Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Manugwali 8:1-17

BALAYAN SANG KAUNDAN

  • Indi himpit nga paggahom (1-17)

    • Sunda ang mando sang hari (2-4)

    • Paggahom sang tawo makahalalit (9)

    • Kon wala ginasilutan gilayon (11)

    • Kaon, inom, kag magkasadya (15)

8  Sin-o ang kaangay sang maalamon nga tawo? Sin-o ang makalubad sang isa ka problema?* Ang kaalam sang isa ka tawo nagapanayanaya sang iya nawong, kag nagadula sang iya pagkulusmuron.  Nagasiling ako: “Tumana ang mando sang hari+ tungod sa panumpa sa Dios.+  Indi ka magdali sa pagtalikod sa iya.+ Indi ka mag-upod sa paghimo sing malain;+ kay mahimo niya ang tanan nga luyag niya,  bangod ang pulong sang hari may gahom;+ gani sin-o ang makasiling sa iya, ‘Ano ang imo ginahimo?’”  Ang isa nga nagatuman sang sugo indi mahalitan,+ kag ang maalamon nga tawo nakahibalo sang nagakaigo nga tion kag pamaagi.*+  Kay sa tagsa ka butang may nagakaigo nga tion kag pamaagi,*+ bangod ang tawo madamo gid sing kabudlayan.  Sanglit wala sing tawo nga nakahibalo kon ano ang matabo, sin-o ang makasugid sa iya kon paano ini matabo?  Subong nga wala sing tawo nga may gahom nga makapugong sa espiritu,* wala man sing may gahom sa adlaw sang kamatayon.+ Subong nga wala sing ginapapauli sa tion sang inaway, wala man ginatugutan sang kalautan nga makapalagyo ang mga nagahimo sini.*  Nakita ko ini tanan, kag ginbinagbinag sang akon tagipusuon ang tanan nga ginahimo sa idalom sang adlaw, sang ginagamhan sang tawo ang iya isigkatawo sa iya kahalitan.*+ 10  Kag nakita ko ang mga malauton nga ginlubong, sila nga mga nagasulod-pagua sa balaan nga duog, apang wala magdugay nalimtan sila sa siudad nga ginhimuan nila sini.+ Wala man ini sing pulos. 11  Bangod wala gilayon ginasilutan ang mga tawo sa ila malain nga buhat+ padayon sila sa paghimo sing malain.+ 12  Bisan pa ang makasasala maghimo sing 100 ka sala kag magkabuhi gihapon sing malawig, nakahibalo ako nga maayo ang madangatan sang mga nagakahadlok sa matuod nga Dios, bangod nagakahadlok sila sa iya.+ 13  Apang indi maayo ang madangatan sang malauton,+ kag indi niya mapalawig ang iya kabuhi nga daw landong lamang,+ bangod wala sia nagakahadlok sa Dios. 14  May wala sing pulos* nga butang nga nagakatabo sa duta: May mga matarong nga ginatratar subong nga daw nakahimo sila sing kalautan,+ kag may mga malauton nga ginatratar nga daw subong bala nga nakahimo sila sing matarong.+ Makasiling ako nga wala man ini sing pulos. 15  Gani ginapanugda ko ang pagkasadya,+ kay wala na sang maayo pa nga himuon ang tawo sa idalom sang adlaw kundi ang magkaon kag mag-inom kag magkasadya; padayon niya nga himuon ini samtang nagapangabudlay sia sa iya bug-os nga kabuhi,+ nga ginhatag sang matuod nga Dios sa iya sa idalom sang adlaw. 16  Gani adlaw kag gab-i ako nga wala sing tulog* sa pagpaninguha nga makatigayon sing kaalam kag sa paghunahuna sa tanan nga ginahimo* sang tawo sa duta.+ 17  Kag ginbinagbinag ko ang tanan nga binuhatan sang matuod nga Dios, kag nahantop ko nga indi mahangpan sang tawo ang tanan nga nagakatabo sa idalom sang adlaw.+ Bisan ano pa ang ila pagtinguha indi gid nila ini mahangpan. Bisan magsiling pa sila nga maalam na sila, indi gid gihapon nila ini mahangpan.+

Footnote

Ukon “makapatpat sang isa ka butang?”
Ukon “paghukom.”
Ukon “paghukom.”
Ukon “ginhawa; hangin.”
Ukon mahimo, “ang ila kalautan indi makaluwas sa malauton.”
Ukon “kasamaran.”
Ukon “May makapasubo.”
Ukon mahimo, “ang mga tawo wala nagatulog sa adlaw ukon sa gab-i.”
Ukon “hilikuton.”