Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

 SIERRA LEONE KAG GUINEA

Gintawag Nila Sia nga “Bible” Brown

William R. Brown

Gintawag Nila Sia nga “Bible” Brown
  • NATAWO 1879

  • NABAWTISMUHAN 1908

  • MALIP-OT NGA BIOGRAPIYA Spearheaded the early preaching work in West Africa.

SAMTANG nagatrabaho sadto sa Panama Canal sang 1907, nabatian ni William sa dalan ang pamulongpulong ni Isaiah Richards, isa ka Estudyante sang Biblia, ang tawag sadto sa mga Saksi ni Jehova. Ginbase ni Isaiah ang iya pamulongpulong sa “Chart of the Ages,” isa ka diagram nga nagapaathag sa katuyuan sang Dios. Ginbaton gilayon ni William ang kamatuoran kag nagbalik sa Jamaica agod ipaambit ini sa iya iloy kag utod nga babayi. Sang ulihi, nangin Estudyante sang Biblia man sila.

Sa sulod sang pila ka tion, si Brother Brown nag-alagad sa Panama City, Panama. Nakilala niya diri si Evander J. Coward, nagalakbay nga tiglawas sang mga Estudyante sang Biblia nga nagaduaw sa Panama para magpamulongpulong. Mapagsik sia kag maayo nga humalambal, kag nagadugok ang mga tawo para mamati sa iya. Sang nakita niya si William nga makugi  sa kamatuoran, gin-agda niya ini nga updan sia sa pagbantala sa Trinidad.

Sa masunod nga kapin sa napulo ka tuig, ginlibot sang payunir nga si William ang bug-os nga West Indies kag ginpalig-on ang magagmay nga mga grupo. Sang 1920, nagpakasal sila ni Antonia, isa ka matutom nga sister. Duha ka adlaw pagkatapos sang ila kasal, nagpanakayon sila pakadto sa gamay nga isla sang Montserrat sa Leeward Islands, dala ang “Photo-Drama of Creation”—apat ka bahin nga pelikula kag slide nga nabase sa Biblia. Nagbantala man sila sa mga isla sang Barbados, Dominica, kag Grenada. Malipayon ang ila honeymoon samtang nagaalagad kay Jehova.

Pagligad sang duha ka tuig, nagsulat si William kay Joseph F. Rutherford, ang nagadumala sadto sa hilikuton sang katawhan ni Jehova, nga nagasiling: “Sa bulig ni Jehova napanaksihan ko ang kalabanan sa Caribbean Islands kag madamo ang nangin disipulo. Balikan ko bala sila?” Pagligad sang pila ka adlaw, nagsabat si Brother Rutherford: “Kadto ka sa Sierra Leone, Katundan nga Aprika, upod sa imo asawa kag bata.”

Sa sulod sang 27 ka tuig nga pag-alagad ni Brother Brown upod sa iya pamilya sa Katundan nga Aprika, mas gusto niya magua kag magbantala sangsa magtener lang sa opisina. Bangod ginapadaku niya ang importansia sang Biblia, gintawag sia sang mga tawo nga “Bible” Brown.

Sang 1950, ang 71 anyos nga si William Brown nagbalik sa Jamaica upod sa iya asawa para magpayunir. Nagpayunir si William asta matapos ang iya dutan-on nga kabuhi sang 1967. Nanamian gid sia magpayunir! Para sa iya isa ini sa pinakadaku nga pribilehiyo nga matigayon sang isa ka tawo.