Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Numeros 21:1-35

BALAYAN SANG KAUNDAN

  • Ang hari sang Arad napierde (1-3)

  • Saway nga man-ug (4-9)

  • Israel naglibot sa Moab (10-20)

  • Si Hari Sihon nga Amornon napierde (21-30)

  • Si Hari Og nga Amornon napierde (31-35)

21  Sang mabalitaan sang Canaanhon nga hari sang Arad,+ nga nagaistar sa Negeb, nga nag-agi ang mga Israelinhon sa dalan sang Atarim, ginsalakay niya ang mga Israelinhon kag ginbihag ang iban sa ila.  Gani nagpanaad ang Israel kay Jehova: “Kon itugyan mo ini nga katawhan sa amon kamot, laglagon namon ang ila mga siudad.”  Ginpamatian ni Jehova ang Israel kag gintugyan niya sa ila ang mga Canaanhon, kag ginlaglag nila sila kag ang ila mga siudad. Gani, gintawag nila ang lugar nga Horma.*+  Samtang padayon sila sa pagpanglakaton halin sa Bukid Hor+ sa dalan padulong sa Pula nga Dagat agod indi sila makaagi sa duta sang Edom,+ ginkapoy ang katawhan.*  Naghambal ang katawhan batok sa Dios kag kay Moises:+ “Ngaa ginpagua pa ninyo kami sa Egipto agod lang mapatay sa kamingawan? Wala sing kalan-on kag wala sing tubig,+ kag nalainan* na gid kami* sa sining talamayon nga tinapay.”+  Gani ginpadalhan ni Jehova sing dalitan* nga mga man-ug ang katawhan. Ginkagat sini ang katawhan, kag madamo nga Israelinhon ang napatay.+  Gani nagkadto ang katawhan kay Moises kag nagsiling: “Nakasala kami bangod naghambal kami batok kay Jehova kag batok sa imo.+ Magpangamuyo ka kay Jehova nga kuhaon niya ang mga man-ug sa amon.” Kag nagpangamuyo si Moises para sa katawhan.+  Dayon nagsiling si Jehova kay Moises: “Maghimo ka sing dalitan* nga man-ug kag ibutang mo ini sa tukon. Ang bisan sin-o nga makagat magtulok sa sini agod indi sia mapatay.”  Naghimo dayon si Moises sing saway nga man-ug+ kag ginbutang niya ini sa tukon.+ Kon ang tawo nga nakagat sang man-ug magtulok sa saway nga man-ug, indi sia mapatay.+ 10  Pagkatapos sini, naglakat ang mga Israelinhon kag nagkampo sa Obot.+ 11  Dayon naghalin sila sa Obot kag nagkampo sa Iye-abarim,*+ sa kamingawan sa sidlangan nayon, sa atubangan sang Moab. 12  Halin didto, naglakat sila kag nagkampo sa Nalupyakan* sang Zered.+ 13  Kag halin didto, naglakat sila kag nagkampo sa rehiyon sang Arnon,+ nga yara sa kamingawan nga nagalambot sa dulunan sang mga Amornon. Ang Arnon amo ang dulunan sang Moab, sa ulot sang Moab kag sang mga Amornon. 14  Amo kon ngaa ang libro sang mga Inaway ni Jehova nagahambal tuhoy sa “Vaheb sa Sufa kag sa mga nalupyakan* sang Arnon, 15  kag sa gibwangan sang mga nalupyakan* nga nagalambot sa nahamtangan sang Ar tubtob sa dulunan sang Moab.” 16  Dayon nagkadto sila sa Beer.* Amo ini ang bubon nga tuhoy sini nagsiling si Jehova kay Moises: “Tipuna ang katawhan, kag hatagan ko sila sing tubig.” 17  Sina nga tion, nag-amba ang Israel sini nga ambahanon: “Mag-ibwal ka, O bubon! Sabta ini sang ambahanon!* 18  Ang bubon nga ginkutkot sang mga prinsipe, kag sang dungganon nga mga tawo, Paagi sa sungkod sang manuggahom, kag paagi sa ila mga sungkod.” Dayon halin sa kamingawan, nagkadto sila sa Matana, 19  halin sa Matana nagkadto sila sa Nahaliel, kag halin sa Nahaliel nagkadto sila sa Bamot.+ 20  Halin sa Bamot nagkadto sila sa nalupyakan sa teritoryo* sang Moab,+ sa ibabaw nayon sang Pisga,+ nga nagatamwa sa Jesimon.*+ 21  Nagpadala ang Israel sing mga mensahero kay Sihon nga hari sang mga Amornon, kag nagsiling sila:+ 22  “Paagiha kami sa imo duta. Indi kami mag-agi sa uma ukon sa ulubasan. Indi kami mag-inom sing tubig sa bisan diin nga bubon. Magalakat kami sa Dalan sang Hari tubtob makaagi na kami sa imo teritoryo.”+ 23  Apang wala ginpaagi ni Sihon ang Israel sa iya teritoryo. Sa baylo, gintipon ni Sihon ang tanan niya nga katawhan kag ginsalakay nila ang Israel sa kamingawan. Nakalab-ot sila sa Jahaz kag nagpakig-away sila batok sa Israel.+ 24  Apang napierde sia sang Israel paagi sa espada,+ kag ginsakop nila ang iya duta+ halin sa Arnon+ tubtob sa Jabok,+ malapit sa mga Ammonhon, apang wala maglampas sa Jazer+ kay amo ini ang dulunan sang mga Ammonhon.+ 25  Ginsakop sang Israel ini tanan nga siudad, kag nag-istar sila sa tanan nga siudad sang mga Amornon,+ sa Hesbon kag sa tanan nga banwa nga sakop* sini. 26  Kay ang Hesbon amo ang siudad ni Sihon nga hari sang mga Amornon, nga nagpakig-away batok sa hari sang Moab kag nag-agaw sang tanan niya nga duta tubtob sa Arnon. 27  Amo kon ngaa may mga hambalanon nga nagayaguta: “Dali kamo sa Hesbon. Tukura ang siudad ni Sihon kag lig-una ini. 28  Kay may naggua nga kalayo halin sa Hesbon, isa ka nagadabdab nga kalayo halin sa banwa ni Sihon. Ginsunog sini ang Ar sa Moab kag ang mga tag-iya sang mataas nga mga lugar sang Arnon. 29  Makaluluoy ka, Moab! Malaglag kamo, O katawhan ni Kemos!+ Bangod sa iya, ang iya mga anak nga lalaki magalaaslaas kag ang iya mga anak nga babayi bihagon ni Sihon nga hari sang mga Amornon. 30  Salakayon naton sila; Malaglag ang Hesbon tubtob sa Dibon;+ Laglagon naton ini tubtob sa Nofa; Ang kalayo magalapta tubtob sa Medeba.”+ 31  Gani nag-istar ang Israel sa duta sang mga Amornon. 32  Dayon nagpadala si Moises sing pila ka espiya sa Jazer.+ Gin-agaw nila ang sakop* nga mga banwa sini kag gintabog ang mga Amornon nga nagaistar didto. 33  Pagkatapos sini, nagkadto sila sa dalan sang Basan. Ginsugata sila ni Og+ nga hari sang Basan upod ang tanan niya nga katawhan agod magpakig-away batok sa ila sa Edrei.+ 34  Nagsiling si Jehova kay Moises: “Indi ka mahadlok sa iya,+ kay itugyan ko sia sa imo kamot kag ang tanan niya nga katawhan kag ang iya duta.+ Himuon mo man sa iya ang ginhimo mo kay Sihon nga hari sang mga Amornon, nga nag-istar sa Hesbon.”+ 35  Gani ginpatay nila sia kag ang iya mga anak kag ang tanan niya nga katawhan, tubtob wala na sing nabilin nga buhi sa iya katawhan,+ kag ginpanag-iyahan nila ang iya duta.+

Footnote

Buot silingon, “Ginatigana sa Kalaglagan.”
Ukon “ang kalag sang katawhan.”
Ukon “nangil-ad.”
Ukon “ang amon kalag.”
Ukon “kalayuhon.”
Ukon “kalayuhon.”
Buot silingon, “Kagulub-an sa Manabaw nga Sapa (Talabukan); Kagulub-an sa Dulunan (Mga Rehiyon sa Tabok).”
Tan-awa ang Glossary.
Tan-awa ang Glossary.
Tan-awa ang Glossary.
Buot silingon, “Bubon; Buho.”
Ukon “Mag-amba sa sini.”
Sa literal, “latagon.”
Ukon mahimo, “desyerto; kamingawan.”
Ukon “sa palibot.”
Ukon “sa palibot.”