Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Numeros 20:1-29

BALAYAN SANG KAUNDAN

  • Si Miriam napatay sa Kades (1)

  • Ginhampak ni Moises ang bato kag nakasala (2-13)

  • Edom, wala ginpaagi ang Israel (14-21)

  • Kamatayon ni Aaron (22-29)

20  Sa nahauna nga bulan, nag-abot ang bug-os nga katilingban sang mga Israelinhon sa kamingawan sang Zin, kag nag-istar ang katawhan sa Kades.+ Didto napatay si Miriam+ kag ginlubong.  Wala sing tubig didto para sa katilingban,+ kag nagtipon sila batok kay Moises kag kay Aaron.  Nagpakigbais ang katawhan kay Moises+ kag nagsiling sila: “Napatay na lang kuntani kami sang napatay ang amon mga kauturan sa atubangan ni Jehova!  Ngaa gindala pa ninyo ang katilingban ni Jehova sa sini nga kamingawan agod lang mapatay kami diri kag ang amon mga sapat?+  Ngaa ginpagua pa ninyo kami sa Egipto agod dalhon kami sa sining malain nga lugar?+ Wala diri sing uyas, sing igos,* sing puno sang ubas, kag sing kahoy nga granada, kag wala man sing mainom nga tubig.”+  Dayon naghalin si Moises kag si Aaron sa atubangan sang katilingban kag nagkadto sila sa puertahan sang tolda nga tilipunan* kag nagluhod sila kag nagduko, kag nagpakita sa ila ang himaya ni Jehova.+  Dayon nagsiling si Jehova kay Moises:  “Kuhaa ang sungkod kag tipunon ninyo ni Aaron nga utod mo ang katilingban. Silinga ang daku nga bato sa atubangan nila nga maghatag ini sing tubig, kag magpagua ka sing tubig para sa ila halin sa daku nga bato kag hatagan mo sing mainom ang katilingban kag ang ila mga sapat.”+  Gani ginkuha ni Moises ang sungkod sa atubangan ni Jehova,+ suno sa ginsugo Niya sa iya. 10  Dayon gintipon ni Moises kag ni Aaron ang katilingban sa atubangan sang daku nga bato, kag nagsiling si Moises sa ila: “Pamati kamo nga mga rebelde! Dapat bala kami magpagua sing tubig para sa inyo halin sa sining daku nga bato?”+ 11  Dayon gin-alsa ni Moises ang iya kamot kag duha ka beses nga ginhampak niya sang iya sungkod ang daku nga bato, kag naggua ang madamo nga tubig. Nag-inom ang katilingban kag ang ila mga sapat.+ 12  Sang ulihi, nagsiling si Jehova kay Moises kag kay Aaron: “Bangod wala kamo magtuo sa akon kag wala ninyo ako ginpakabalaan sa atubangan sang katawhan sang Israel, indi kamo ang magadala sini nga katilingban sa duta nga ihatag ko sa ila.”+ 13  Amo ini ang tubig sang Meriba,*+ diin nagpakigbais ang mga Israelinhon kay Jehova, gani ginpakabalaan sia sa tunga nila. 14  Dayon nagpadala si Moises halin sa Kades sing mga mensahero sa hari sang Edom:+ “Amo ini ang ginasiling sang imo utod nga si Israel,+ ‘Nakahibalo gid ikaw sang tanan nga kabudlayan nga gin-antos namon. 15  Ang amon mga katigulangan nagkadto sa Egipto,+ kag nag-istar kami sa Egipto sa sulod sang madamo nga tuig.*+ Ginpigos kami kag ang amon mga katigulangan sang mga Egiptohanon.+ 16  Sang ulihi, nagpanawag kami kay Jehova,+ kag ginpamatian niya kami. Nagpadala sia sing anghel+ kag ginpagua kami sa Egipto, kag yari kami karon sa Kades, ang siudad sa dulunan sang imo teritoryo. 17  Palihug, paagiha kami sa imo duta. Indi kami mag-agi sa uma ukon sa ulubasan, kag indi kami mag-inom sing tubig sa mga bubon. Magalakat kami sa Dalan sang Hari kag indi kami magliko sa tuo ukon sa wala tubtob makaagi na kami sa imo teritoryo.’”+ 18  Apang ang hari sang Edom nagsiling sa iya: “Indi ka mag-agi sa amon teritoryo. Kay kon mag-agi ka, sugataon ko ikaw sing espada.” 19  Nagsabat sa iya ang mga Israelinhon: “Magaagi kami sa daku nga dalan, kag kon mag-inom kami kag ang amon kasapatan sang imo tubig, bayaran namon ini.+ Maagi lang gid kami sa inyo.”+ 20  Apang nagsiling sia: “Indi ka mag-agi.”+ Bangod sini, ginsugata sia sang hari sang Edom upod ang madamo nga tawo kag makusog nga mga soldado.* 21  Wala gintugutan sang hari sang Edom nga mag-agi ang Israel sa iya teritoryo. Gani naglikaw ang Israel sa iya.+ 22  Ang bug-os nga katilingban sang katawhan sang Israel naghalin sa Kades kag nagkadto sa Bukid Hor.+ 23  Dayon nagsiling si Jehova kay Moises kag kay Aaron sa Bukid Hor malapit sa dulunan sang duta sang Edom: 24  “Si Aaron mapatay kag ilubong pareho sang iya mga katigulangan.*+ Indi sia makasulod sa duta nga ihatag ko sa mga Israelinhon, bangod ginsupak ninyo ang akon sugo may kaangtanan sa tubig sang Meriba.+ 25  Dalha si Aaron kag ang iya anak nga si Eleazar sa Bukid Hor. 26  Ubaha ang mga panapton sang pagkasaserdote ni Aaron,+ kag ipasuksok ini kay Eleazar+ nga iya anak; kag mapatay didto* si Aaron.” 27  Gintuman ni Moises ang ginsugo ni Jehova. Nagtaklad sila sa Bukid Hor samtang nagatulok ang bug-os nga katilingban. 28  Dayon gin-uba ni Moises ang mga panapton ni Aaron kag ginpasuksok ini kay Eleazar nga iya anak. Pagkatapos sini, napatay si Aaron didto sa ibabaw sang bukid.+ Dayon nagdulhog si Moises kag si Eleazar sa bukid. 29  Sang mahibaluan sang bug-os nga katilingban nga napatay na si Aaron, naghibi ang bug-os nga panimalay ni Israel tungod kay Aaron sa sulod sang 30 ka adlaw.+

Footnote

Bunga sang kahoy nga higuera.
Ukon “tolda diin ang isa makigkita sa Dios.” Tan-awa ang Glossary.
Buot silingon, “Pagpakigbais.”
Sa literal, “adlaw.”
Sa literal, “nga kamot.”
Sa literal, “isimpon sa iya katawhan.”
Sa literal, “kag isimpon kag mapatay didto.”