Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Manugwali 6:1-12

BALAYAN SANG KAUNDAN

  • Wala kalipay sa ginapanag-iyahan (1-6)

  • Magkalipay sa yara sa imo subong (7-12)

6  May nakita pa gid ako nga makapasubo* sa idalom sang adlaw, kag amo ini ang kinaandan nga nagakatabo sa mga tawo:  Ginahatagan sang matuod nga Dios ang tawo sing manggad kag mga pagkabutang kag kadungganan, agod wala sing kulang sa tanan niya nga ginahandum;* apang wala sia gintugutan sang matuod nga Dios nga makapanginpulos sa sini, kundi ang iban nga tawo. Wala ini sing pulos kag makapasubo gid.  Bisan pa ang isa ka tawo mangin amay sang isa ka gatos ka kabataan kag magkabuhi sing malawig, kon wala sia* makapanginpulos sa maayo nga mga butang antes sia makadangat sa lulubngan,* makasiling ako nga mas maayo pa ang bata nga natawo nga patay sangsa iya.+  Kay wala sing pulos nga natawo pa ini nga bata kag nagtaliwan man lang sa kadudulman, ang iya ngalan natabunan sini.  Bisan ang adlaw wala niya makita ukon mahibaluan, mas maayo pa sia* sangsa tawo nga nagkabuhi sing malawig.+  Ano bala ang bentaha kon ang tawo magkabuhi sing duha ka libo ka tuig, pero wala sia makapanginpulos sa maayo nga mga butang? Indi bala pareho lang ang padulungan sang tanan?+  Ang tawo nagapangabudlay agod makakaon;+ apang wala sia* sing kabulusgan.  Kay ano bala ang bentaha sang maalamon nga tawo sa buangbuang,+ ukon ano bala ang bentaha sang imol nga makahibalo mag-atubang sa kabuhi?*  Mas maayo pa nga ituon ang igtalupangod sa makita sang mata sangsa magdalangdalang sa paglagas sa handum.* Wala man ini sing pulos, paglagas lamang ini sa hangin. 10  Ang tanan nga nagaluntad kilala na sadto pa. Kag nahibaluan na ang matuod nga kinaugali sang tawo. Ang tawo indi makapamatuod nga husto sia* sa atubangan sang isa nga mas gamhanan pa sangsa iya. 11  Ang pataka nga hambal* wala sing pulos; kag ano nga bentaha ang mahatag sini sa tawo? 12  Sin-o bala ang nakahibalo kon ano ang pinakamaayo nga mahimo sang tawo sa iya kabuhi sa iya wala sing pulos kag malip-ot nga kabuhi, nga daw landong lamang?+ Kay sin-o bala ang makasugid sa iya sang mahanabo sa idalom sang adlaw kon patay na sia?

Footnote

Ukon “kalamidad.”
Ukon “wala sing kulang para sa iya kalag.”
Ukon “ang iya kalag.”
Ukon “kag bisan ang lulubngan indi nangin iya.”
Sa literal, “mas madamo sia sing pahuway.”
Ukon “apang ang iya kalag wala.”
Sa literal, “sa paglakat sa atubangan sang mga buhi?”
Ukon “sangsa magdayandayan ang kalag.”
Ukon “indi makapakigbato sang iya kawsa.”
Ukon mahimo, “Ang madamo nga butang.”