Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 SIERRA LEONE KAG GUINEA

Determinado sa Pag-alagad kay Jehova

Philip Tengbeh

Determinado sa Pag-alagad kay Jehova
  • NATAWO 1966

  • NABAWTISMUHAN 1997

  • MALIP-OT NGA BIOGRAPIYA Refugee nga nagbulig sa pagtukod sang lima ka Kingdom Hall.

SANG 1991, nalagyo kami sang akon asawa nga si Satta sang ginsalakay sang mga rebelde ang amon lugar nga Koindu, Sierra Leone. Sa sulod sang walo ka tuig, nag-istar kami sa lainlain nga refugee camp. Sa sini nga mga kampo, ginbatas namon ang kakulang sing pagkaon, mga balatian, kag lapnag nga imoralidad.

Sa kada kampo nagapangabay kami sa mga awtoridad sing duta para patindugan sing Kingdom Hall. Kon kaisa nagapasugot sila, kon kaisa wala man. Apang pirme kami nagapangita sing paagi nga makatipon para sa pagsimba. Determinado gid kami nga alagdon si Jehova. Sang ulihi, nakatukod kami sing apat ka Kingdom Hall sa mga kampo.

Sang natapos ang inaway, indi kami makabalik sa amon balay. Daw indi na maistaran ang Koindu bangod sa tinuig nga inaway. Gani ginpasaylo kami sa iban nga kampo malapit sa Bo. Diri namon gintukod ang amon ikalima nga Kingdom Hall sa bulig sang pundo nga ginhatag sang sanga talatapan.