa ka bata nga lalaki ginsugo sang iya amay nga initon ang pagkaon sa dabok sa kilid nayon sang Kingdom Hall, nga sakop sang propiedad sang sanga. Pagbalik sang bata, ginsilingan niya ang iya amay nga wala sila sing pagkaon subong. Namangkot ang amay kon ngaa. ‘Kay man,’ siling sang bata, ‘Ginluwas ako ni Jehova sa baba sang leon!’ Ano ang natabo? Sang nagapabalik na sia dala ang pagkaon, nasugata niya si Lobo, ang daku pero mabuot nga German shepherd nga ginapanag-iyahan sang sanga. Hinadlukan gid ang bata. Gani para tabugon ang ido, gintaya niya ang iya kamot nga may pagkaon. Abi naman ni Lobo ginatanyag ini sa iya, gani ginkaon niya ini!”

Sang Marso 23, 1991, ang inaway sa Liberia nakalab-ot sa dulunan sang Sierra Leone, nga nagresulta sa 11 ka tuig nga inaway sibil. Ang rebelde nga grupo nga ginatawag Revolutionary United Front (RUF) madasig nga nakalab-ot sa Kailahun kag Koindu, gani ang kalabanan nga taga-Sierra Leone nagpalagyo sa Guinea. Lakip sa ila ang mga 120 ka  kauturan. Ang iban nga Saksi nga refugee halin sa Liberia nalagyo sa Sierra Leone antes pa makaabot ang mga rebelde.

“Sa sulod sang pila ka bulan, madamo nga kauturan nga kapoy, maniwang, kag gutom ang nag-inabot sa Bethel sa Freetown,” siling ni Billie Cowan, ang koordenitor sang Komite sang Sanga sadto. “Madamo sa ila ang nakaeksperiensia sing makasiligni nga pagpamatay kag nagkaon sing ilahas nga mga tanom para indi magutman. Ginhatagan namon sila sing pagkaon kag panapton kag gin-atipan ang ila pamilya kag mga interesado nga kaupod nila. Gin-amuma sang kauturan ang mga refugee kag ginpadayon sa ila mga balay. Ang mga Saksi nga refugee nangin masako dayon sa pag-alagad sa latagon kag pagbulig sa lokal nga kongregasyon. Ang kalabanan sa ila nakabalik sang ulihi sa ila lugar, pero sang ari sila diri, napalig-on gid nila kami!”

Ang Sierra Leone nag-antos sing 11 ka tuig nga inaway sibil

Paghatag sing Lugpay kag Paglaum

Ang sanga talatapan nagpadala sing pagkaon, bulong, materyales kag kagamitan sa pagtukod, kag mga galamiton sa pagkaon para sa mga Saksi sa mga refugee camp sa nabagatnan nga Guinea. Nagpadala man ang Pransia sing madamo nga bayo. “Ang akon kabataan nagasaot, nagakinanta, kag nagadayaw kay Jehova,” sulat sang isa ka amay. “May bag-o sila nga mga bayo nga suksukon sa mga miting!” Ang iban nga utod nagsiling nga mas manami pa subong ang ila mga bayo!

Pero indi lang ini ang kinahanglan sang mga refugee. Si Jesus nagsiling: “Ang tawo mabuhi, indi sa tinapay lamang, kundi sa tagsa ka pulong nga nagagua sa baba ni Jehova.” (Mat. 4:4) Gani ang sanga talatapan nagpadala sing mga literatura sa Biblia sa amo nga lugar kag nag-organisar sing  mga asembleya kag kombension. Nagpadala man sila sing mga payunir kag mga nagalakbay nga manugtatap.

Sang magduaw ang manugtatap sang sirkito nga si André Baart sa Koundou, Guinea, may nakilala sia nga opisyal sang refugee camp kag gin-imbitar sia nga maghatag sing pamulongpulong sa Biblia. Mga 50 ang nakapamati sang tema ni André nga “Magdangop kay Jehova,” pasad sa Salmo 18. Pagkatapos sang pamulongpulong, nagtindog kag naghambal ang tigulang nga babayi. “Napahalipay mo gid kami,” siling niya. “Indi masolbar sang bugas ang amon mga problema, pero ginapakita sang Biblia kon paano kami maglaum sa Dios. Salamat gid sa paghatag sa amon sing lugpay kag paglaum.”

Sang gin-asayn ang mga misyonero nga sanday William kag Claudia Slaughter sa Guékédou, Guinea, nangin mainit sa espiritu ang kongregasyon nga may kapin sa 100 ka refugee. (Roma 12:11) “Madamo nga pamatan-on nga lalaki ang nagalab-ot sing espirituwal nga tulumuron,” siling ni William. “Kon indi mahatag sang isa ang iya bahin sa Teokratikong Eskwelahan Para sa Ministeryo, 10 asta 15 ka pamatan-on nga brother ang nagaboluntaryo sa pagtal-us. Dalagku nga mga grupo ang makugi nga nagabantala. Ang pila sa sining makugi nga mga pamatan-on nangin espesyal payunir kag nagalakbay nga manugtatap sang ulihi.”

Pagtukod Bisan Pa May Inaway

Wala madugay pagsugod sang inaway sibil, ang kauturan sa Freetown nakabakal sing sobra tunga sa ektarya nga duta sa 133 Wilkinson Road, mga pila ka gatos ka metros halin sa sanga talatapan. “Gusto namon ini patindugan sing bag-o nga puluy-an Bethel ugaling may inaway,” siling ni Alfred Gunn. “Bangod nagabisita sa amon sadto si Lloyd  Barry sang Nagadumala nga Hubon, ginkonsulta namon sia. Siling niya, ‘Kon magpaupang kita sa inaway, wala gid kita sing mahimo!’ Ang iya makapahunahuna nga sabat naghatag sa amon sing kaisog nga sugdan ang plano.”

Ginatos ka utod ang nagtrabaho sa proyekto, nga nagalakip sang kapin sa 50 ka boluntaryo halin sa 12 ka pungsod kag mga kauturan halin sa lokal nga mga kongregasyon. Nagsugod ini sang Mayo 1991. “Nagdayaw gid ang mga nagatan-aw sa de-kalidad nga mga hallow block nga ginahimo sa site. Ang balayan nga human sa salsalon tuhay gid sangsa lokal nga mga bilding,” siling ni Tom Ball, ang manugtatap sang konstruksion. “Pero mas nagdayaw pa gid sila sang makita nila nga nagaobra sing malipayon kag nahiusa ang puti nga mga dumuluong kag itom nga mga tumandok.”

Sang Abril 19, 1997, malipayon nga nagtipon ang lainlain nga rasa sang tawo para sa dedikasyon sang bag-o nga pasilidad sang sanga. Pagligad sang isa ka bulan, pagkatapos sang lima ka tuig nga inaway sa mga kaumhan, gin-atake sang RUF ang Freetown.

Pagpatindog sing sanga sa Freetown; ang sanga karon

Pag-atake sa Freetown

Linibo ka miembro sang RUF nga nagaulukay ang buhok kag nagapulos sing pula nga bandana ang nag-atake sa siudad, nangawat, nanglugos, kag nagpamatay. “Makahaladlok gid ang sitwasyon,” siling ni Alfred Gunn. “Ginpaibakwit gilayon ang kalabanan nga misyonero. Ang upod ko nga pinakaulihi nga nag-ibakwit amo sanday Billie kag Sandra Cowan, Jimmie kag Joyce Holland, kag si Catherine.

“Nangamuyo kami upod sa lokal nga mga Bethelite nga nagboluntaryo nga magpabilin, dayon naghingagaw kami sa evacuation point. Sa alagyan pa lang ginpadulog kami sang mga 20 ka hubog nga mga rebelde. Sang ginhatagan namon sila sing mga magasin kag kuarta, ginpalakat nila kami. Upod sa kapin 1,000 ka nagpalalagyo, nagtipon kami  sa isa ka checkpoint nga protektado sang armado nga mga U.S. marine. Dayon ginpasakay kami sa helikopter sang militar pakadto sa barko sang mga U.S. Navy. Ang opisyal sang barko nagsiling sang ulihi nga amo ini ang pinakadaku nga grupo sang mga sibilyan nga ginbuligan sang U.S. Navy halin sang Vietnam War. Pagkadason nga adlaw, ginpasakay naman kami sa helikopter pakadto sa Conakry, Guinea. Didto naghimo kami sing temporaryo nga sanga talatapan.”

Sanday Alfred kag Catherine Gunn nalakip sa mga gin-ibakwit

Nabalaka gid ang mga misyonero kon ano na ang natabo sa Freetown. Sang ulihi, may nag-abot nga sulat nga nagasiling: “Bisan pa may ginamo, nagapanagtag kami gihapon sing Kingdom News Num. 35, nga ‘Magahigugmaanay Pa Ayhan ang Tanan nga Tawo?’ Madamo ang nagbaton, kag may mga rebelde pa gani nga nagtuon sa Biblia. Gani determinado kami nga mangin makugi pa gid sa pagbantala.”

Si Jonathan Mbomah, nga isa ka manugtatap sang sirkito, nagsiling: “Naghiwat pa gani kami sing special assembly sa Freetown. Ang programa makapalig-on gid amo nga nagbiyahe ako pakadto sa Bo kag Kenema para maghiwat man sini didto. Ang mga utod nga naapektuhan sang inaway nagpasalamat gid kay Jehova sa sining espirituwal nga pagkaon.

“Sang ulihi nga bahin sang 1997, naghiwat kami sing distrito nga kombension sa National Stadium sa Freetown. Sang katapusan nga adlaw sang programa, nagsulod sa istadyum ang mga rebelde kag ginmanduan kami nga maghalin. Nakitluoy kami nga patapuson lang ang programa. Pagkatapos sang madugay nga pag-istoryahanay, nagpasugot sila kag naghalin. Sobra 1,000 ang nagtambong sa kombension kag 27 ang nabawtismuhan. Bisan pa delikado ang pagbiyahe, ang pila ka utod nagkadto sa Bo para mamati liwat sa programa. Makalilipay kag makapalig-on gid ini nga mga kombension!”