Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Numeros 13:1-33

BALAYAN SANG KAUNDAN

  • Ang 12 nangespiya sa Canaan (1-24)

  • Malain nga report sang napulo ka espiya (25-33)

13  Nagsiling si Jehova kay Moises:  “Magpadala ka sing mga lalaki nga magpangespiya* sa duta sang Canaan, nga ihatag ko sa mga Israelinhon. Ang tagsa ka lalaki nga ipadala mo dapat isa ka pangulo+ halin sa kada tribo sang ila amay.”+  Gani ginpadala sila ni Moises halin sa kamingawan sang Paran+ suno sa ginsugo ni Jehova. Ang tanan nga lalaki mga pangulo sang mga Israelinhon.  Amo ini ang ila mga ngalan: sa tribo ni Ruben, si Samua nga anak ni Zaccur;  sa tribo ni Simeon, si Safat nga anak ni Hori;  sa tribo ni Juda, si Caleb+ nga anak ni Jefone;  sa tribo ni Isacar, si Igal nga anak ni Jose;  sa tribo ni Efraim, si Hosea+ nga anak ni Nun;  sa tribo ni Benjamin, si Palti nga anak ni Rafu; 10  sa tribo ni Zebulon, si Gadiel nga anak ni Sodi; 11  sa tribo ni Jose,+ sa tribo ni Manases,+ si Gaddi nga anak ni Susi; 12  sa tribo ni Dan, si Amiel nga anak ni Gemali; 13  sa tribo ni Aser, si Setur nga anak ni Miguel; 14  sa tribo ni Neptali, si Nahabi nga anak ni Vopsi; 15  sa tribo ni Gad, si Geuel nga anak ni Maqui. 16  Amo ini ang mga ngalan sang mga lalaki nga ginpadala ni Moises agod magpangespiya sa duta. Ginhingalanan ni Moises nga Josue*+ si Hosea nga anak ni Nun. 17  Sang palakton na sila ni Moises agod magpangespiya sa duta sang Canaan, nagsiling sia sa ila: “Magtaklad kamo sa Negeb, kag magtaklad kamo sa kabukiran.+ 18  Tan-awon ninyo kon ano ini nga klase sang duta,+ kag kon bala makusog ukon maluya ang mga tawo nga nagaistar sa sini, kon bala diutay lang sila ukon madamo, 19  kon bala ang duta maayo ukon malain, kag kon bala ang mga siudad nga ila ginaistaran may pader ukon wala. 20  Tan-awon man ninyo kon bala ang duta matambok ukon indi,+ kag kon bala may mga kahoy sa sini ukon wala. Magpakaisog kamo+ kag magkuha kamo sing pila ka patubas sang duta.” Panahon gid sadto nga tigluluto sang una nga mga bunga sang ubas.+ 21  Gani nagtaklad sila kag nagpangespiya sa duta halin sa kamingawan sang Zin+ tubtob sa Rehob+ tubtob sa Lebo-hamat.*+ 22  Sang nagtaklad sila sa Negeb, nakalab-ot sila sa Hebron.+ Didto nagaistar ang mga Anakim+ nga si Ahiman, si Sesai, kag si Talmai.+ Nauna nga natukod ang Hebron sing pito ka tuig sangsa Zoan sa Egipto. 23  Sang nag-abot sila sa Nalupyakan* sang Escol,+ nagtapas sila sing sanga nga may isa ka pungpong sang ubas. Ginbutang nila ini sa tukon kag gintuwangan ini sang duha ka lalaki. Nagdala man sila sing bunga sang kahoy nga granada kag sing igos.*+ 24  Gintawag nila ina nga lugar nga Nalupyakan* sang Escol,*+ bangod sang pungpong nga gintapas didto sang mga Israelinhon. 25  Nagbalik sila pagkatapos sang 40 ka adlaw+ nga pagpangespiya sa duta. 26  Dayon nagkadto sila kay Moises kag kay Aaron kag sa bug-os nga katilingban sang mga Israelinhon sa kamingawan sang Paran, sa Kades.+ Ginsugid nila sa bug-os nga katilingban ang ila nakita kag ginpakita nila sa ila ang mga patubas sang duta. 27  Amo ini ang ila ginsugid kay Moises: “Nagsulod kami sa duta nga ginpakadtuan mo sa amon, kag matuod gid nga nagailig ang gatas kag dugos+ sa sini, kag amo ini ang mga patubas sang duta.+ 28  Apang, ang mga tawo nga nagaistar sa duta makusog, kag ang mga siudad dalagku kag may pader. Nakita man namon didto ang mga Anakim.+ 29  Ang mga Amaleknon+ nagaistar sa duta sang Negeb.+ Ang mga Hethanon, mga Jebusnon,+ kag mga Amornon+ nagaistar sa kabukiran. Ang mga Canaanhon+ nagaistar malapit sa dagat+ kag sa higad sang Jordan.” 30  Ginpakalma ni Caleb ang mga tawo sa atubangan ni Moises kag nagsiling sia: “Mataklad kita subong dayon, kag sigurado nga maagaw naton kag makuha ang duta.”+ 31  Apang ang mga lalaki nga nagtaklad upod sa iya nagsiling: “Indi kita mahimo magpakig-away sa ila, bangod mas makusog sila sangsa aton.”+ 32  Kag malain gihapon ang ginasugid nila sa mga Israelinhon+ tuhoy sa duta nga ginpangespiyahan nila. Nagsiling sila: “Ang duta nga ginpangespiyahan namon nagapanglaglag sang iya mga pumuluyo, kag kadalagku sang tanan nga tawo nga nakita namon didto.+ 33  Nakita namon didto ang mga Nefilim,* ang mga anak ni Anak,+ nga kaliwat sang mga Nefilim, kag panan-aw namon daw mga tibakla lang kami kon ipaanggid sa ila, kag amo man sini ang panan-aw nila sa amon.”

Footnote

Ukon “magpangusisa.”
Ukon “Jehosua,” nga nagakahulugan “Si Jehova ang Kaluwasan.”
Ukon “dulunan sang Hamat.”
Tan-awa ang Glossary.
Bunga sang kahoy nga higuera.
Tan-awa ang Glossary.
Buot silingon, “Pungpong sang Ubas.”
Tan-awa ang Glossary.