Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Josue 3:1-17

BALAYAN SANG KAUNDAN

  • Israel nagtabok sa Jordan (1-17)

3  Aga pa nagbangon si Josue, kag naghalin sia kag ang tanan nga Israelinhon* sa Sitim+ kag nagkadto sila sa Jordan. Nagpaligad sila sang gab-i didto antes sila magtabok.  Pagligad sang tatlo ka adlaw, naglibot ang mga manugdumala+ sa kampo  kag ginsugo nila ang katawhan: “Kon makita na ninyo ang kaban sang katipan ni Jehova nga inyo Dios nga ginadala sang Levinhon nga mga saserdote,+ maghalin kamo sa inyo lugar kag magsunod kamo sa sini,  agod mahibaluan ninyo ang dalan nga inyo pagaagyan, kay wala pa kamo makaagi sa sina nga dalan. Apang mag-antad kamo sa sini sa kalayuon nga mga 2,000 ka maniko.* Indi kamo magpalapit sa sini.”  Nagsiling si Josue sa katawhan: “Pakabalaana ninyo ang inyo kaugalingon,+ kay buas magahimo si Jehova sing makatilingala nga mga butang sa inyo.”+  Dayon nagsiling si Josue sa mga saserdote: “Dalha ninyo ang kaban+ sang katipan kag mag-una kamo sa katawhan.” Gani ginkuha nila ang kaban sang katipan kag nag-una sila sa katawhan.  Dayon nagsiling si Jehova kay Josue: “Sugdan ko subong nga adlaw ang pagpadungog sa imo sa atubangan sang bug-os nga Israel,+ agod mahibaluan nila nga kaupod mo ako+ pareho sang pag-upod ko kay Moises.+  Suguon mo ang mga saserdote nga nagadala sang kaban sang katipan: ‘Kon makalab-ot na kamo malapit sa tubig sang Jordan, magtindog kamo sa pangpang sini.’”+  Kag nagsiling si Josue sa mga Israelinhon: “Dali kamo diri kag pamatii ang ginsiling ni Jehova nga inyo Dios.” 10  Dayon nagsiling si Josue: “Paagi sa sini mahibaluan ninyo nga nagaupod sa inyo ang isa ka buhi nga Dios,+ kag tabugon niya sa inyo ang mga Canaanhon, ang mga Hethanon, ang mga Hevhanon, ang mga Pereznon, ang mga Girgasnon, ang mga Amornon, kag ang mga Jebusnon.+ 11  Ang kaban sang katipan sang Ginuo sang bug-os nga duta magauna sa inyo sa Jordan. 12  Magpili kamo sing 12 ka lalaki sa mga tribo sang Israel, isa ka lalaki sa kada tribo,+ 13  kag kon makatapak na ang mga tiil sang mga saserdote nga nagadala sang Kaban ni Jehova nga Ginuo sang bug-os nga duta, sa tubig sang Jordan, magauntat sa pag-ilig ang tubig sang Jordan halin sa ibabaw kag mangin daw pader* ini.”+ 14  Gani, sang naghalin na ang katawhan sa ila mga tolda antes magtabok sa Jordan, nag-una sa ila ang mga saserdote nga nagadala sang kaban+ sang katipan. 15  Sang makalab-ot na sa Jordan ang mga nagadala sang Kaban kag gintum-oy sang mga saserdote nga nagadala sang Kaban ang ila mga tiil sa tubig (sa sini nga tion nagaawas ang Jordan sa pangpang sini+ sa tanan nga adlaw sang tig-alani), 16  nag-untat sa pag-ilig ang tubig halin sa ibabaw. Nangin daw pader* ini sa tuman kalayo nga lugar, didto sa siudad sang Adam nga malapit sa Zaretan, kag wala na sing tubig nga nagailig pakadto sa Dagat sang Araba, ang Dagat Asin.* Nag-untat ini sa pag-ilig, gani nagtabok ang katawhan sa lugar nga nagaatubang sa Jerico. 17  Ang mga saserdote nga nagadala sang kaban sang katipan ni Jehova nagpabilin nga nagatindog sa mamala nga duta+ sa tunga sang Jordan samtang nagatabok ang bug-os nga Israel sa mamala nga duta+ tubtob nakatabok na sa Jordan ang bug-os nga pungsod.

Footnote

Sa literal, “mga anak ni Israel.”
Mga 890 ka metro (2,920 ka pie). Tan-awa ang Apendise B14.
Ukon “dam.”
Ukon “dam.”
Ang Patay nga Dagat.