Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Josue 4:1-24

BALAYAN SANG KAUNDAN

  • Mga bato bilang pahanumdom (1-24)

4  Sang makatabok na sa Jordan ang bug-os nga pungsod, nagsiling si Jehova kay Josue:  “Magpili ka sing 12 ka lalaki sa katawhan, isa sa kada tribo,+  kag sugua sila, ‘Magkuha kamo sing 12 ka bato sa tunga sang Jordan, sa lugar nga ginatindugan sang mga saserdote.+ Dalhon ninyo ini kag ibutang sa lugar nga teneran ninyo karon nga gab-i.’”+  Gani gintawag ni Josue ang 12 ka lalaki nga ginpili niya sa mga Israelinhon, isa ka lalaki sa kada tribo,  kag nagsiling si Josue sa ila: “Mag-una kamo sa Kaban ni Jehova nga inyo Dios sa tunga sang Jordan, kag magkuha ang kada isa sa inyo sing isa ka bato kag pas-anon ini, suno sa kadamuon sang mga tribo sang mga Israelinhon,  agod mangin isa ini ka tanda sa tunga ninyo. Kon sa ulihi mamangkot ang inyo mga anak, ‘Ngaa ginbutang ninyo ini nga mga bato diri?’+  sugiran ninyo sila: ‘Ini nga mga bato magapahanumdom sa katawhan sang Israel tubtob san-o,+ bangod ang tubig sang Jordan nag-untat sa pag-ilig sa atubangan sang kaban+ sang katipan ni Jehova sang gindala ini sa tabok sang Jordan.’”  Gani gintuman sang mga Israelinhon ang ginsugo ni Josue. Nagkuha sila sing 12 ka bato sa tunga sang Jordan, subong sang ginsugo ni Jehova kay Josue, suno sa kadamuon sang mga tribo sang mga Israelinhon. Gindala nila ini kag ginbutang sa lugar nga ginteneran nila sina nga gab-i.  Nagbutang man si Josue sing 12 ka bato sa tunga sang Jordan sa gintindugan sang mga saserdote nga nagadala sang kaban sang katipan,+ kag didto pa ini tubtob sini nga adlaw. 10  Ang mga saserdote nga nagadala sang Kaban nagtindog sa tunga sang Jordan tubtob natapos sang katawhan ang tanan nga ginsugo ni Jehova kay Josue nga himuon nila nga suno man sa tanan nga ginsugo ni Moises kay Josue. Kag ang katawhan dalidali nga nagtabok. 11  Sang makatabok na ang tanan nga katawhan, nagtabok man ang mga saserdote nga dala ang Kaban ni Jehova samtang nagatan-aw ang katawhan.+ 12  Ang mga Rubenhon, ang mga Gadhanon, kag ang katunga sang tribo ni Manases nagtabok nga handa sa pagpakig-away+ sa unahan sang iban pa nga mga Israelinhon, suno sa ginsugo ni Moises sa ila.+ 13  Mga 40,000 ka soldado nga may mga armas para sa inaway ang nagtabok pakadto sa desyerto nga kapatagan sang Jerico kag kaupod nila si Jehova. 14  Sa amo nga adlaw ginpadunggan ni Jehova si Josue sa atubangan sang bug-os nga Israel,+ kag gintahod gid* nila sia sa bug-os niya nga kabuhi, pareho sang pagtahod nila kay Moises.+ 15  Dayon nagsiling si Jehova kay Josue: 16  “Sugua ang mga saserdote nga nagadala sang kaban+ sang Katipan* nga magtakas sila sa Jordan.” 17  Gani ginsugo ni Josue ang mga saserdote: “Magtakas kamo sa Jordan.” 18  Sang makatakas na halin sa tunga sang Jordan ang mga saserdote nga nagadala sang kaban+ sang katipan ni Jehova kag nakatapak na sila sa pangpang, nag-ilig liwat ang tubig sang Jordan kag nag-awas sa pangpang+ pareho sang una. 19  Nagtabok ang katawhan sa Jordan sang ikanapulo nga adlaw sang nahauna nga bulan kag nagkampo sila sa Gilgal+ sa nasidlangan nga dulunan sang Jerico. 20  Kag ginbutang ni Josue sa Gilgal ang 12 ka bato nga ginkuha nila sa Jordan.+ 21  Dayon nagsiling sia sa mga Israelinhon: “Kon sa ulihi mamangkot sa inyo ang inyo mga anak, ‘Ano ang buot silingon sini nga mga bato?’+ 22  ipaathag ninyo sa inyo mga anak: ‘Nagtabok ang Israel sa Jordan sa mamala nga duta,+ 23  sang ginpamala ni Jehova nga inyo Dios ang tubig sang Jordan tubtob nakatabok sila, pareho sang ginhimo ni Jehova nga inyo Dios sa Pula nga Dagat sang ginpamala niya ini tubtob nakatabok kami.+ 24  Ginhimo niya ini agod mahibaluan sang tanan nga tawo sang duta nga gamhanan gid ang kamot ni Jehova+ kag agod kahadlukan ninyo pirme si Jehova nga inyo Dios.’”

Footnote

Sa literal, “ginkahadlukan.”
Sa literal, “Pamatuod.”