Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Salmo 80:1-19

BALAYAN SANG KAUNDAN

  • Manugbantay sang Israel nangabay sang pagpasag-uli

    • “O Dios ko, ipasag-uli kami” (3)

    • Israel subong puno sang ubas (8-15)

Para sa pangulo sang musika; sa tono sang “Ang mga Liryo.” Isa ka pahanumdom. Salmo ni Asaf.+ Isa ka ambahanon. 80  Pamatii kami, O Manugbantay sang Israel, Ikaw nga nagatuytoy kay Jose kaangay sang isa ka panong.+ Ikaw nga nagapungko sa trono sa ibabaw* sang mga kerubin,+ Magsilak ka.*   Sa atubangan ni Efraim, ni Benjamin, kag ni Manases, Ipakita ang imo gahom;+ Kari ka kag luwasa kami.+   O Dios ko, ipasag-uli kami;+ Kahamut-i kami,* agod maluwas kami.+   Jehova nga Dios sang mga kasuldadusan, tubtob san-o nga maakig* ka sa pangamuyo sang imo katawhan?+   Ginapakaon mo sila sang mga luha, Kag ginapainom sang indi matakus nga luha.   Ginahimo mo kami nga kabangdanan sang pag-ilinaway sang amon mga kaingod; Nagapagusto lang sa pagyaguta sa amon ang amon mga kaaway.+   O Dios sang mga kasuldadusan, ipasag-uli kami; Pasilaka ang imo nawong sa amon, agod maluwas kami.+   Ang imo katawhan daw kaangay sang puno sang ubas+ nga ginkuha mo sa Egipto. Gintabog mo ang mga pungsod kag gintanom ini.+   Naghawan ka sing duta para sa sini, Kag nanggamot ini kag nangalapkap sa bug-os nga duta.+ 10  Natabunan sang landong sini ang mga bukid, Kag sang mga sanga sini ang mga sedro sang Dios. 11  Ang mga sanga sini naglambot sa dagat, Kag ang mga salingsing sini naglambot sa Suba.*+ 12  Ngaa bala ginrumpag mo ang mga pader sang ulubasan,+ Amo nga ang tanan nga nagalabay nagapamupo sang mga bunga sini?+ 13  Ginaungad ini sang baboy talunon, Kag nagapanginaon sa sini ang mga sapat sa talon.+ 14  O Dios sang mga kasuldadusan, magbalik ka palihug. Halin sa langit magtamwa ka! Atipana ining puno sang ubas,+ 15  Ang puno* nga gintanom sang imo tuo nga kamot,+ Kag ang sanga nga ginpabakod mo para sa imo kadungganan.+ 16  Gintapas ini kag ginsunog.+ Sa imo pagsabdong,* malaglag sila. 17  Kabay nga buligan mo ang tawo nga yara sa imo tuo nga kamot, Ang anak sang tawo nga ginpabakod mo para sa imo kadungganan.+ 18  Kag indi kami magtalikod sa imo. Amligi ang amon kabuhi, agod magpanawag kami sa imo ngalan. 19  O Jehova nga Dios sang mga kasuldadusan, ipasag-uli kami; Pasilaka ang imo nawong sa amon, agod maluwas kami.+

Footnote

Ukon mahimo, “tunga.”
Ukon “Ipakita ang imo kasanag.”
Sa literal, “Pasilaka ang imo nawong.”
Sa literal, “magabalingaso.”
Eufrates.
Ukon “pinakapuno sang ubas.”
Sa literal, “Sa pagsabdong sang imo nawong.”