Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Levitico 16:1-34

BALAYAN SANG KAUNDAN

  • Adlaw sang Pagtumbas Para sa Sala (1-34)

16  Nagpakighambal si Jehova kay Moises sa tapos mapatay ang duha ka anak ni Aaron sang nagpalapit sila kay Jehova.+  Nagsiling si Jehova kay Moises: “Isiling kay Aaron nga imo utod, nga indi sia magsulod sa bisan ano nga tion nga gusto niya sa balaan nga duog+ sa likod sang kurtina+ kag magtindog sa atubangan sang takop sang Kaban, agod indi sia mapatay,+ kay paagi sa panganod+ magapakita ako sa ibabaw sang takop.+  “Antes magsulod si Aaron sa balaan nga duog, dapat sia maghalad sing isa ka torite nga baka bilang dulot tungod sa sala+ kag isa ka tinday nga karnero nga lalaki bilang dulot nga sinunog.+  Dapat niya isuksok ang balaan nga malaba nga panapton nga linen,+ ang karsonsilyo* nga linen+ bilang tabon sa iya lawas,* ang paha nga linen,+ kag ang turbante nga linen.+ Balaan ini nga mga panapton.+ Maligo sia+ kag dayon isuksok niya ini.  “Dapat sia magkuha sa katilingban sang mga Israelinhon+ sing duha ka tinday nga kanding nga lalaki bilang dulot tungod sa sala kag isa ka karnero nga lalaki bilang dulot nga sinunog.  “Dapat ihalad ni Aaron ang baka nga dulot tungod sa sala para sa iya kaugalingon, kag maghimo sia sing pagtumbas para sa iya sala+ kag sa sala sang iya panimalay.  “Dayon kuhaon niya ang duha ka kanding kag dalhon ini sa atubangan ni Jehova sa puertahan sang tolda nga tilipunan.*  Magpagabutgabot si Aaron para sa duha ka kanding, ang isa para kay Jehova kag ang isa para kay Azazel.*  Ihalad ni Aaron ang kanding nga nagabutan+ para kay Jehova bilang dulot tungod sa sala. 10  Apang ang kanding nga nagabutan para kay Azazel dalhon nga buhi sa atubangan ni Jehova agod himuon ang pagtumbas para sa mga sala, agod matabog ini para kay Azazel pakadto sa kamingawan.+ 11  “Dayon ihalad ni Aaron ang baka nga dulot tungod sa sala para sa iya kaugalingon, kag maghimo sia sing pagtumbas para sa iya sala kag sa sala sang iya panimalay. Dayon ihawon niya ang baka nga dulot tungod sa sala para sa iya kaugalingon.+ 12  “Dayon magkuha sia sing incensario+ nga puno sing baga halin sa halaran+ sa atubangan ni Jehova kag sing duha ka hakop sang mahamot nga pino nga incienso,+ kag dalhon niya ini sa likod sang kurtina.+ 13  Ibutang man niya ang incienso sa kalayo sa atubangan ni Jehova,+ kag ang panganod sang incienso magatabon sa takop+ sang kaban sang katipan,*+ agod indi sia mapatay. 14  “Magkuha sia sing dugo sang baka+ kag iwisik niya ini paagi sa iya tudlo sa atubangan sang takop sa sidlangan nayon, kag iwisik niya ang iban nga dugo paagi sa iya tudlo sing pito ka beses sa atubangan sang takop.+ 15  “Dayon ihawon niya ang kanding nga dulot tungod sa sala nga para sa katawhan,+ kag dalhon niya ang dugo sini sa likod sang kurtina+ kag kon ano ang ginhimo niya sa dugo sang baka amo man ang himuon niya sa dugo sini;+ iwisik niya ini sa atubangan sang takop. 16  “Maghimo sia sing pagtumbas sa sala para sa balaan nga duog, agod indi ini madagtaan sang indi matinlo nga mga buhat, sang mga paglapas, kag sang mga sala sang mga Israelinhon.+ Himuon man niya ini para sa tolda nga tilipunan, nga yara sa tunga sang indi matinlo nga mga Israelinhon. 17  “Dapat wala sing iban nga tawo sa tolda nga tilipunan kon magsulod sia agod maghimo sing pagtumbas para sa sala sa balaan nga duog tubtob maggua sia. Maghimo sia sing pagtumbas para sa iya sala kag sa sala sang iya panimalay+ kag sang bug-os nga katilingban sang Israel.+ 18  “Dayon maggua sia kag magkadto sa halaran+ nga yara sa atubangan ni Jehova, kag maghimo sia sing pagtumbas sa sala para sa sini, kag magkuha sia sing dugo sang baka kag sing dugo sang kanding kag ibutang niya ini sa mga sungay sa palibot sang halaran. 19  Iwisik man niya ang iban nga dugo sa sini paagi sa iya tudlo sing pito ka beses kag tinluan ini kag pakabalaanon ini bangod sang indi matinlo nga mga buhat sang mga Israelinhon. 20  “Kon matapos na niya ang pagtumbas sa sala+ para sa balaan nga duog kag sa tolda nga tilipunan kag sa halaran,+ dalhon man niya ang buhi nga kanding.+ 21  Itungtong ni Aaron ang iya duha ka kamot sa ulo sang buhi nga kanding kag itu-ad sa sini ang tanan nga sayop sang mga Israelinhon, ang tanan nila nga paglapas, kag ang tanan nila nga sala, nga daw ginabutang niya ini sa ulo sang kanding+ kag tabugon ini sa kamingawan sang isa ka tawo nga gintugyanan sa paghimo sini.* 22  Tabugon niya ang kanding, kag dalhon sini sa kamingawan ang tanan nila nga sala.+ 23  “Dayon masulod si Aaron sa tolda nga tilipunan kag ubahon niya ang mga panapton nga linen nga ginsuksok niya sang nagsulod sia sa balaan nga duog, kag ibutang niya ini didto. 24  Dapat magpaligo sia*+ sa balaan nga duog kag dayon isuksok niya ang iya kinaandan nga mga panapton;+ dayon maggua sia kag ihalad ang iya dulot nga sinunog+ kag ang dulot nga sinunog sang katawhan+ kag maghimo sia sing pagtumbas para sa iya sala kag sa mga sala sang katawhan.+ 25  Paasuhon niya sa halaran ang sapay nga dulot tungod sa sala. 26  “Dapat labhan sang tawo nga nagtabog sang kanding para kay Azazel+ ang iya mga bayo kag dapat sia maligo, dayon makasulod na sia sa kampo. 27  “Dalhon sa gua sang kampo ang baka nga dulot tungod sa sala kag ang kanding nga dulot tungod sa sala, nga ang dugo sini gindala sa balaan nga duog agod maghimo sing pagtumbas para sa sala, kag sunugon nila ang mga panit, ang mga unod, kag ang ipot sini.+ 28  Dapat labhan sang tawo nga magasunog sini ang iya mga bayo kag maligo sia, dayon makasulod na sia sa kampo. 29  “Mangin pagsulundan ini tubtob san-o para sa inyo: Sa ikanapulo nga adlaw sang ikapito nga bulan pabudlayan ninyo ang inyo kaugalingon,* kag indi kamo maghimo sing bisan ano nga obra,+ tumandok man kamo ukon dumuluong nga nagaistar sa tunga ninyo. 30  Sa sini nga adlaw himuon ang pagtumbas para sa inyo sala+ agod madeklarar kamo nga matinlo. Mangin matinlo kamo sa tanan ninyo nga sala sa atubangan ni Jehova.+ 31  Isa ini ka adlaw nga inugpahuway, kag dapat magpahuway gid kamo kag pabudlayan ninyo ang inyo kaugalingon.*+ Isa ini ka pagsulundan tubtob san-o. 32  “Ang saserdote nga haplasan+ kag ordenahan* nga mangin saserdote+ bilang tal-us sang iya amay+ maghimo sing pagtumbas para sa sala kag magsuksok sing mga panapton nga linen,+ ang balaan nga mga panapton.+ 33  Maghimo sia sing pagtumbas sa sala para sa balaan nga santuaryo,+ para sa tolda nga tilipunan,+ kag para sa halaran;+ kag maghimo sia sing pagtumbas para sa sala sang mga saserdote kag sang tanan nga katawhan+ sang Israel. 34  Mangin pagsulundan ini tubtob san-o para sa inyo,+ agod maghimo kamo sing pagtumbas para sa tanan nga sala sang mga Israelinhon sing makaisa kada tuig.”+ Gani ginhimo niya ang suno gid sa ginsugo ni Jehova kay Moises.

Footnote

Ukon “pangsulod nga mga panapton.”
Ukon “sa iya kitaon nga unod.”
Ukon “tolda diin ang isa makigkita sa Dios.” Tan-awa ang Glossary.
Mahimo nagakahulugan, “Kanding nga Nadula.”
Sa literal, “Pamatuod.”
Ukon “sang isa ka tawo nga nakahanda.”
Sa literal, “paliguan niya ang iya unod.”
Ukon “kalag.” Ang “pabudlayan ang kaugalingon” masami nahangpan nga nagapatuhoy sa nanuhaytuhay nga paagi sang pagdingot sa kaugalingon, lakip ang pagpuasa.
Ukon “kalag.”
Sa literal, “pun-on ang kamot.”