Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Josue 6:1-27

BALAYAN SANG KAUNDAN

  • Pader sang Jerico narumpag (1-21)

  • Si Rahab kag ang iya pamilya (22-27)

6  Ginsirhan sing maayo ang Jerico bangod sang mga Israelinhon. Wala sing nagagua kag wala sing nagasulod.+  Dayon nagsiling si Jehova kay Josue: “Ginatugyan ko sa imo ang Jerico kag ang iya hari kag ang iya isganan nga mga soldado.+  Kamo tanan nga lalaki nga magapakig-away maglibot sa siudad sing makaisa. Amo ini ang himuon ninyo sa anom ka adlaw.  Paunahon mo sa Kaban ang pito ka saserdote nga ang kada isa sa ila may dala nga budyong.* Apang sa ikapito nga adlaw, maglibot kamo sa siudad sing pito ka beses kag patunugon sang mga saserdote ang mga budyong.+  Kon patunugon na nila ang budyong kag kon mabatian ninyo ang tunog* sang budyong, magsinggit ang tanan nga soldado sing mabaskog nga singgit sang inaway. Dayon marumpag ang pader sang siudad,+ kag dapat magsulod sing diretso ang kada isa.”  Gani gintawag ni Josue nga anak ni Nun ang mga saserdote kag ginsilingan sila: “Dalha ninyo ang kaban sang katipan. Mag-una sa Kaban ni Jehova ang pito ka saserdote nga ang kada isa sa ila may dala nga budyong.”+  Dayon ginsugo niya ang mga soldado: “Lakat kamo kag maglibot sa siudad, kag mag-una sa Kaban ni Jehova ang mga soldado nga may armas.”+  Kag subong sang ginsiling ni Josue sa mga soldado, ang pito ka saserdote nga ang kada isa sa ila may dala nga budyong sa atubangan ni Jehova naglibot kag nagpatunog sing mga budyong, kag nagasunod sa ila ang kaban sang katipan ni Jehova.  Ang mga soldado nga may armas nag-una sa mga saserdote nga nagapatunog sing mga budyong, samtang ang mga soldado sa likuran nagsunod sa Kaban kag padayon ang pagtunog sang mga budyong. 10  Ginsugo ni Josue ang mga soldado: “Indi kamo magsinggit kag indi kamo magtingog. Indi kamo maghambal sing bisan ano tubtob sa adlaw nga isiling ko sa inyo nga magsinggit kamo, dayon magsinggit kamo.” 11  Ang Kaban ni Jehova ginlibot sa siudad sing makaisa, pagkatapos nagbalik sila sa kampo kag nagpaligad sang gab-i didto. 12  Pagkadason nga adlaw, aga pa gid nagbangon si Josue kag gindala sang mga saserdote ang Kaban+ ni Jehova, 13  kag ang pito ka saserdote nga ang kada isa sa ila may dala nga budyong nag-una sa Kaban ni Jehova nga padayon nga nagapatunog sing mga budyong. Nagauna sa ila ang mga soldado nga may armas, samtang ang mga soldado sa likuran nagasunod sa Kaban ni Jehova kag padayon ang pagtunog sang mga budyong. 14  Naglibot sila sa siudad sing makaisa sa ikaduha nga adlaw, pagkatapos nagbalik sila sa kampo. Amo sini ang ginhimo nila sa sulod sang anom ka adlaw.+ 15  Sang ikapito nga adlaw nagbangon sila sing aga pa, sang nagapamanagbanag pa lang, kag ginlibot nila ang siudad sa amo gihapon nga paagi sing pito ka beses. Sa amo lang nga adlaw ginlibot nila ang siudad sing pito ka beses.+ 16  Sa ikapito nga tion nga ginpatunog sang mga saserdote ang mga budyong, ginsugo ni Josue ang mga soldado: “Singgit kamo,+ kay ginahatag ni Jehova sa inyo ang siudad! 17  Dapat laglagon sing bug-os ang siudad kag ang tanan nga yara sa sini;+ kay Jehova ini tanan. Si Rahab+ nga makihilawason kag ang tanan nga kaupod niya sa balay amo lamang ang mabuhi, bangod gintago niya ang mga mensahero nga ginpadala naton.+ 18  Apang magpalayo kamo sa butang nga dapat laglagon,+ kay basi handumon ninyo ini kag magkuha kamo sing pila ka butang sa sini,+ kag malaglag ang kampo sang Israel bangod nagdala kamo sing kahalitan* sa sini.+ 19  Apang ang tanan nga pilak kag ang bulawan kag ang mga butang nga saway kag salsalon balaan kay Jehova.+ Dapat ini dalhon sa bahandian sang balay ni Jehova.”+ 20  Dayon nagsinggit ang mga soldado sang ginpatunog ang mga budyong.+ Sang mabatian sang mga soldado ang tunog sang budyong kag sang nagsinggit sila sing mabaskog nga singgit sang inaway, narumpag ang pader.+ Dayon ang kada isa sa mga soldado nagsulod diretso sa siudad, kag ginsakop ini. 21  Ginlaglag nila paagi sa espada ang tanan nga yara sa siudad, lalaki kag babayi, bata kag tigulang, ang mga baka, ang mga karnero, kag ang mga asno.+ 22  Nagsiling si Josue sa duha ka lalaki nga nagpangespiya sa duta: “Sulod kamo sa balay sang makihilawason nga babayi kag paguaon ninyo ang babayi kag ang tanan sa iya panimalay, suno sa ginpanumpa ninyo sa iya.”+ 23  Gani nagsulod ang lamharon nga mga espiya kag ginpagua nila si Rahab, kaupod ang iya amay, ang iya iloy, ang iya mga utod, kag ang tanan sa iya panimalay.+ Ginpagua nila ang bug-os niya nga pamilya, kag gindala nila sila sa gua sang kampo sang Israel. 24  Dayon ginsunog nila ang siudad kag ang tanan nga yara sa sini. Apang ginhatag nila sa bahandian sang balay ni Jehova ang pilak, ang bulawan, kag ang mga butang nga saway kag salsalon.+ 25  Si Rahab lamang nga makihilawason kag ang tanan sa iya panimalay kag ang panimalay sang iya amay, ang ginluwas ni Josue;+ kag nag-istar sia sa Israel tubtob sini nga adlaw,+ bangod gintago niya ang mga mensahero nga ginpadala ni Josue sa pagpangespiya sa Jerico.+ 26  Nagpanumpa si Josue* sa amo nga tion: “Pakamalauton sa atubangan ni Jehova ang tawo nga magtinguha sa pagpatindog liwat sini nga siudad sang Jerico. Kon ipasad niya ang sadsaran sini, mapatay ang iya panganay nga anak, kag kon himuan niya ini sing mga gawang, mapatay ang iya kamanghuran nga anak.”+ 27  Gani nangin kaupod ni Josue si Jehova,+ kag nangin bantog sia sa bug-os nga duta.+

Footnote

Sa literal, “mga sungay sang mga karnero nga lalaki.”
Ukon “malawig nga tunog.”
Ukon “kagamo; pagsikway.”
Ukon mahimo, “Ginpasumpa ni Josue ang katawhan.”