Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Salmo 107:1-43

BALAYAN SANG KAUNDAN

  • Magpasalamat sa Dios tungod sa iya mga binuhatan

    • Gintuytuyan sa husto nga dalan (7)

    • Ginpainom niya kag ginbusog (9)

    • Ginpagua niya sa kadulom (14)

    • Ginpadala iya pulong sa pag-ayo (20)

    • Imol ginaamligan sa pagpigos (41)

107  Magpasalamat kamo kay Jehova, kay maayo sia;+ Ang iya mainunungon nga gugma wala sing katapusan.+   Amo ini ang isiling sang mga gintubos ni Jehova, Nga gintubos niya sa kamot* sang kaaway,+   Nga gintipon niya halin sa kadutaan,+ Halin sa sidlangan kag sa katundan,* Halin sa aminhan kag sa bagatnan.+   Nagdalangdalang sila sa kamingawan, sa desyerto; Wala nila makita ang dalan padulong sa siudad nga mahimo nila istaran.   Ginagutom sila kag ginauhaw; Nagakalipong sila* bangod sa kakapoy.   Sa ila kalisdanan nagpanawag sila kay Jehova;+ Ginluwas niya sila sa ila mga kabudlayan.+   Gintuytuyan niya sila sa husto nga dalan,+ Agod makakadto sila sa siudad nga mahimo nila istaran.+   Magpasalamat ang katawhan kay Jehova+ tungod sang iya mainunungon nga gugma Kag tungod sang iya makatilingala nga mga binuhatan para sa mga tawo.+   Kay ginpainom niya ang ginauhaw* Kag ginbusog niya sing maayo nga mga butang ang ginagutom.*+ 10  Ang iban nagakabuhi sa tuman nga kadulom, Mga bilanggo sa pag-antos kag mga kadena. 11  Kay nagrebelde sila sa pulong sang Dios; Gintamay nila ang laygay sang Labing Mataas.+ 12  Gani paagi sa kabudlayan ginpaubos niya ang ila tagipusuon;+ Natumba sila, kag wala gid sing nagbulig sa ila. 13  Sa ila kalisdanan nangayo sila sing bulig kay Jehova; Ginluwas niya sila sa ila mga kabudlayan. 14  Ginluwas niya sila sa tuman nga kadulom, Kag ginbugras niya ang ila mga kadena.+ 15  Magpasalamat ang katawhan kay Jehova tungod sang iya mainunungon nga gugma+ Kag tungod sang iya makatilingala nga mga binuhatan para sa mga tawo. 16  Kay ginbungkal niya ang saway nga mga puertahan Kag gin-utod ang salsalon nga mga pintal.+ 17  Mga buangbuang sila gani nag-antos sila+ Bangod sang ila paglapas kag kasaypanan.+ 18  Nadula ang ila gana* sa tanan nga pagkaon; Nagpalapit sila sa mga gawang sang kamatayon. 19  Sa ila kalisdanan nangayo sila sing bulig kay Jehova; Ginluwas niya sila sa ila mga kabudlayan. 20  Ginpadala niya ang iya pulong kag gin-ayo sila+ Kag ginluwas niya sila sa tugalbong. 21  Magpasalamat ang katawhan kay Jehova tungod sang iya mainunungon nga gugma Kag tungod sang iya makatilingala nga mga binuhatan para sa mga tawo. 22  Magdulot sila sing mga halad sang pagpasalamat+ Kag ipahayag nila ang iya mga binuhatan nga may pagsinggit sa kalipay. 23  Ang mga nagasakay sa mga barko, Kag naganegosyo sa kadagatan,+ 24  Sila ang nakakita sang mga ginhimo ni Jehova Kag sang iya makatilingala nga mga binuhatan sa kadagatan;+ 25  Kon paano nga sa iya pagmando, nagmadlos ang hangin,+ Kag nagdaku ang mga balod sa dagat. 26  Nagsaka sila sa langit; Nagsalop sila sa kadadalman. Bangod sa katalagman daw matunaw sila* sa kahadlok. 27  Nagdulingduling sila nga daw hubog, Kag wala sing nabulig ang ila ikasarang.+ 28  Sa ila kalisdanan nangayo sila sing bulig kay Jehova,+ Kag ginluwas niya sila sa ila mga kabudlayan. 29  Ginpauntat niya ang unos; Naglinong ang mga balod sang dagat.+ 30  Nalipay sila sang nagtinong ini, Kag gintuytuyan niya sila padulong sa luyag nila dungkaan. 31  Magpasalamat ang katawhan kay Jehova tungod sang iya mainunungon nga gugma Kag tungod sang iya makatilingala nga mga binuhatan para sa mga tawo.+ 32  Dayawon nila sia sa katilingban sang katawhan,+ Dayawon nila sia sa katilingban* sang mga gulang. 33  Ginahimo niya ang mga suba nga mangin kamingawan Kag ang mga tuburan sang tubig nga mangin kigas nga duta,+ 34  Ang mabungahon nga duta nga mangin maasin nga duta,+ Bangod sang kalautan sang mga nagaistar sa sini. 35  Ginahimo niya ang desyerto nga mangin punong sang tubig, Kag ang mamala nga duta nga mangin mga tuburan sang tubig.+ 36  Didto ginapapuyo niya ang mga gutom,+ Agod magtukod sila sing siudad nga ila maistaran.+ 37  Nagsab-ug sila sa mga latagon kag nagtanom sing mga puno sang ubas+ Nga nagpatubas sing bugana.+ 38  Ginapakamaayo niya sila kag nagdamo gid sila; Wala niya ginatugutan nga magdiutay ang ila kasapatan.+ 39  Apang nagdiutay sila liwat kag nahuy-an Bangod sang pagpigos, kalamidad, kag kalisod. 40  Ginatamay niya ang mga dungganon Kag ginapadalangdalang sila sa kamingawan nga wala sing dalan.+ 41  Apang ginaamligan niya* ang imol batok sa pagpamigos+ Kag ginapadamo niya ang ila pamilya kaangay sang isa ka panong. 42  Makita ini sang mga matarong kag magakalipay sila;+ Apang kiputon sang tanan nga indi matarong ang ila baba.+ 43  Ang maalam magabinagbinag sini nga mga butang+ Kag hunahunaon niya sing maayo ang mga ginhimo ni Jehova tungod sang iya mainunungon nga gugma.+

Footnote

Ukon “gahom.”
Ukon “Halin sa ginabutlakan sang adlaw kag sa ginatunuran sini.”
Ukon “ang ila kalag.”
Ukon “ang kigas nga kalag.”
Ukon “ang gutom nga kalag.”
Ukon “Nangil-ad ang ila kalag.”
Ukon “ang ila kalag.”
Sa literal, “pulungkuan.”
Ukon “ginabutang niya sa mataas,” buot silingon, indi malab-ot.