Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Obadias 1:1-21

BALAYAN SANG KAUNDAN

  • Paubson ang matinaastaason nga Edom (1-9)

  • Ang kapintas sang Edom kay Jacob (10-14)

  • Ang adlaw ni Jehova batok sa tanan nga pungsod (15, 16)

  • Ipasag-uli ang panimalay ni Jacob (17-21)

    • Sunugon ni Jacob ang Edom (18)

    • Ang pagkahari mangin iya ni Jehova (21)

 Ang palanan-awon ni Obadias:* Amo ini ang iya ginasiling tuhoy sa mensahe sang Soberanong Ginuong Jehova tuhoy sa Edom:+ “May nabatian kami nga balita halin kay Jehova, May mensahero nga ginpadala sa mga pungsod: ‘Dali kamo, maghanda kita sa pagpakig-away sa iya.’”+   “Ginhimo ko ikaw nga kubos sa tunga sang mga pungsod; Gintamay gid ikaw.+   Ginlimbungan ka sang imo matinaastaason nga tagipusuon,+ Ikaw nga nagaistar sa gikab sang daku nga bato, Sa mataas nga lugar, nga nagasiling sa imo tagipusuon, ‘Sin-o ang makahulog sa akon sa duta?’   Bisan pa pataason mo ang imo ginaistaran* kaangay sang agila, Ukon bisan pa ibutang mo sa mga bituon ang imo pugad, Ihulog ko ikaw halin didto,” siling ni Jehova.   “Kon sudlon ka sang mga kawatan sa kagab-ihon, (Daku gid ang mangin halit sa imo!)* Indi bala nga ang luyag lang nila ang kawaton nila? Ukon kon may magkadto sa imo nga manugpamupo sing ubas, Indi bala nga may ibilin sila nga salaghawon?+   Ginpangita gid si Esau! Ginpanguha ang iya natago nga mga bahandi!   Gintabog ka nila sa dulunan. Ginlimbungan ka sang tanan mo nga kaalyansa.* Gindaug ka sang mga tawo nga nagpakighidait sa imo. Ang mga tawo nga nagakaon upod sa imo magabutang sing siod nga lambat para sa imo, Apang indi mo ini matalupangdan.   Sa sina nga adlaw,” siling ni Jehova, “Indi bala nga laglagon ko ang mga maalam sa Edom+ Kag ang mga may paghangop sa kabukiran ni Esau?   O Teman,+ mahadlukan ang imo mga hangaway,+ Kay pamatyon ang kada isa sa ila sa kabukiran ni Esau.+ 10  Bangod ginpintasan mo ang imo utod nga si Jacob,+ Mahuy-an ka,+ Kag indi ka na magluntad tubtob san-o.+ 11  Bangod nagtan-aw ka lang, Sang adlaw nga ginbihag sang mga estranghero ang iya mga soldado,+ Sang magsulod ang mga dumuluong sa iya gawang kag ginpagabutgabutan+ nila ang Jerusalem, Nangin malain ka man pareho nila. 12  Wala ka dapat nagkalipay sang adlaw nga malain ang nadangatan sang imo utod,+ Wala ka dapat nagkasadya sang adlaw nga nalaglag ang katawhan sang Juda,+ Kag wala ka dapat naghinambog sang adlaw nga nalisdan sila. 13  Wala ka dapat nagsulod sa gawang sang akon katawhan sang adlaw nga nalaglag sila,+ Wala ka dapat nagtan-aw lang sa iya kalisdanan sang adlaw nga nalaglag sia, Kag wala ka dapat nagkuha sa iya manggad sang adlaw nga nalaglag sia.+ 14  Wala ka dapat nagtindog sa ginsang-an sang mga dalan agod pamatyon ang mga nagapalagyo sa ila,+ Kag wala mo dapat gintugyan sa ila mga kaaway ang mga nakalampuwas sang adlaw nga nalisdan sila.+ 15  Kay malapit na ang adlaw ni Jehova batok sa tanan nga pungsod.+ Kon ano ang imo ginhimo, amo man ang himuon sa imo.+ Kon paano mo gintratar ang iban, amo man ang ibalos sa imo. 16  Kon paano kamo nagainom sing alak sa akon balaan nga bukid, Amo man sini ang pag-inom sang tanan nga pungsod.+ Imnon nila ang kopa sang akon kaakig, Kag daw pareho lang nga wala sila nagluntad. 17  Apang ang mga makapalagyo magakadto sa Bukid Sion,+ Kag mangin balaan ini;+ Kag panag-iyahan sang panimalay ni Jacob ang ila mga pagkabutang.+ 18  Ang panimalay ni Jacob mangin kalayo, Ang panimalay ni Jose mangin dabdab sang kalayo, Kag ang panimalay ni Esau pareho sang dagami. Tutdan nila ini kag sunugon. Wala sing mabilin sa panimalay ni Esau,+ Kay si Jehova mismo ang nagsiling sini. 19  Panag-iyahan nila ang Negeb kag ang kabukiran ni Esau,+ Ang Sepela kag ang duta sang mga Filistinhon.+ Panag-iyahan nila ang latagon sang Efraim kag ang latagon sang Samaria,+ Kag panag-iyahan ni Benjamin ang Gilead. 20  Ang mga bihag sa sini nga kuta,*+ Ang katawhan sang Israel amo ang magapanag-iya sang duta sang mga Canaanhon tubtob sa Sarepta.+ Kag panag-iyahan sang mga bihag sa Sefarad nga halin sa Jerusalem ang mga siudad sang Negeb.+ 21  Ang mga manluluwas magataklad sa Bukid Sion Agod hukman ang kabukiran ni Esau,+ Kag ang pagkahari mangin iya ni Jehova.”+

Footnote

Buot silingon, “Alagad ni Jehova.”
Ukon mahimo, “maglupad ka sing mataas.”
Ukon mahimo, “Daw ano kadaku ang ila maguba?”
Ukon “tanan nga nakigkatipan sa imo.”
Ukon “pamakod.”