Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Josue 7:1-26

BALAYAN SANG KAUNDAN

  • Ang Israel napierde sa Ai (1-5)

  • Ang pangamuyo ni Josue (6-9)

  • Kon ngaa napierde ang Israel (10-15)

  • Si Acan nadakpan kag ginbato (16-26)

7  Apang ang mga Israelinhon nangin indi matutom may kaangtanan sa butang nga dapat laglagon, bangod ginkuha ni Acan+ nga anak ni Carmi, nga anak ni Zabdi, nga anak ni Zera sa tribo ni Juda, ang pila ka butang nga dapat laglagon.+ Gani naakig gid si Jehova sa mga Israelinhon.+  Halin sa Jerico, nagpadala si Josue sing mga lalaki sa Ai+ nga malapit sa Bet-aven kag sa sidlangan sang Betel,+ kag ginsugo niya sila: “Magtaklad kamo kag magpangespiya sa duta.” Gani nagtaklad ang mga lalaki kag nagpangespiya sa Ai.  Pagbalik nila kay Josue, nagsiling sila sa iya: “Indi pagpakadtua ang tanan nga soldado. Mga duha ukon tatlo lang ka libo ka lalaki ang kinahanglan agod mapierde ang Ai. Indi paglapyua ang tanan nga soldado sa pagkadto didto, kay diutay lamang sila.”  Gani nagtaklad didto ang mga 3,000 ka lalaki, apang nagpalagyo sila sa mga lalaki sang Ai.+  Ginpatay sang mga lalaki sang Ai ang 36 ka Israelinhon. Ginlagas sila sang mga taga-Ai halin sa gua sang gawang sang siudad tubtob sa Sebarim,* kag padayon nga ginpamatay nila sila sa dulhugon. Gani hinadlukan ang tagipusuon sang katawhan kag ang ila kaisog daw tubig nga nag-ilig palayo.  Bangod sini, gingisi ni Josue kag sang mga gulang sang Israel ang ila bayo kag naghapa sila sa atubangan sang Kaban ni Jehova tubtob maggab-i, kag ginabutangan nila sing yab-ok ang ila ulo.  Nagsiling si Josue: “O Soberanong Ginuong Jehova, ngaa ginpatabok mo pa sa Jordan ini nga katawhan agod lamang itugyan kami kag laglagon sang mga Amornon? Kuntani nagpabilin na lang kami sa pihak nga bahin* sang Jordan!  Pasayluha ako, O Jehova, apang ano ang masiling ko karon sa tapos mag-isol* ang Israel sa iya mga kaaway?  Kon mabalitaan ini sang mga Canaanhon kag sang tanan nga pumuluyo sang duta, libutan nila kami kag panason ang amon ngalan sa duta, kag ano ang himuon mo para sa imo dungganon nga ngalan?”+ 10  Nagsabat si Jehova kay Josue: “Magtindog ka! Ngaa nagahapa ka? 11  Nakasala ang Israel. Ginlapas nila ang akon katipan+ nga ginsugo ko sa ila nga tumanon nila. Ginkuha nila ang pila ka butang nga dapat laglagon.+ Ginkawat+ nila ini kag gintago sa ila mga pagkabutang.+ 12  Gani, indi madaug sang mga Israelinhon ang ila mga kaaway. Magatalikod sila kag magapalagyo sa ila mga kaaway, bangod nangin butang sila nga dapat laglagon. Indi na ako mag-upod sa inyo kon indi ninyo malaglag ang butang nga dapat laglagon nga yara sa inyo.+ 13  Magtindog ka kag pakabalaana ang katawhan!+ Isiling mo sa ila, ‘Pakabalaana ninyo ang inyo kaugalingon buas, kay amo ini ang ginasiling ni Jehova nga Dios sang Israel: “Ang butang nga dapat laglagon yara sa inyo, O Israel. Indi ninyo madaug ang inyo mga kaaway kon indi ninyo makuha sa tunga ninyo ang butang nga dapat laglagon. 14  Magtipon kamo buas sa aga, suno sa inyo mga tribo. Dayon magpalapit ang tribo nga pilion ni Jehova,+ kag halin sa sina nga tribo magpalapit ang pamilya nga pilion ni Jehova, kag halin sa sina nga pamilya magpalapit ang panimalay nga pilion ni Jehova, kag halin sa sina nga panimalay magpalapit ang tawo nga pilion. 15  Ang tawo nga madakpan nga yara sa iya ang butang nga dapat laglagon, sunugon+ upod sang tanan nga iya ginapanag-iyahan bangod ginlapas niya ang katipan+ ni Jehova kag bangod naghimo sia sing makahuluya nga buhat sa Israel.”’” 16  Gani pagkadason nga adlaw, aga pa nagbangon si Josue kag gintipon niya ang Israel, suno sa ila mga tribo, kag tribo ni Juda ang napili. 17  Dayon ginpapalapit niya ang mga pamilya ni Juda kag ang ginpili amo ang pamilya sang mga Zeranhon,+ pagkatapos ginpapalapit niya ang pamilya sang mga Zeranhon, kag panimalay ni Zabdi ang napili. 18  Sang ulihi, isaisa nga ginpapalapit ang panimalay ni Zabdi, kag ang napili amo si Acan nga anak ni Carmi, nga anak ni Zabdi, nga anak ni Zera sa tribo ni Juda.+ 19  Dayon nagsiling si Josue kay Acan: “Anak ko, palihug padunggi si Jehova nga Dios sang Israel kag magtu-ad ka sa iya. Palihug sugiri ako kon ano ang ginhimo mo. Indi ini pagtagua sa akon.” 20  Nagsabat si Acan kay Josue: “Ako gid ang nakasala kay Jehova nga Dios sang Israel, kag amo ini ang ginhimo ko. 21  Sang makita ko sa mga inagaw ang malahalon kag matahom nga bayo halin sa Sinar,+ kag ang 200 ka siklo* nga pilak kag ang isa ka bareta nga bulawan nga nagabug-at sing 50 ka siklo, naluyagan ko ini gani ginkuha ko ini. Ginlubong ko ini sa duta sa sulod sang akon tolda kag ang kuarta yara sa idalom sini.” 22  Nagpadala dayon si Josue sing mga tawo kag nagdalagan sila sa tolda ni Acan, kag nakita nila ang bayo nga natago sa iya tolda kag ang kuarta yara sa idalom sini. 23  Gani ginkuha nila ini sa tolda kag gindala ini kay Josue kag sa tanan nga Israelinhon, kag ginbutang ini sa atubangan ni Jehova. 24  Gindala ni Josue kag sang bug-os nga Israel sa Nalupyakan* sang Acor+ si Acan+ nga anak ni Zera, ang pilak, ang malahalon nga bayo, ang bareta nga bulawan,+ ang iya mga anak nga lalaki kag babayi, ang iya mga baka, mga asno, mga karnero, ang iya tolda, kag ang tanan nga ginapanag-iyahan niya. 25  Nagsiling si Josue: “Ngaa nagdala ka sing kahalitan* sa amon?+ Magadala si Jehova sing kahalitan sa imo sini nga adlaw.” Kag ginbato sila sang bug-os nga Israel,+ dayon ginsunog sila.+ Gani ginbato nila sila tanan. 26  Dayon nagtumpok sila sing madamo nga bato sa ibabaw niya, kag yara pa ini tubtob sini nga adlaw. Bangod sini, nadula ang kaakig ni Jehova.+ Amo kon ngaa gintawag ini nga lugar nga Nalupyakan sang Acor* tubtob sini nga adlaw.

Footnote

Buot silingon, “Ginakutkutan.”
Sa sidlangan nga bahin.
Ukon “magtalikod.”
Ang isa ka siklo katumbas sang 11.4 ka gramo. Tan-awa ang Apendise B14.
Ukon “Manubo nga Patag.”
Ukon “kagamo; pagsikway.”
Buot silingon, “Kahalitan; Pagsikway.”