Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Numeros 36:1-13

BALAYAN SANG KAUNDAN

  • Kasuguan tuhoy sa pagpamana sang babayi nga manunubli (1-13)

36  Ang mga ulo sang mga pamilya sang mga kaliwat ni Gilead nga anak ni Maquir+ nga anak ni Manases halin sa mga pamilya sang mga anak ni Jose nagkadto kag nakighambal kay Moises kag sa mga pangulo nga mga ulo sang pamilya sang mga Israelinhon.  Nagsiling sila: “Ginsugo ni Jehova ang akon ginuo nga ihatag ang duta bilang palanublion sa mga Israelinhon paagi sa pagabutgabot.+ Kag ginsugo man ni Jehova ang akon ginuo nga ang palanublion ni Zelofehad nga amon utod ihatag sa iya mga anak nga babayi.+  Kon pangasaw-on sila sang mga lalaki halin sa iban nga tribo sang mga Israelinhon, ang palanublion sang mga babayi kuhaon sa palanublion sang amon mga amay kag idugang sa palanublion sang tribo sang mapamana nila, gani kuhaon ini sa amon palanublion nga nabaton namon paagi sa pagabutgabot.  Kon mag-abot ang Tuig sang Kahilwayan+ para sa katawhan sang Israel, ang palanublion sang mga babayi idugang man sa palanublion sang tribo sang mapamana nila, gani ang ila palanublion kuhaon sa palanublion sang tribo sang amon mga amay.”  Suno sa sugo ni Jehova, nagsiling si Moises sa mga Israelinhon: “Husto ang ginasiling sang tribo sang mga anak ni Jose.  Amo ini ang ginsugo ni Jehova tuhoy sa mga anak nga babayi ni Zelofehad: ‘Makapamana sila kay bisan sin-o nga maluyagan nila basta halin lang sa pamilya sang tribo sang ila amay.  Ang palanublion sang isa ka tribo sang mga Israelinhon indi dapat magkadto sa iban nga tribo, bangod dapat magpabilin sa tagsa ka Israelinhon ang palanublion sang tribo sang iya mga katigulangan.  Ang tagsa ka anak nga babayi nga nakabaton sing palanublion halin sa isa sang mga tribo sang Israel dapat mapangasawa sang kaliwat sang tribo sang iya amay,+ agod magpabilin sa tagsa ka Israelinhon ang palanublion sang iya mga katigulangan.  Ang palanublion sang isa ka tribo indi dapat magkadto sa iban nga tribo, bangod dapat magpabilin sa tagsa ka tribo sang Israel ang ila palanublion.’” 10  Ginhimo gid sang mga anak nga babayi ni Zelofehad ang ginsugo ni Jehova kay Moises.+ 11  Gani ang mga anak nga babayi ni Zelofehad nga si Mala, si Tirza, si Hogla, si Milca, kag si Noa,+ nagpamana sing mga anak nga lalaki sang mga utod sang ila amay. 12  Ginpangasawa sila sang mga lalaki nga halin sa mga pamilya ni Manases nga anak ni Jose agod ang ila palanublion magpabilin sa tribo sang pamilya sang ila amay. 13  Amo ini ang mga sugo kag mga pagsulundan nga ginhatag ni Jehova sa mga Israelinhon paagi kay Moises sa desyerto nga kapatagan sang Moab malapit sa Jordan sa Jerico.+

Footnote