Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Numeros 10:1-36

BALAYAN SANG KAUNDAN

  • Mga trumpeta nga pilak (1-10)

  • Paghalin sa Sinai (11-13)

  • Pasunod ang paghalin (14-28)

  • Si Hobab ginpatuytoy sa Israel (29-34)

  • Pangamuyo ni Moises kon maglakat ang kampo (35, 36)

10  Nagsiling si Jehova kay Moises:  “Maghimo ka sing duha ka trumpeta+ nga sinalsal nga pilak, kag gamiton mo ini sa pagtipon sa katilingban kag sa pagpahibalo nga magasaylo ang mga kampo.  Kon duha ka trumpeta ang patunugon, dapat magtipon sa imo ang bug-os nga katilingban sa puertahan sang tolda nga tilipunan.*+  Kon isa lang ang patunugon, ang mga pangulo lang nga amo ang mga ulo sang mga linibo sang Israel ang magatipon sa imo.+  “Kon ang tunog sang trumpeta nagabulubag-o, ang mga nagakampo sa sidlangan+ amo ang magahalin.  Kon ang tunog sang trumpeta nagabulubag-o gihapon sa ikaduha nga tion, ang mga nagakampo sa bagatnan+ amo ang magahalin. Amo ini dapat ang mabatian nga tunog sang trumpeta sa kada tion nga ang isa sa mga tropa magahalin.  “Kon dapat tipunon ang katilingban, patunugon ninyo ang mga trumpeta,+ apang wala nagabulubag-o ang tunog.  Ang mga anak ni Aaron nga mga saserdote amo ang magapatunog sang mga trumpeta,+ kag ang paggamit sini mangin isa ka pagsulundan tubtob san-o para sa inyo sa tanan ninyo nga kaliwatan.  “Kon may kaaway nga magsalakay sa inyo duta, patunugon ninyo ang mga trumpeta sing panawagan para sa inaway,+ kag dumdumon kamo ni Jehova nga inyo Dios kag luwason niya kamo sa inyo mga kaaway. 10  “Sa inyo masadya nga mga okasyon,+ sa inyo mga kapiestahan+ kag sa una nga adlaw sang bulan, patunugon ninyo ang mga trumpeta sa inyo mga dulot nga sinunog+ kag sa inyo mga halad sa pag-ambitanay.+ Mangin pahanumdom ini sa atubangan sang inyo Dios para sa inyo. Ako si Jehova nga inyo Dios.”+ 11  Sang ikaduha nga tuig, sa ika-20 nga adlaw sang ikaduha nga bulan,+ nagpaibabaw ang panganod halin sa tabernakulo+ sang kaban sang katipan.* 12  Gani naghalin ang mga Israelinhon sa kamingawan sang Sinai. Pasunod sila nga naghalin suno sa ila kahimusan,+ kag ang panganod nagdulog sa kamingawan sang Paran.+ 13  Amo ini ang una nga tion nga naghalin sila suno sa ginsugo ni Jehova paagi kay Moises.+ 14  Gani una nga naghalin ang tropa sang kampo sang mga anak ni Juda nga may tatlo ka tribo, kag si Nason+ nga anak ni Aminadab amo ang nagapanguna sa sini nga tropa. 15  Ang nagapanguna sa tropa sang tribo sang mga anak ni Isacar amo si Netanel+ nga Anak ni Zuar. 16  Ang nagapanguna sa tropa sang tribo sang mga anak ni Zebulon amo si Eliab+ nga anak ni Helon. 17  Sang ginbungkag ang tabernakulo,+ naghalin ang mga anak ni Gerson+ kag ang mga anak ni Merari+ nga amo ang nagadala sang tabernakulo. 18  Ang masunod nga naghalin amo ang tropa sang kampo ni Ruben nga may tatlo ka tribo, kag si Elizur+ nga anak ni Sedeur amo ang nagapanguna sa sini nga tropa. 19  Ang nagapanguna sa tropa sang tribo sang mga anak ni Simeon amo si Selumiel+ nga anak ni Zurisadai. 20  Ang nagapanguna sa tropa sang tribo sang mga anak ni Gad amo si Eliasaf+ nga anak ni Deuel. 21  Ang masunod nga naghalin amo ang mga Kohatnon nga nagadala sang balaan nga mga butang sang santuaryo.+ Kinahanglan nga napatindog na ang tabernakulo kon mag-abot sila. 22  Ang masunod nga naghalin amo ang tropa sang kampo sang mga anak ni Efraim nga may tatlo ka tribo, kag si Elisama+ nga anak ni Amihud amo ang nagapanguna sa sini nga tropa. 23  Ang nagapanguna sa tropa sang tribo sang mga anak ni Manases amo si Gamaliel+ nga anak ni Pedazur. 24  Ang nagapanguna sa tropa sang tribo sang mga anak ni Benjamin amo si Abidan+ nga anak ni Gideoni. 25  Ang masunod nga naghalin amo ang tropa sang kampo sang mga anak ni Dan nga may tatlo ka tribo. Sila ang mga bantay sa likuran sang tanan nga kampo, kag si Ahiezer+ nga anak ni Amisadai amo ang nagapanguna sa sini nga tropa. 26  Ang nagapanguna sa tropa sang tribo sang mga anak ni Aser amo si Pagiel+ nga anak ni Ocran. 27  Ang nagapanguna sa tropa sang tribo sang mga anak ni Neptali amo si Ahira+ nga anak ni Enan. 28  Amo sini ang pasunod nga paghalin sang mga Israelinhon kag sang ila mga tropa kon magsaylo sila.+ 29  Dayon nagsiling si Moises kay Hobab nga anak ni Reuel*+ nga Midianhon, nga ugangan ni Moises: “Makadto kami sa lugar nga ginsiling ni Jehova, ‘Ihatag ko ini sa inyo.’+ Mag-upod ka sa amon,+ kag indi ka namon pagpabay-an, bangod nagsaad si Jehova sing maayo nga mga butang para sa Israel.”+ 30  Apang nagsabat si Hobab: “Indi ako mag-upod. Mabalik na lang ako sa akon pungsod kag sa akon mga paryente.” 31  Gani nagsiling si Moises: “Palihug, indi kami pagbayai, kay ikaw ang nakahibalo kon diin kami dapat magkampo sa kamingawan, kag ikaw ang magatuytoy sa amon.* 32  Kag kon mag-upod ka sa amon,+ ang maayo nga himuon ni Jehova sa amon, himuon man namon sa imo.” 33  Gani naglakat sila halin sa bukid ni Jehova+ kag naglakbay sa sulod sang tatlo ka adlaw. Ang kaban+ sang katipan ni Jehova yara sa ila unahan samtang nagalakbay sila sing tatlo ka adlaw sa pagpangita sing lugar nga mapahuwayan nila.+ 34  Kon maghalin sila sa ila ginkampuhan, ang panganod ni Jehova+ yara sa ibabaw nila kon adlaw. 35  Kon sayluhon gani ang Kaban, nagasiling si Moises: “Tindog ka, O Jehova,+ kag kabay pa nga mag-alaplaag ang imo mga kaaway, kag kabay pa nga magapalagyo sa imo atubangan ang mga nagadumot sa imo.” 36  Kag kon ibutang ini, nagasiling sia: “Magbalik ka, O Jehova, sa indi maisip nga linibo sang Israel.”+

Footnote

Ukon “tolda diin ang isa makigkita sa Dios.” Tan-awa ang Glossary.
Sa literal, “Pamatuod.”
Si Jetro.
Ukon “ang amon mga mata.”