Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

2014 Tuigan nga Libro sang mga Saksi ni Jehova

Sang Nagligad nga Isa ka Gatos ka Tuig—1914

Sang Nagligad nga Isa ka Gatos ka Tuig—1914

“NAGAPATI kami nga ang Tuig 1914 magahatag sing daku nga kahigayunan sa pagpahayag sang Kamatuoran sangsa nagligad nga tuig sang Pag-ani,” siling sang Enero 1, 1914, nga The Watch Tower. Ang tuig nga madugay na nga ginapaabot sang mga Estudyante sang Biblia nag-abot na gid man, gani nangin masako sila sa ministeryo. Subong resulta, minilyon ang nakabati sang mga saad sang Biblia sa sina nga tuig. Pero, tuhay naman ang ginhatagan sing igtalupangod sang kalibutan.

 Nangin Masingki Pa Gid ang Kalibutan

Sang maaga nga bahin sang 1914, ang isa sa pinakamasingki nga pagprotesta sang mga trabahador sa kasaysayan sang Estados Unidos nagresulta sa kamatayon sang mga lalaki, babayi, kag kabataan. Ang mga minero nga nagprotesta kag ang ila pamilya ginpahalin sa mga puluy-an nga ginapanag-iyahan sang kompanya, gani napilitan sila nga mag-istar sa mga tolda. Sang Abril 20, may pagpaniro nga natabo sa mga tolda malapit sa Ludlow, Colorado. Ginsunog ang mga tolda sang mga minero. Naakig gid ang mga minero sa sina nga rehiyon, gani nagbalos sila kag ginpamatay ang madamo nga guardia sang kompanya. Nagpasilabot ang mga soldado para mabalik ang kahim-ong.

Mas malala pa gid ang kahimtangan sa Europa. Sang Hunyo 28, gintiro sang 19 anyos nga Bosnian Serb nga si Gavrilo Princip si Archduke Francis Ferdinand sang Austria. Amo ini ang nagpaigrab sang Bug-os Kalibutan nga Inaway I. Sang hingapusan sang tuig, ang Bug-os Kalibutan nga Inaway I, nga kilala anay nga Daku nga Inaway, naghil-ob sa Europa.

Ang mga Kombension Nasentro sa Pagbantala

Bisan pa sa nagalala nga kahimtangan sang kalibutan, ginpalig-on sang mga Estudyante sang Biblia ang isa kag isa nga mangin mapisan sa pagbantala. Ang una nga kombension sang katawhan sang Dios sa Bagatnan nga Aprika nagsugod sang Abril 10. Ang pinakadamo nga nagtambong sa sina nga kombension 34. “‘Diutay nga panong’ gid man kami,” sulat ni William W. Johnston. “Halos katunga [sang nagtambong] ang ginbawtismuhan namon sa . . . Kombension. Walo ka sister kag walo ka brother ang nagsimbulo sang ila dedikasyon suno sa paagi nga gintudlo sang Ginuo.” Sa katapusan nga adlaw sang kombension, gin-istoryahan sang mga nagtambong kon paano pa gid pauswagon ang pagbantala sa Bagatnan nga Aprika. Subong, kapin sa 90,000 ka matutom nga manugbantala sa Bagatnan nga Aprika ang nakasaksi sa kadalag-an sinang ‘diutay nga panong.’

 Sang Hunyo 28, 1914, sang adlaw nga gintiro si Archduke Ferdinand, ang mga Estudyante sang Biblia nagtipon sa Clinton, Iowa, U.S.A. Sa sina nga kombension, sang Hunyo 30, si A. H. MacMillan nagsiling: “Kon gusto naton mabaton ang aton padya, dapat mangin masako kita sa paghimo sang kabubut-on sang Dios, maggua sa latagon tubtob posible, nga ginasugid ang mensahe sang pag-ani sa mga tawo.”

Ang “Photo-Drama” Nagganyat sa Minilyon

Ang “Photo-Drama of Creation” isa ka produksion sang ginrekord nga mga pamulongpulong sa Biblia kag musika nga ginadunganan sing de-kolor nga mga slide kag pelikula. Una ini nga ginpagua sa New York City sang Enero 11, 1914. Lima ka libo ang nagtambong, kag madamo ang wala ginpasulod bangod gutok na.

Duha ka tuig nga ginhanda ang “Photo-Drama of Creation,” pero “alang-alang pa ini kuntani nga ipasalida sang Enero,” siling sang The Watch Tower. Sa una nga anom ka bulan sang 1914, pila ka beses nga ginpanami sang mga utod ang “Photo-Drama.” Halimbawa, gindugangan ini sing introduksion nga may panaysayon ni Charles Taze Russell, gani nangin maathag kon sin-o ang isponsor sini nga palaguaon.

Sang nagbantog ang “Photo-Drama,” dulungan nga ginpasalida ini sa mga 80 ka siudad. Sang Hulyo 1914, nakalab-ot ini sa Great Britain, nga ginpasalida sa Glasgow kag London sa mga puluy-an nga puno sing tawo. Sang Septiembre, nakalab-ot ini sa Denmark, Finland, Germany, Sweden, kag Switzerland. Pagka-Oktubre, nakalab-ot ini sa Australia kag New Zealand. Sa kabilugan, sobra siam ka milyon ang nakatan-aw sang “Photo-Drama” sa una nga tuig sini.

Ang kada kopya sang “Photo-Drama” nagaunod sing ginatos ka slide, madamo nga rolyo sang pelikula, kag dinosena ka rekording. Mahal ang paghimo sang kopya sini, kag kinahanglan ang eksperto nga mga utod sa kada pagpasalida. Gani, ang kompleto nga “Photo-Drama” ginapagua lamang sa dalagku nga mga siudad. Para makatan-aw man ang sa mga uma, ang  mga Estudyante sang Biblia naghimo sing tatlo ka bersion sang ginpalip-ot nga “Photo-Drama.” Ang isa ka bersion, nga gintawag “Eureka Drama Y,” nagaunod sing de-kolor nga mga slide nga ginadunganan sang narekord nga mga pamulongpulong sa Biblia kag musika. Ang iban nga bersion, nga gintawag “Eureka Drama X” kag ang mas malip-ot nga “Eureka Family Drama,” nagaunod lamang sing mga rekording kag wala sing slide kag pelikula. Sa Estados Unidos, kapin sa 70,000 ang nakabenepisyo sa mga bersion sang “Eureka Drama” sang hingapusan sang 1914, wala pa apat ka bulan sang ginpagua ini.

Ang mga Colporteur kag mga Boluntaryo Nakigbahin sa Pagbantala

Bisan pa bag-o kag makawiwili ang hilikuton sang “Photo-Drama,” narealisar sang mga Estudyante sang Biblia nga prioridad nila ang iban nga porma sang pagbantala. Ang sulat ni Charles Taze Russell para sa tanan nga colporteur, ginatawag karon nga payunir, nagasiling: “Wala na sing iban nga porma sang pag-alagad ang nagapatubas sing mas madamo sa sining tion sang  Pag-ani. Bangod sini, wala namon ginapalig-on ang mga Colporteur nga makigbahin sa hilikuton sang Photo-Drama . . . May iban nga utod, nga mainunungon man sa Ginuo . . . nga makaalagad sa hilikuton sang Drama.”

Sang Enero 1914, ang kadamuon sang mga colporteur 850. Sa bilog nga tuig, ining makugi nga mga ebanghelisador nakapanagtag sing sobra 700,000 ka kopya sang Studies in the Scriptures. Ang Watch Tower nagpabutyag sing “mahigugmaon nga interes” sa mga colporteur kag ginpangabay ang mga bumalasa sini nga “palig-unon sila; kay ang ila kabuhi indi pirme mahapos.”

Ang iban nga Estudyante sang Biblia nagpanagtag sing mga tract sa madamo nga lenguahe. Sang 1914, nakapanagtag sila sing sobra 47 milyones ka kopya sang The Bible Students Monthly kag iban pa nga tract.

Natalupangdan gid ang hilikuton sang mga Estudyante sang Biblia. Lapnag ang ila pagbantala, kag wala sing bayad ang ila mga miting. Ang isa ka ministro sang Cristiandad nagsiling: “Sa ulihi, hunahunaon sang mga tawo nga sala na ang pagpangolekta. Ti ano na lang ang matabo sa aton? Pakahuy-an kita tanan ni Pastor Russell.”

Katapusan sang Panag-on sang mga Gentil

Nagapati ang mga Estudyante sang Biblia nga “ang panag-on sang mga Gentil,” nga ginsambit sa Lucas 21:24 (King James Version), matapos sa Oktubre 1, 1914. Samtang nagahilapit ang Oktubre, nagadugang ang ila kalangkag. Ang iban nga Estudyante sang Biblia nagadala pa gani sing countdown card para maisip nila ang pagligad sang inadlaw. Madamo ang nagahunahuna nga mapalangit sila sa sina nga petsa.

Sang aga sang Oktubre 2, 1914, nagsulod si Brother Russel sa dining room kag ginpahibalo ang pamilya Bethel: “Ang Panag-on sang mga Gentil nagligad na; natapos na ang adlaw sang ila mga hari.” Pamilyar sa sini nga mga tinaga ang iban nga nagtambong kay nabase ini sa ambahanon 171, sa ila songbook nga Hymns of the Millennial Dawn. Sugod sang 1879, ang mga Estudyante sang Biblia nagakanta “Ang panag-on sang  mga Gentil nagahingapos na,” pero indi na ini husto kay ang Panag-on sang mga Gentil, ukon “ang gintalana nga mga tion sang mga pungsod,” natapos na. (Luc. 21:24) Sang ulihi, ginbag-o ini sa aton mga songbook.

Ang countdown card nga “Be Thou Faithful Unto Death” gingamit sang iban para makapabilin sila nga matutom asta sa katapusan

Sang katapusan sang tuig, ang Mesianikong Ginharian malig-on nga natukod sa langit, kag ang pila ka Estudyante sang Biblia naghunahuna nga tapos na ang ila hilikuton. Wala sila makahibalo nga magasugod pa lang ang tion sang pagtilaw kag pag-ayag. Ang yeartext sang 1915 nga “Makainom bala kamo sa Akon kopa?” ginbase sa Mateo 20:22 sang King James Version. Ang “kopa” nga ginapatuhuyan ni Jesus nagalakip sa mga pagtilaw nga iya atubangon tubtob sa iya kamatayon. Ang mga Estudyante sang Biblia magaatubang sing mga pagtilaw gikan sa sulod kag gua sang kongregasyon. Diri mapamatud-an ang ila katutom kay Jehova.

Magtuon sing Dugang Pa

Ang 100 ka Tuig nga Kasaysayan sang Pagtuo

Subong nga tuig ang ika-100 nga anibersaryo sugod sang una nga ginpasalida ang ‘Photo-Drama of Creation,’ nga gindesinyo para pabakuron ang pagpati sa Biblia subong Pulong sang Dios.