Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Juan 10:1-42

BALAYAN SANG KAUNDAN

  • Ang manugbantay sang karnero kag ang toril (1-21)

    • Jesus maayong manugbantay (11-15)

    • ‘May iban ako nga karnero’ (16)

  • Jesus nag-atubang sa mga Judiyo sa Kapiestahan sang Pagdedikar (22-39)

    • Mga Judiyo wala nagpati (24-26)

    • ‘Akon mga karnero nagapamati’ (27)

    • Ang Anak nahiusa sa Amay (30, 38)

  • Madamo ang nagpati sa tabok sang Jordan (40-42)

10  “Sa pagkamatuod nagasiling ako sa inyo, ang nagasulod sa toril nga wala nagaagi sa puertahan kundi nagataklas sa iban nga alagyan, ina sia isa ka kawatan kag manug-ati.+  Apang ang nagasulod paagi sa puertahan amo ang manugbantay sang mga karnero.+  Ginabuksan sia sang manugbantay sa puertahan,+ kag ang mga karnero nagapamati sa iya tingog.+ Ginatawag niya ang iya mga karnero sa ila ngalan kag ginatuytuyan niya sila pagua sa toril.  Kon mapagua na niya ang tanan nga iya, nagauna sia sa ila, kag ang mga karnero nagasunod sa iya, kay kilala nila ang iya tingog.  Indi gid sila magsunod sa isa ka estranghero kundi magapalagyo sila sa iya, kay indi nila kilala ang tingog sang mga estranghero.”  Ginsugid ni Jesus ini nga paanggid sa ila, apang wala sila makahangop kon ano ang buot silingon sini.  Gani nagsiling liwat si Jesus: “Sa pagkamatuod nagasiling ako sa inyo, ako ang puertahan para sa mga karnero.+  Ang tanan nga nagkari kag nagsiling nga sila ang matuod nga manugbantay mga kawatan kag mga manug-ati; apang ang mga karnero wala magpamati sa ila.  Ako ang puertahan; ang bisan sin-o nga magsulod paagi sa akon maluwas, kag magasulod sia kag magagua kag makakita sang halalban.+ 10  Ang kawatan nagakari lamang agod magpangawat, magpatay, kag maglaglag.+ Apang nagkari ako agod makatigayon ang mga karnero sing kabuhi nga wala sing katapusan. 11  Ako ang maayo nga manugbantay;+ ang maayo nga manugbantay nagahatag sang iya kabuhi* para sa mga karnero.+ 12  Ang tawo nga ginsuhulan lang sa pagbantay sa mga karnero, nga indi manugbantay kag indi tag-iya sang mga karnero, nagabiya sa mga karnero kag nagapalagyo kon makita niya nga nagapakari na ang lobo. Dayon ginasalakay sila sang lobo kag ginapaalaplaag. 13  Bangod ginsuhulan lang, wala sia sing pag-ulikid sa mga karnero. 14  Ako ang maayo nga manugbantay. Kilala ko ang akon mga karnero kag kilala ako sang akon mga karnero,+ 15  subong nga kilala ako sang Amay+ kag kilala ko ang Amay; kag ginahatag ko ang akon kabuhi* para sa mga karnero.+ 16  “May yara ako iban nga mga karnero, nga indi sa sini nga toril;+ dapat dalhon ko man sila, kag magapamati sila sa akon tingog, kag sila mangin isa ka panong nga may isa ka manugbantay.+ 17  Ginahigugma ako sang Amay,+ bangod ginahatag ko ang akon kabuhi,*+ agod mabaton ko ini liwat. 18  Wala sing tawo nga nagakuha sini sa akon, kundi ginahatag ko ini sing kinabubut-on. May awtoridad ako sa paghatag sini, kag may awtoridad ako sa pagbaton sini liwat.+ Ini nga sugo ginhatag sang akon Amay sa akon.” 19  Bangod sang ginsiling ni Jesus, nabahinbahin liwat ang mga Judiyo.+ 20  Madamo sa ila ang nagsiling: “May demonyo sia. Buangbuang sia. Ngaa nagapamati kamo sa iya?” 21  Nagsiling ang iban: “Indi makahambal sing subong sina ang tawo nga ginsudlan sang demonyo. Mapaayo bala sang demonyo ang mga mata sang bulag?” 22  Sadto nga tion ginhiwat sa Jerusalem ang Kapiestahan sang Pagdedikar. Tigtulugnaw sadto, 23  kag naglakatlakat si Jesus sa templo sa kolonada* ni Solomon.+ 24  Ginpalibutan sia sang mga Judiyo kag ginsilingan: “Ngaa wala mo kami* ginasugiran kon sin-o gid ikaw? Kon ikaw ang Cristo, sugiri kami sang matuod.” 25  Nagsabat si Jesus: “Ginsugiran ko na kamo, apang wala kamo magpati. Ang mga buhat nga ginahimo ko sa ngalan sang akon Amay nagapanaksi tuhoy sa akon.+ 26  Apang wala kamo magpati, bangod indi ko kamo mga karnero.+ 27  Ang akon mga karnero nagapamati sa akon tingog, kag kilala ko sila, kag nagasunod sila sa akon.+ 28  Hatagan ko sila sing kabuhi nga wala sing katapusan,+ kag indi gid sila malaglag, kag wala sing magaagaw sa ila sa akon kamot.+ 29  Ang ginhatag sang akon Amay sa akon mas bilidhon sa iban pa nga mga butang, kag wala sing makaagaw sa ila sa kamot sang Amay.+ 30  Ako kag ang Amay isa.”*+ 31  Nagpulot liwat ang mga Judiyo sing bato agod batuhon sia. 32  Nagsiling si Jesus sa ila: “Nakita ninyo nga ginhimo ko ang madamo nga maayo nga mga buhat nga ginsugo sang Amay sa akon. Diin sini nga mga buhat ang nangin kabangdanan nga batuhon ninyo ako?” 33  Nagsabat ang mga Judiyo: “Batuhon ka namon, indi bangod sa imo maayo nga buhat, kundi bangod sa pagpasipala;+ kay bisan ikaw tawo lang, nagasiling ka nga ikaw isa ka dios.” 34  Nagsabat si Jesus: “Indi bala nasulat sa inyo Kasuguan, ‘Nagsiling ako: “Mga dios kamo”’?*+ 35  Kon ang mga nagapakamalaut sang pulong sang Dios gintawag niya nga ‘mga dios,’+ kag ang kasulatan indi mabag-o, 36  ngaa ako, nga ginpakabalaan sang Amay kag ginpadala sa kalibutan, ginasilingan ninyo ‘Nagapasipala ka,’ bangod nagsiling ako, ‘Anak ako sang Dios’?+ 37  Kon wala ako nagahimo sang mga buhat sang akon Amay, indi kamo magpati sa akon. 38  Apang kon ginahimo ko ini, bisan pa indi kamo magpati sa akon, magpati kamo bangod sa akon mga buhat,+ agod mahibaluan ninyo kag padayon nga mahibaluan nga ang Amay nahiusa sa akon kag ako nahiusa sa Amay.”+ 39  Gani gintinguhaan nila liwat nga dakpon sia, apang nakapalagyo sia sa ila. 40  Kag nagtabok sia liwat sa Jordan sa lugar diin nagpangbawtismo anay si Juan,+ kag nagpabilin sia didto. 41  Madamo nga tawo ang nagkadto sa iya kag nagsiling sila: “Wala matuod makahimo si Juan sing bisan isa ka milagro, apang ang tanan nga ginsiling ni Juan tuhoy sa sini nga tawo matuod.”+ 42  Kag madamo didto ang nagtuo kay Jesus.

Footnote

Ukon “kalag.”
Ukon “kalag.”
Ukon “kalag.”
Alagyan nga may atop.
Ukon “ang amon kalag.”
Ukon “nahiusa.”
Ukon “Mga kaangay sang dios kamo.”