Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Numeros 11:1-35

BALAYAN SANG KAUNDAN

  • Kalayo halin sa Dios bangod sang pagreklamo (1-3)

  • Katawhan nangayo sing karne (4-9)

  • Si Moises nagbatyag nga indi makasarang (10-15)

  • Si Jehova naghatag sing espiritu sa 70 ka gulang (16-25)

  • Eldad kag Medad; si Josue nangimon para kay Moises (26-30)

  • Pitaw ginpadala; ginsilutan ang katawhan bangod sa kakagod (31-35)

11  Nagreklamo gid ang katawhan sa atubangan ni Jehova. Pagkabati sini ni Jehova, naakig gid sia, kag ang kalayo halin kay Jehova nagdabdab batok sa ila kag nasunog ang pila ka tawo sa gua sang kampo.  Sang magpangayo sing bulig ang katawhan kay Moises, nagpangamuyo sia sing hanuot kay Jehova,+ kag napatay ang kalayo.  Gani ini nga lugar gintawag nga Tabera,* bangod ang kalayo halin kay Jehova nagdabdab batok sa ila.+  Ang mga dumuluong*+ sa tunga nila dalokdalok kag naghandum sila sing luyag gid nila kaunon,+ kag pati ang mga Israelinhon naghibi liwat kag nagsiling: “Sin-o ang magahatag sa aton sing karne nga kaunon naton?+  Nadumduman gid namon ang isda nga ginakaon namon sa Egipto nga wala sing bayad, ang mga pipino, ang mga sandiya, ang mga sibuyas, kag ang mga ahos!+  Apang karon nagapalangluya na kami.* Wala na kami sing makita kundi puro lang manna.”+  Ang manna+ daw liso sang kulantro,*+ kag daw pareho sa bedelio.*  Ginapamulot ini sang katawhan, kag ginagaling nila ini sa de-mano nga mga galingan ukon ginabayo ini sa lusong. Dayon ginaluto nila ini sa mga kolon ukon ginahimo ini nga tipulon nga mga tinapay.+ Daw matam-is nga tinapay nga may lana ang sabor sini.  Kon magtupa ang tun-og sa kampo kon gab-i, nagatupa man ang manna.+ 10  Nabatian ni Moises nga nagahinibi ang katawhan, ang tanan nga pamilya, ang tagsa ka tawo sa puertahan sang iya tolda. Kag naakig gid si Jehova,+ kag wala man ini maluyagi ni Moises. 11  Dayon nagsiling si Moises kay Jehova: “Ngaa ginapabudlayan mo ang imo alagad? Ngaa wala ka nahamuot sa akon, amo nga ginapabug-atan mo ako sa sini nga katawhan?+ 12  Ako bala ang nagpanamkon sa sini nga katawhan? Ako bala ang nagbun-ag sa ila, amo nga ginahambalan mo ako, ‘Kugusa sila, pareho sang isa ka manuglibang* nga nagakugos sang nagasuso nga bata,’ kag dalha sila sa duta nga ginpanumpa mo nga ihatag sa ila mga katigulangan?+ 13  Diin ako makuha sing karne nga ihatag sa sini nga katawhan? Kay padayon sila nga nagahibi sa akon kag nagasiling, ‘Hatagi kami sing karne nga kaunon namon!’ 14  Indi ko na maagwanta ini nga katawhan kon ako lang. Indi ko na sila masarangan.+ 15  Kon amo man lang sini ang himuon mo sa akon, palihug patya na lang ako.+ Kon nahamuot ka sa akon, indi na ako pagpaantusa pa.” 16  Nagsabat si Jehova kay Moises: “Magtipon ka para sa akon sing 70 ka lalaki halin sa mga gulang sang Israel, nga kilala mo nga mga gulang kag mga manugdumala sang katawhan.+ Dalha sila sa tolda nga tilipunan, kag patinduga sila didto upod sa imo. 17  Magapanaug ako+ kag magapakighambal sa imo didto.+ Magakuha ako sa espiritu+ nga yara sa imo kag ibutang ini sa ila, kag buligan ka nila sa pagdumala sa katawhan agod indi lang ikaw isa ang magapas-an sini nga responsibilidad.+ 18  Silinga ang katawhan, ‘Pakabalaanon ninyo ang inyo kaugalingon para buas,+ kay magakaon kamo sing karne, bangod nabatian ni Jehova nga nagahibi kamo+ kag nagasiling: “Sin-o ang magahatag sing karne nga kaunon namon? Mas maayo pa sang didto kami sa Egipto.”+ Hatagan kamo ni Jehova sing karne, kag magakaon kamo.+ 19  Magakaon kamo, indi lamang sa isa ka adlaw ukon 2 ka adlaw ukon 5 ka adlaw ukon 10 ka adlaw ukon 20 ka adlaw, 20  kundi sa bug-os nga bulan, tubtob nga maggua ini sa inyo ilong kag mangin makangilil-ad ini sa inyo,+ kay ginsikway ninyo si Jehova nga yara sa tunga ninyo, kag naghibi kamo sa atubangan niya, kag nagsiling: “Ngaa naggua pa kami sa Egipto?”’”+ 21  Dayon nagsiling si Moises: “Ang katawhan nga kaupod ko may 600,000 ka lalaki+ nga nagalakat, kag karon nagasiling ka, ‘Hatagan ko sila sing karne nga kaunon nila sa bug-os nga bulan’! 22  Kon ihawon ang tanan nga karnero kag baka kag iban pa nga mga sapat, mangin bastante ayhan ini para sa ila? Ukon kon kuhaon ang tanan nga isda sa dagat, mangin bastante ayhan ini para sa ila?” 23  Dayon nagsiling si Jehova kay Moises: “Malip-ot bala ang kamot ni Jehova?+ Karon makita mo kon bala matabo ukon indi ang ginasiling ko sa imo.” 24  Gani naggua si Moises kag ginsiling niya sa katawhan ang ginhambal ni Jehova. Nagtipon sia sing 70 ka lalaki halin sa mga gulang sang katawhan kag ginpatindog sila sa palibot sang tolda.+ 25  Dayon nagpanaug si Jehova sa panganod+ kag nagpakighambal sa iya+ kag nagkuha sia sa espiritu+ nga yara sa iya kag ginbutang ini sa kada isa sa 70 ka gulang. Sang mabaton na nila ang espiritu, nagpanghikot sila nga daw mga manalagna,*+ apang wala na nila ini ginhimo liwat. 26  May duha sa mga lalaki nga nabilin pa sa kampo, si Eldad kag si Medad. Nakabaton man sila sing espiritu, kay nalakip sila sa mga ngalan nga ginlista, apang wala sila makakadto sa tolda. Gani nagpanghikot sila sa kampo nga daw mga manalagna sila. 27  Ang isa ka pamatan-on nga lalaki nagdalagan kag nagsugid kay Moises: “Si Eldad kag si Medad nagapanghikot sa kampo nga daw mga manalagna sila!” 28  Si Josue+ nga anak ni Nun kag alagad ni Moises halin pa sang pamatan-on sia, nagsiling: “Moises, ginuo ko, punggi sila!”+ 29  Apang nagsiling si Moises sa iya: “Nagapangimon ka bala para sa akon? Indi ka magpangimon, kay luyag ko kuntani nga ang tanan nga katawhan ni Jehova mga manalagna agod ibutang ni Jehova sa ila ang iya espiritu!” 30  Sang ulihi, nagbalik sa kampo si Moises upod ang mga gulang sang Israel. 31  Dayon naghuyop ang hangin halin kay Jehova kag nagtabog sang mga pispis nga pitaw halin sa dagat kag naglupadlupad ini sa bug-os nga palibot sang kampo+ nga mga isa ka adlaw nga paglakbay ang kalayuon sa isa ka bahin, kag mga isa ka adlaw nga paglakbay ang kalayuon sa pihak nga bahin, kag sa kataason nga mga duha ka maniko* sa ibabaw sang duta. 32  Gani nagpangdakop ang katawhan sing pitaw sa bug-os nga adlaw kag sa bug-os nga gab-i kag sa bug-os nga madason nga adlaw. Wala sing nakadakop nga manubo sa kadamuon nga napulo ka homer,* kag ginlapta nila ini* sa palibot sang kampo para sa ila kaugalingon. 33  Apang samtang yara pa sa ulot sang ila mga ngipon ang karne kag wala pa nila ini mausang, nagdabdab ang kaakig ni Jehova batok sa katawhan, kag madamo sa katawhan ang ginpamatay ni Jehova.+ 34  Gani gintawag nila ini nga lugar nga Kibrot-hataava,*+ bangod diri nila ginlubong ang dalokdalok nga mga tawo nga naghandum sing pagkaon.+ 35  Halin sa Kibrot-hataava nagkadto ang katawhan sa Hazerot, kag nagpabilin sila sa Hazerot.+

Footnote

Buot silingon, “Nagakasunog,” isa ka sunog; dabadaba.
Mga indi Israelinhon sa tunga nila.
Ukon “ang amon kalag.”
Isa ka tanom nga ang kolor sang liso abuabuhon nga puti.
Mahamot nga tagok sang kahoy.
Ukon “lalaki nga manug-atipan.”
Ukon “nagpanagna sila.”
Ang isa ka maniko katumbas sang 44.5 ka sentimetro (17.5 ka pulgada). Tan-awa ang Apendise B14.
Ang isa ka homer katumbas sang 220 ka litro. Tan-awa ang Apendise B14.
Mahimo nga para ibulad ini.
Buot silingon, “Mga Lulubngan sang Nagahandum.”