Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Numeros 8:1-26

BALAYAN SANG KAUNDAN

  • Pito ka suga ginpasiga ni Aaron (1-4)

  • Mga Levinhon gintinluan kag nag-alagad (5-22)

  • Edad sa pag-alagad sang Levinhon (23-26)

8  Nagsiling si Jehova kay Moises:  “Silinga si Aaron, ‘Kon pasigahon mo ang pito ka suga sang kandelero, iplastar mo ini agod magsanag ang lugar sa atubangan sang kandelero.’”+  Gani ginhimo ini ni Aaron: Ginpasiga niya ang mga suga sang kandelero agod magsanag ang lugar sa atubangan sang kandelero,+ suno sa ginsugo ni Jehova kay Moises.  Amo sini ang paghimo sa kandelero: Isa ini ka sinalsal nga bulawan. Ginsalsal ini halin sa lawas tubtob sa mga bulak sini.+ Ginhimo ang kandelero suno sa palanan-awon+ nga ginpakita ni Jehova kay Moises.  Nagsiling pa si Jehova kay Moises:  “Kuhaa ang mga Levinhon sa tunga sang mga Israelinhon, kag tinluan mo sila.+  Amo ini ang himuon mo sa pagtinlo sa ila: Wisikan mo sila sing tubig nga nagatinlo sang sala. Dapat kiskisan nila ang bug-os nila nga lawas, labhan nila ang ila mga panapton kag magpaninlo sila sang ila kaugalingon.+  Dayon magkuha sila sing isa ka torite nga baka+ kag sing dulot nga uyas+ nga pino nga harina nga ginsamuan sing lana, kag magkuha ka sing isa pa ka torite nga baka bilang dulot tungod sa sala.+  Dalhon mo ang mga Levinhon sa atubangan sang tolda nga tilipunan* kag tipunon mo ang bug-os nga katilingban sang mga Israelinhon.+ 10  Kon dalhon mo ang mga Levinhon sa atubangan ni Jehova, dapat nga itungtong sang mga Israelinhon ang ila mga kamot sa mga Levinhon.+ 11  Dapat ihalad* ni Aaron ang mga Levinhon sa atubangan ni Jehova bilang dulot nga hinabog+ halin sa mga Israelinhon, kag himuon nila ang ila hilikuton para kay Jehova.+ 12  “Dayon itungtong sang mga Levinhon ang ila mga kamot sa ulo sang mga baka+ kag ihalad nila ang isa bilang dulot tungod sa sala kag ang isa pa bilang dulot nga sinunog para kay Jehova agod maghimo sing pagtumbas para sa sala+ sang mga Levinhon. 13  Patindugon mo ang mga Levinhon sa atubangan ni Aaron kag sang iya mga anak kag ihalad* mo sila kay Jehova bilang dulot nga hinabog. 14  Dapat painon mo ang mga Levinhon sa mga Israelinhon, kag mangin akon ang mga Levinhon.+ 15  Pagkatapos sini, masulod ang mga Levinhon sa tolda nga tilipunan agod mag-alagad didto. Amo sini ang himuon mo sa pagtinlo sa ila kag sa paghalad* sa ila bilang dulot nga hinabog. 16  Kay sila ang mga ginhatag sa akon halin sa mga Israelinhon. Kuhaon ko sila para sa akon bilang bulos sa tanan nga panganay* sang mga Israelinhon.+ 17  Kay ang tagsa ka panganay sang mga Israelinhon akon, tawo man ukon sapat.+ Ginpakabalaan ko sila agod mangin akon sang adlaw nga ginpatay ko ang tagsa ka panganay sa duta sang Egipto.+ 18  Kuhaon ko ang mga Levinhon bilang bulos sa tanan nga panganay sang mga Israelinhon. 19  Ihatag ko ang mga Levinhon kay Aaron kag sa iya mga anak bilang mga ginhatag halin sa mga Israelinhon, agod maghimo sing hilikuton sa tolda nga tilipunan para sa mga Israelinhon+ kag magbulig sa paghimo sing pagtumbas para sa sala sang mga Israelinhon, agod wala sing malain nga matabo sa mga Israelinhon+ bangod sang pagpalapit sang katawhan sang Israel sa balaan nga duog.” 20  Amo sini ang ginhimo ni Moises kag ni Aaron kag sang bug-os nga katilingban sang mga Israelinhon sa mga Levinhon. Suno sa tanan nga ginsugo ni Jehova kay Moises may kaangtanan sa mga Levinhon, amo sina ang ginhimo sa ila sang mga Israelinhon. 21  Gani nagpaninlo ang mga Levinhon sang ila kaugalingon. Ginlabhan nila ang ila mga panapton,+ kag pagkatapos sini ginhalad* sila ni Aaron bilang dulot nga hinabog sa atubangan ni Jehova.+ Dayon naghimo si Aaron sing pagtumbas para sa ila sala agod mangin matinlo sila.+ 22  Pagkatapos sini, nagsulod ang mga Levinhon agod himuon ang ila hilikuton sa tolda nga tilipunan sa atubangan ni Aaron kag sang iya mga anak. Ginhimo nila ang ginsugo ni Jehova kay Moises may kaangtanan sa mga Levinhon. 23  Nagsiling si Jehova kay Moises: 24  “Amo ini ang pagsulundan para sa mga Levinhon: Ang tawo nga nagaedad sing 25 ka tuig pataas magaupod sa grupo nga nagahimo sing hilikuton sa tolda nga tilipunan. 25  Apang paglampas niya sa edad nga 50 ka tuig, magauntat na sia sa pag-upod sa sini nga grupo kag indi na mag-alagad. 26  Mahimo niya buligan ang iya mga kauturan nga nagahimo sang ila mga obligasyon sa tolda nga tilipunan, apang indi niya paghimuon ang hilikuton didto. Amo ini ang himuon mo may kaangtanan sa mga Levinhon kag sa ila mga obligasyon.”+

Footnote

Ukon “tolda diin ang isa makigkita sa Dios.” Tan-awa ang Glossary.
Sa literal, “habughabugon.”
Sa literal, “habughabugon.”
Sa literal, “paghabughabog.”
Ukon “panganay nga nagabukas sang mga taguangkan.”
Sa literal, “ginhabughabog.”