Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Numeros 14:1-45

BALAYAN SANG KAUNDAN

  • Luyag magbalik sang katawhan sa Egipto (1-10)

    • Maayo nga report ni Josue kag ni Caleb (6-9)

  • Si Jehova naakig; si Moises nagpatunga (11-19)

  • Silot: 40 ka tuig sa kamingawan (20-38)

  • Napierde ang Israel sang mga Amaleknon (39-45)

14  Dayon ginpabaskog sang bug-os nga katilingban ang ila tingog. Nagsinggit kag naghinibi ang katawhan sa bug-os nga gab-i.+  Nagkumod ang tanan nga Israelinhon kay Moises kag kay Aaron,+ kag ang bug-os nga katilingban naghambal batok sa ila: “Kuntani napatay na lang kita sa duta sang Egipto, ukon kuntani napatay na lang kita sa sining kamingawan!  Ngaa gindala pa kita ni Jehova sa sini nga duta agod lamang mapatay kita sa espada?+ Ang aton mga asawa kag mga kabataan pagabihagon.+ Indi ayhan maayo pa nga magbalik na lang kita sa Egipto?”+  Nagsiling pa gani sila sa isa kag isa: “Magpili kita sing pangulo kag magbalik kita sa Egipto!”+  Bangod sini, nagluhod kag nagduko si Moises kag si Aaron sa atubangan sang bug-os nga katilingban sang mga Israelinhon nga nagtipon didto.  Gingisi ni Josue+ nga anak ni Nun kag ni Caleb+ nga anak ni Jefone ang ila bayo. Kaupod sila sa mga nangespiya sa duta.  Nagsiling sila sa bug-os nga katilingban sang mga Israelinhon: “Ang duta nga amon ginkadtuan agod pangespiyahan maayo gid nga duta.+  Kon nahamuot si Jehova sa aton, dalhon niya kita sa sini nga duta kag ihatag niya sa aton ini nga duta diin nagailig ang gatas kag dugos.+  Apang dapat indi kamo magrebelde kay Jehova, kag indi kamo mahadlok sa mga tawo sang duta,+ kay mahapos naton sila mapierde.* Wala na sing magabulig sa ila, kag kaupod naton si Jehova.+ Indi kamo mahadlok sa ila.” 10  Apang naghambalanay ang bug-os nga katilingban nga batuhon sila.+ Apang nagpakita ang himaya ni Jehova sa tolda nga tilipunan* sa tanan nga katawhan sang Israel.+ 11  Dayon nagsiling si Jehova kay Moises: “Tubtob san-o nga indi ako pagtahuron sini nga katawhan,+ kag tubtob san-o nga indi sila magtuo sa akon pagkatapos sang tanan nga tanda nga ginhimo ko sa tunga nila?+ 12  Padalhan ko sila sing balatian kag laglagon ko sila, kag himuon ko ikaw nga isa ka pungsod nga mas daku kag mas gamhanan sangsa ila.”+ 13  Apang nagsiling si Moises kay Jehova: “Ginkuha mo sa mga Egiptohanon ang imo katawhan paagi sa imo gahom.+ Gani, kon himuon mo ini, mabatian ini sang mga Egiptohanon. 14  Isugid nila ini sa mga pumuluyo sini nga duta. Nabatian man nila nga ikaw, si Jehova, yara sa tunga sini nga katawhan+ kag nagpakita ka sa ila sing maathag.+ Ikaw si Jehova, kag ang imo panganod nagapabilin sa ibabaw nila, kag nagauna ka sa ila paagi sa haligi nga panganod kon adlaw kag paagi sa haligi nga kalayo kon gab-i.+ 15  Kon patyon mo ini nga katawhan sing dungan,* ang mga pungsod nga nakabati sang imo kabantugan magasiling: 16  ‘Indi madala ni Jehova ini nga katawhan sa duta nga ginpanumpa niya nga ihatag sa ila, gani ginpamatay niya sila sa kamingawan.’+ 17  O Jehova, ipakita palihug ang imo daku nga gahom suno sa ginsaad mo sang magsiling ka: 18  ‘Si Jehova, indi dali maakig kag bugana sa mainunungon nga gugma,*+ nagapatawad sang sayop kag paglapas, apang indi niya pagpabay-an nga indi masilutan ang nakasala, kay tungod sa sayop sang mga amay silutan niya ang mga anak kag mga apo, tubtob sa ikatlo nga kaliwatan kag sa ikap-at nga kaliwatan.’+ 19  Patawara, palihug, ang sayop sini nga katawhan suno sa kadakuon sang imo mainunungon nga gugma, subong nga ginpatawad mo ini nga katawhan halin pa sa Egipto tubtob subong.”+ 20  Dayon nagsiling si Jehova: “Ginapatawad ko sila subong sang ginsiling mo.+ 21  Apang, ginapanumpa ko nga subong nga buhi ako, mapuno sing himaya ni Jehova ang bug-os nga duta.+ 22  Ang tanan nga tawo nga nakakita sang akon himaya kag sang akon mga tanda+ nga ginhimo ko sa Egipto kag sa kamingawan, kag wala sapayan sini gintilawan gihapon nila ako+ sing napulo ka beses, kag wala sila magpamati sa akon tingog,+ 23  indi gid makakita sang duta nga ginpanumpa ko sa ila mga amay. Ang tanan nga wala nagatahod sa akon indi makakita sini.+ 24  Apang, bangod tuhay ang panimuot sang akon alagad nga si Caleb+ kag nagasunod sia sa akon sing bug-os tagipusuon, dalhon ko sia sa duta nga ginkadtuan niya, kag ang iya kaliwat magapanag-iya sini.+ 25  Sanglit ang mga Amaleknon kag ang mga Canaanhon+ nagaistar sa nalupyakan,* magbalik kamo buas kag maglakbay kamo pakadto sa kamingawan sa dalan padulong sa Pula nga Dagat.”+ 26  Dayon nagsiling si Jehova kay Moises kag kay Aaron: 27  “Tubtob san-o nga magakumod sa akon ining malaut nga katilingban?+ Nabatian ko ang ginakumod sang mga Israelinhon batok sa akon.+ 28  Silinga sila, ‘“Subong nga buhi ako,” siling ni Jehova, “himuon ko sa inyo ang nabatian ko nga ginsiling ninyo!+ 29  Magakalamatay kamo sa sini nga kamingawan,+ kamo tanan nga narehistro nga nagaedad sing 20 ka tuig pataas, kamo tanan nga nagkumod batok sa akon.+ 30  Indi kamo makasulod sa duta nga ginpanumpa ko* nga istaran ninyo,+ luwas kay Caleb nga anak ni Jefone kag kay Josue nga anak ni Nun.+ 31  “‘“Tuhoy sa inyo kabataan nga siling ninyo pagabihagon,+ dalhon ko sila sa sini nga duta, kag mangin sunado nila ini nga duta nga inyo ginsikway.+ 32  Apang magakalamatay kamo sa sini nga kamingawan. 33  Ang inyo mga anak mangin mga manugbantay sang karnero sa kamingawan sa sulod sang 40 ka tuig,+ kag manabat sila tungod sang inyo indi matutom nga mga buhat,* tubtob ang katapusan sa inyo mapatay sa kamingawan.+ 34  Suno sa kadamuon nga 40 ka adlaw nga nagpangespiya kamo sa duta,+ para sa isa ka adlaw isa ka tuig, manabat kamo tungod sa inyo mga sala sa sulod sang 40 ka tuig,+ kag mahibaluan ninyo kon ano ang buot silingon sang inyo pagpamatok sa akon.* 35  “‘“Ako, si Jehova, ang naghambal sini. Amo gid sini ang himuon ko sa sining tanan nga malaut nga katilingban nga nagtipon batok sa akon: Magadangat sila sa ila katapusan sa sining kamingawan, kag diri sila mapatay.+ 36  Ang mga lalaki nga ginpadala ni Moises sa pagpangespiya sa duta, nga sang ila pagbalik nagdala sing malain nga balita tuhoy sa duta+ kag bangod sini nagkumod ang bug-os nga katilingban batok sa iya, 37  ini nga mga lalaki nga nagdala sing malain nga balita tuhoy sa duta silutan kag mapatay sa atubangan ni Jehova.+ 38  Apang si Josue nga anak ni Nun kag si Caleb nga anak ni Jefone nga upod sa mga lalaki nga nagpangespiya sa duta, magapabilin nga buhi.”’”+ 39  Sang ginsiling ini ni Moises sa tanan nga Israelinhon, nagpangasubo gid ang katawhan. 40  Nagbangon sila sing temprano pa pagkaaga kag nagtaklad sila sa ibabaw sang bukid, kag nagsiling sila: “Handa na kami sa pagtaklad sa lugar nga ginsiling ni Jehova, kay nakasala kami.”+ 41  Apang nagsiling si Moises: “Ngaa ginalapas ninyo ang sugo ni Jehova? Indi kamo magmadinalag-on. 42  Indi kamo magtaklad, kay si Jehova indi upod sa inyo. Mapierde lang kamo sang inyo mga kaaway.+ 43  Kay atubangon kamo didto sang mga Amaleknon kag sang mga Canaanhon,+ kag mapatay kamo sa espada. Si Jehova indi upod sa inyo, kay nagtalikod kamo kag wala na magsunod kay Jehova.”+ 44  Apang nangahas sila sa pagtaklad sa bukid,+ bisan pa ang kaban sang katipan ni Jehova kag si Moises wala maghalin sa tunga sang ila ginakampuhan.+ 45  Dayon ang mga Amaleknon kag ang mga Canaanhon nga nagaistar sa sina nga bukid nagdulhog kag ginpamatay sila kag ginlagas sila tubtob sa Horma.+

Footnote

Sa literal, “kay mga tinapay sila para sa aton.”
Ukon “tolda diin ang isa makigkita sa Dios.” Tan-awa ang Glossary.
Sa literal, “subong isa lang ka tawo.”
Ukon “mahigugmaon nga kaayo.”
Ukon “manubo nga patag.”
Sa literal, “ginbayaw ko ang akon kamot.”
Sa literal, “inyo pagpakighilawas.”
Ukon “pagpakig-away sa akon.”