Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Numeros 24:1-25

BALAYAN SANG KAUNDAN

  • Ikatlo nga hulubaton ni Balaam (1-11)

  • Ikap-at nga hulubaton ni Balaam (12-25)

24  Sang makita ni Balaam nga nahamut-an* ni Jehova nga pakamaayuhon ang Israel, wala sia maglakat liwat agod mangita sing malain nga mga panimad-on,+ kundi nag-atubang sia sa kamingawan.  Sang magtulok sa unhan si Balaam kag nakita niya ang Israel nga nagakampo suno sa ila tribo,+ nag-abot ang espiritu sang Dios sa iya.+  Dayon ginhambal niya ini nga hulubaton:+ “Ang ginasiling ni Balaam nga anak ni Beor, Kag ang ginasiling sang tawo nga ang iya mga mata nabuksan,   Ang ginasiling sang tawo nga nakabati sing pulong sang Dios, Nga nakakita sing palanan-awon halin sa Labing Gamhanan, Kag nagduko nga bukas ang iya mga mata:+   Daw ano katahom ang imo mga tolda, O Jacob, Ang imo mga tabernakulo, O Israel!+   Pareho ini sang mga nalupyakan* nga nagalab-ot sa malayo,+ Pareho sang mga hardin sa higad sang suba, Pareho sang mga tanom nga aloe nga gintanom ni Jehova, Pareho sang mga kahoy nga sedro sa higad sang katubigan.   Ang tubig nagatulo halin sa iya duha ka suludlan nga panit, Kag ang iya binhi* ginasab-ug malapit sa katubigan.+ Ang iya hari+ mangin labaw pa kay Agag,+ Kag ang iya ginharian mangin mabakod.+   Ginapagua sia sang Dios sa Egipto; Daw pareho sia sang mga sungay sang toro nga baka nga talunon para sa ila. Laglagon niya ang mga pungsod nga nagalupig sa iya,+ Kag kitkiton niya ang ila mga tul-an, kag dugmukon niya sila paagi sa iya mga baslay.   Nagluko sia kag naghigda nga daw isa ka leon, Kag kon daw leon sia, sin-o ang mangisog sa pagpukaw sa iya? Ginapakamaayo ang mga nagapakamaayo sa imo, Kag ginapakamalaut ang mga nagapakamalaut sa imo.”+ 10  Gani naakig gid si Balak kay Balaam. Ginpalakpak ni Balak ang iya mga kamot nga may pagtamay kag nagsiling sia kay Balaam: “Ginpatawag ko ikaw agod pakamalauton ang akon mga kaaway,+ apang tatlo ka beses na nga ginpakamaayo mo sila. 11  Magpauli ka na subong gid. Padunggan ko gid ikaw kuntani,+ apang ginpunggan ni Jehova ang pagpadungog sa imo.” 12  Nagsabat si Balaam kay Balak: “Indi bala nga nagsiling ako sa mga mensahero nga ginpadala mo, 13  ‘Bisan ihatag pa ni Balak sa akon ang iya balay nga puno sing pilak kag bulawan, indi ko paglapason sing kinabubut-on* ang sugo ni Jehova, maayo man ini ukon malain. Kon ano ang ihambal ni Jehova sa akon amo lang ang isiling ko’?+ 14  Mabalik na ako sa akon katawhan. Dali diri kag ipahibalo ko sa imo kon ano ang himuon sini nga katawhan sa imo katawhan sa palaabuton.”* 15  Gani ginhambal niya ini nga hulubaton:+ “Ang ginasiling ni Balaam nga anak ni Beor, Ang ginasiling sang tawo nga ang iya mga mata nabuksan,+ 16  Ang ginasiling sang tawo nga nakabati sing pulong sang Dios, Kag may ihibalo sia sang Labing Mataas, Nakita niya ang palanan-awon halin sa Labing Gamhanan, Kag nagduko sia nga bukas ang iya mga mata: 17  Makita ko sia, apang indi pa subong; Makita ko sia, apang indi sa gilayon. Isa ka bituon+ ang magagua halin kay Jacob, Kag isa ka setro+ ang magatindog halin sa Israel.+ Buk-on niya ang ulo ni Moab,*+ Kag ang bagol sang tanan nga magamo nga mga anak. 18  Panag-iyahan ang Edom,+ Panag-iyahan ang Sier+ sang iya mga kaaway,+ Samtang ginapakita sang Israel ang iya kaisog. 19  Halin kay Jacob may magagua nga isa nga magapanakop,+ Kag laglagon niya ang bisan sin-o nga makaluwas sa siudad.” 20  Sang makita niya si Amalek, ginpadayon niya ang iya hulubaton: “Si Amalek amo ang una sa mga pungsod,+ Apang malaglag sia sa ulihi.”+ 21  Sang makita niya ang mga Kenhanon,+ ginpadayon niya ang iya hulubaton: “Malig-on ang imo puluy-an, pareho sang pugad sa daku nga bato. 22  Apang sunugon ang Kain.* San-o pa ikaw bihagon sang Asiria?” 23  Ginpadayon niya ang iya hulubaton: “Apang, sin-o ang maluwas kon himuon na ini sang Dios? 24  Maabot ang mga barko halin sa baybayon sang Kitim,+ Lupigon nila ang Asiria,+ Kag lupigon nila ang Eber. Apang malaglag man sia sa ulihi.” 25  Dayon naglakat si Balaam+ kag nagpauli. Naglakat man si Balak.

Footnote

Sa literal, “maayo sa mga mata.”
Tan-awa ang Glossary.
Ukon “kaliwat.”
Sa literal, “halin sa akon tagipusuon.”
Ukon “sa katapusan sang mga adlaw.”
Ukon “ang mga dungandungan sang ulo ni Moab.”
Ang tribo sang mga Kenhanon.