Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Tito 1:1-16

BALAYAN SANG KAUNDAN

  • Mga panamyaw (1-4)

  • Magatangdo si Tito sang mga gulang sa Creta (5-9)

  • Sabdunga ang mga rebelyuso (10-16)

1  Halin kay Pablo, nga ulipon sang Dios kag apostol ni Jesucristo suno sa pagtuo sang mga pinili sang Dios kag sa sibu nga ihibalo tuhoy sa kamatuoran, nga nahisuno sa diosnon nga debosyon  kag pasad sa paglaum nga kabuhi nga wala sing katapusan+ nga madugay na nga ginsaad sang Dios nga indi makabutig;+  apang sa iya gintalana nga tion, ginpahibalo niya ang iya pulong paagi sa pagbantala nga gintugyan sa akon,+ suno sa sugo sang aton Manluluwas, ang Dios;  para kay Tito, nga isa ka matuod nga anak kag masigkatumuluo: Kabay nga mabaton mo ang wala tupong nga kaayo kag paghidait halin sa Dios nga aton Amay kag kay Cristo Jesus nga aton Manluluwas.  Ginbilin ko ikaw sa Creta agod matadlong mo ang mga butang nga may depekto* kag suno sa instruksion ko sa imo magtangdo ka sang mga gulang sa tagsa ka siudad:  Kon may lalaki nga hilway sa panumbungon, isa lang ang asawa, may tumuluo nga mga anak nga wala ginasumbong nga mapinatuyangon* ukon rebelyuso.+  Kay subong tulugyanan sang Dios, ang isa ka manugtatap dapat nga hilway sa panumbungon, indi puguso,+ indi madali maakig,+ indi palahubog, indi masingki,* wala nagatinguha nga mamentaha sa makagod kag indi bunayag nga paagi,  kundi dapat maabiabihon sia,+ mahigugmaon sa maayo, maligdong sing hunahuna,*+ matarong, mainunungon,+ may pagpugong sa kaugalingon,+  nagapanguyapot sing malig-on sa matutom nga pulong* may kaangtanan sa iya kalantip sa pagpanudlo,+ agod makapalig-on* sia paagi sa maayo* nga panudlo+ kag makasabdong+ sa mga nagahambal batok sa sini. 10  Kay madamo sang rebelyuso, mga palahambal sing wala pulos, kag mga nagapangdaya, ilabi na ang mga nagasakdag sang pagtuli.+ 11  Pahipusa sila, bangod padayon nila nga ginapukan sing bug-os ang mga panimalay paagi sa pagpanudlo sing mga butang nga indi nila dapat ipanudlo agod makapamentaha. 12  Ang isa sa ila, nga ila manalagna, nagsiling: “Ang mga taga-Creta butigon, makatalagam kag mabangis nga mga sapat, mga matamad nga sobra ka palakaon.”* 13  Matuod ina nga panaksi. Bangod gid sina, padayon sila nga sabdunga sing matigdas agod mangin mapagros sila sa pagtuo, 14  kag indi magpamati sa indi matuod nga mga sugilanon sang mga Judiyo kag sa mga sugo sang mga tawo nga nagtalikod sa kamatuoran. 15  Ang tanan nga butang matinlo sa mga tawo nga matinlo;+ apang sa mga tawo nga nadagtaan kag wala sing pagtuo, wala sing bisan ano nga matinlo, kay ang ila hunahuna kag ang ila konsiensia nadagtaan.+ 16  Ginapahayag nila sing dayag nga kilala nila ang Dios, apang ginapanghiwala nila sia paagi sa ila mga buhat,+ bangod makangilil-ad sila kag indi matinumanon kag wala ginakahamut-an para sa bisan ano nga sahi sang maayong buhat.

Footnote

Ukon “kulang.”
Ukon “indi masuweto.”
Ukon “wala nagapanakit.”
Ukon “may maayo nga panghunahuna; mahinantupon.”
Ukon “masaligan nga mensahe.”
Ukon “makalaygay.”
Ukon “makapapagros; mapuslanon.”
Ukon “dahakdahak.”